Bəhruz Quliyev: "Ruben Vardanyan Qarabağa gəlməzdən əvvəl Rusiya vətəndaşlığından imtina edib"
Erməni mətbuatı öz ənənəsinə sadiq qalaraq, Ermənistan rəsmilərinin həqiqətə söykənməyən fikirlərini tirajlamaqda davam edir.
Oktyabrın 24-də Kazanda keçirilən Əliyev-Paşinyan danışıqlarından bəhs edən "Hraparak" qəzeti yazır ki, dövlət başçılarının görüşündə iki ölkənin xarici işlər nazirləri də iştirak edib.
Qəzet yazır ki, görüş zamanı məhbuslardan söhbət gedib, Ararat Mirzoyan guya İlham Əliyevi COP29-da iştirak etmələri müqabilində "əsir götürülmüş" ən azı bir neçə "hərbçini" geri qaytarmağa dəvət edib. "O, tədbirdə iştirak etmək üçün şəxsən Bakıya gedəcəyinə zəmanət verəndə Əliyev sualı cavablandırmaq əvəzinə özü sual verdi. O, Paşinyandan soruşub: "Niyə Ruben Vardanyanı tələb etmirsiniz?" Ermənistanın baş naziri suala belə cavab verib: "Çünki mən bilirəm ki, siz onu geri verməyəcəksiniz". Əliyev sözlərinə belə davam edib: "Əvəzində onu başqa ölkədən tələb edirlər, Putin tələb edir".
Yeri gəlmişkən, Ararat Mirzoyan bu söhbəti cümə günü axşam keçirilən qapalı iclasda "Mülki müqavilə"nin deputatlarına deyib", - nəşr qeyd edir.
Guya İlham Əliyevlə Paşinyan arasında belə bir söhbət olub və bunu da deputatlara Mirzoyan bildirib.
Vardanyan Rusiyanın nəyinə laızmdır ki, Azərbaycandan onu tələb etsin? Rəsmi Moskva indiyə qədər belə tələb də səsləndirməyib. Ermənistan rəsmiləri isə yenə öz ənənələrindən kənara çıxmayaraq bu kimi yalan məlumatlar yayırlar, özü də elə təqdim edirlər ki, guya Azərbaycan prezidenti belə bir söz deyib.
"Bu cinayətkarla heç bir ölkə maraqlanmır, ortada qalıb"
SƏS Media Qrupunun rəhbəri, siyasi analitik Bəhruz Quliyev "Bakı-Xəbər"ə şərhində bildirdi ki, Ermənistan həmişəki kimi yenə də öz oyunlarını davam etdirir. "Ermənistan bütün imkanlardan istifadə edir ki, Azərbaycanı fakt qarşısında qoysun. Qarabağdan ermənilərin köçürülməsini erməni diasporu və rəsmi İrəvan onların taleyindən narahat olduqları üçün etməyib. Bu bir oyun idi, düşünürdülər ki, Azərbaycanı etnik təmizləmədə ittiham edə biləcəklər. Amerikadan, Avropa Birliyindən gələn "etiraz səsləri" də bunu sübut edir. Ermənistan 30 illik işğala, qanunsuz məskunlaşdırmaya, bir milyona yaxın azərbaycanlının öz yurdundan didərgin salınmasına, bütün hüquqlarından məhrum edilməsinə, əsir alınmasına, öldürülməsinə görə məsuliyyət daşıyan tərəfdir. Dünya birliyi tərəfindən tanınan Azərbaycan ərazilərini işğal etməklə, soyqırımıları törətməklə Ermənistan beynəlxalq norma və prinsipləri, qanunları kobud şəkildə pozub. Azərbaycan ərazilərində separatçı qurum yaratmaqla İrəvan terrorçuluğu təşviq edib".
B.Quliyev erməni mətbuatının Ermənistanın baş naziri ilə Azərbaycan Prezidenti arasında Moskvada keçirilən görüşdə yaydığı fikirlərə münasibət bildirərkən qeyd edib ki, Azərbaycan Prezidenti İlham Əliyevin Qarabağ münaqişəsinin həlli, 44 günlük müharibə, antiterror tədbirləri, ermənilərin Qarabağdan köçü, separatçılar barəsində mövqeyi dəyişməz olaraq qalır: "İşğal faktına, azərbaycanlılara qarşı törədilən soyqırımılarına, ərazilərimizdə ermənilər tərəfindən törədilən vandalizm aktlarına görə Ermənistan beynəlxalq hüququn imkan verdiyi qədər cəzalandırılacaq. Azərbaycan torpaqlarında cinayətlər törətmiş hər kəs, o cümlədən Qarabağda yaradılmış separatçı, terrorçu qurumun başçıları layiq olduqları cəzanı alacaqlar. Bu gün Bakıda istintaq təcridxanalarında saxlanılan separatçıların başçıları, qondarma qurumun "generalları", terrorçulara maliyyə dəstəyi göstərən, onları bütün lazımi avadanlıqlarla təmin edən keçmiş "dövlət naziri" Ruben Vardanyan da məhkəmənin verdiyi qərara boyun əyməli olacaqlar. Ruben Vardanyan Qarabağa gəlməzdən əvvəl Rusiya vətəndaşlığından imtina edib. Ermənistanda doğulsa da, bu ölkənin də vətəndaşı olmaq fürsəti qazana bilməyib. Ona görə də bu cinayətkarla heç bir ölkə maraqlanmır, ortada qalıb. Sadəcə, bəzi beynəlxalq təşkilatlar, Vardanyanın iş ortaqları onu gündəmdə saxlamağa çalışırlar. Vardanyan Paşinyanın da maraq dairəsində deyil, amma manipulyasiya predmeti kimi əlinin altında saxlayır. Baş naziri yalnız bir məsələ narahat edir, separatçı qurumun rəhbərləri, ö cümlədən Vardanyan "Qarabağ məsələsi" barədə özəl faktlara sahibdirlər. Onların açığa çıxması Ermənistanın iç üzünü açacaq".
İradə SARIYEVA
