Akif Nağı: "İndi hökumət Amerikanın istəklərinin əksinə hərəkət edir deyə onları hədələyirlər"
Artıq Gürcüstanda parlament seçkiləri geridə qaldı, öndə isə müxalifətin öz məğlubiyyəti ilə barışmayaraq mübarızəyə qalxması gözlənilir. Artıq küçə mübarizəsinin işartıları müşahidə edilməkdədir. Bununla yanaşı, Qərbdən və Amerikadan təhdid dolu mesajlar gəlməkdədir.
Gürcüstan hökumətinin kursu dəyişməzsə, gələcək nəticələri istisna etmirik. Bunu ABŞ Dövlət Departamentinin sözçüsü Metyu Miller deyib.
O, qanun pozuntuları ilə bağlı bütün məlumatların araşdırılmasına çağırıb.
Onun sözlərinə görə, ABŞ Gürcüstanı antidemokratik hərəkətlərdən əl çəkməyə və Avro-Atlantik yola qayıtmağa çağırıb.
Co Bayden isə bildirib ki, ölkədəki parlament seçkiləri "inzibati resurslardan çoxsaylı sui-istifadə, seçicilərin hədə-qorxu və məcburiyyəti" ilə müşayiət olunub.
Bəyanatda Prezident Bayden Gürcüstan hökumətini bütün seçki pozuntularını şəffaf şəkildə araşdırmağa, "xarici təsir qanunu" kimi qanunları geri çəkməyə və Gürcüstanın bütün siyasi qüvvələri ilə dialoqa dərhal başlamağa çağırıb.
Bu nə dərəcədə beynəlxalq hüquqa uyğun bəyanatlardir? Belə bəyanatlar Gürcüstan hökumətinə açıq təhdid sayıla bilərmi?
Bizimlə söhbətində məsələyə münasibət bildirən politoloq Akif Nağı dedi ki, ABŞ rəsmilərinin Gürcüstanda keçirilən seçkilərə bu cür münasibəti heç bir beynəlxalq hüquqa uyğun gəlmir: "Bu bütün hüquqi və etik normaların pozulmasi deməkdir. Amerika elə düşünür ki, dünyanın istənilən nöqtəsində hadisələr yalnız onun istədiyi formada cərəyan etməlidir. Bu formada Ağ Ev dünyaya hökmranlıq etməyə çalışır. Bu onların imperialist iddiasıdır, bu mövqedən nə qədər tez geri çəkilsələr, onlar üçün bir o qədər yaxşı olar. Dünya dövlətləri onların diqtəsindən kənara çəkilib, öz siyasətini qurmaq istəyir. Gürcüstan Qərbdən və Rusiyadan asılı olmayaraq, öz siyasətini qurmağa çalışır. Bu da təqdirəlayiq haldır. Seçkilərin nəticələrinin legitimliyinə gəldikdə isə, görünən odur ki, seçki baş tutub. Bəzi pozuntular olub, hətta Amerikanın özündə də belə seçki pozuntularının olması ilə bağlı iddialar var. Yadınızdadırsa, seçkidən narazı qalanlar Ağ Evə hücum edirdi. Bunları görəndə adama elə gəlir ki, Amerika cəngəllik ölkələrinin ənələrinə qayıdır. Ölkədə qayda-qanun yarada, normal seçkilər keçirə bilmirlər, amma başqalarına məsləhət vermək iddiasına düşüblər. Bundan dolayı gah Rusiyanı, gah da digər ölkələri günahlandırırlar. Hazırda Amerikada da seçkilər keçirilir. Göz önündədir ki, seçki kampaniyasında maliyyə mənbələrindən vəsaitlər gəlir və tərəflər xalqın istəklərini deyil, həmin maliyyə mənbələrinin sifarişlərini yerinə yetirirlər. Çox kəskin mübarizə gedir, bəzi hallarda tərəflər debatlara çixmaqdan imtina edirlər, bir-birinə qarşı kiber-hücum taktikaları hazırlayırlar. Yəni ölkərinin kifayət qədər problemləri olduğu halda, başqa ölkələrin işinə qarışmaq istəyirlər.
ABŞ Gürcüstanı oyuncaq ölkə hesab edir. Nə qədər ki, Gürcüstan Amerikanın sifarişlərini yerinə yetirirdi, onlar ölkəni demokratik hesab edirdilər. İndi hökumət Amerikanın istəklərinin əksinə hərəkət edir deyə onları hədələyirlər. Gürcüstan Avropaya inteqrasiyadan imtina edirsə, bu onun öz seçimidir və heç kimə də dəxli yoxdur.
Hesab edirəm ki, Gürcüstanın Qərb və Rusiya ilə məsafə saxlamaqla öz maraqlarını ön plana keçirmək siyasəti yürütməsi düzgün seçimdir. Bu normal yanaşmadır. Bununla da Amerika və digər dövlətlər hesablaşmalıdır.
Amerika rəsmiləri əllərində heç bir fakt olmadan kəskin ittihamlar səsləndirirlər, bu qərəzli mövqedir. Hətta ortada fakt olsa belə, bu, Gürcüstanın daxili işidir. O Amerika ilə eyni hüquqlu dövlətdir, problemi varsa, özü həll etməlidir. Amerikanın və digər dövlətin başqasının işinə qarışmağa haqqı yoxdur. Beynəlxalq təşkilatlar müəyyən ölkələrə irad tuta bilər, müəyyən məsləhətlər verə bilər. Amma bir ölkənin başqa bir dövlətin daxili işinə qarışması yolverilməzdir. Amerika və Avropa Gürcüstana heç bir təzyiq göstərə bilməz. Sadəcə maliyyə yardımlarını dayandıra bilərdilər, onu da artıq dayandırıblar. Amerika, deyəsən, digər ölkələri Gürcüstanın üzərinə qaldirmaq, onu beynəlxalq təşkilatlardan çıxarmaq, ona sanksiyalar tətbiq etmək kimi absurd fikirlərə düşməkdədir.
Amerikanın hazırda bəzi ölkələrə tətbiq etdiyi sanksiyaların da heç bir qanuni əsası yoxdur. Sadəcə, Amerika bir ölkəyə sanksiya tətbiq edir və ondan asılı olan ölkələri də buna məcbur edir. Bu haqdızlıqdır və beynəlxalq hüquqa ziddir. Azərbaycan Amerikanın bu kimi təzyiqlərinə adekvat cavab verir və onlar sonradan öz səhvlərini düzəldərək ölkəmizin mövqeyi ilə razılaşmaq məcburiyyətində qalırlar. Bütün ölkələrin mövqeyi belə olmalıdır.
Hesab edirəm ki, Gurcüstan da onların qarşısında müti şəkildə dayanmayacaq, öz haqlı mövqeyini ortaya qoyacaq. Fikrimcə, Azərbaycan da Gürcüstana dəstək verməlidir. Çünki Amerika hər hansı bir ölkədə özü üçün müti rejim yaradırsa, bu digər ölkələrə də mənfi təsir göstərir".
Dəniz NƏSİRLİ
