Ramil Məmmədli: "Söhbət bir sıra ağır silahlardan gedə bilər"
"Fransanın hər kəsin əldə etmək istədiyi hərbi texnikası var. Fransa onu Ermənistana verir".. Bunu Fransanın Ermənistandakı səfiri Olivye Dekotinyi özünün X səhifəsində yazıb.
Səfir postuna "Politico" qəzetində "Thales" şirkətinin (Fransa) radar istehsalı ilə bağlı məqaləyə keçid də əlavə edib. Məqalədə şirkətin 2008-ci ildən bəri dünyanın 32 ölkəsinə 200, təkcə 2023-cü ildə isə 40 GM radarı satdığı bildirilir. Yazıda həmçinin qeyd edilir ki, Paris son aylar Ermənistana üç, Moldovaya bir GM200 sistemi satıb.
Bütün bu deyilənlərin fonunda maraqlıdır, Fransa səfiri hansı silahlara eyham vurur? Söhbət hücum silahlarından gedirmi?
"Ola bilsin ki, Fransa Ermənistana "Sezar" uzaqvuran topları, digər artileriya və bəzi raket vasitələrini vermək istəyir"
Sözügedən məsələyə aydınlıq gətirən hərbi ekspert Ramil Məmmədli "Bakı-Xəbər"ə açıqlamasında bildirdi ki, burada bir sıra müasir hücum silahlarından söhbət gedə bilər: "Əvvəla, səfir Olivye Dekotinyi öz səlahiyyətlərindən bəzən çox kənara çıxır və aşırı dərəcədə diplomata xas olmayan ermənipərəst mövqe sərgiləyir. Şübhəsiz ki, Parisdən təlimat gəlməsə, o bu qədər canfəşanlıq göstərməz. Bunun başlıca səbəbi Fransanın perspektivdə Rusiyanı Ermənistanda əvəz etmək istəyi ilə əlaqədardır. Parisin əsas hədəfi odur ki, Rusiyadan sonra Fransa Ermənistanda hakim mövqedə olsun. Bununla bağlı Makron hakimiyyətinin gözləntiləri böyükdür. Məlum olduğu kimi, Fransa güclü hərbi-sənaye potensialına malikdir. Vəziyyət o yerə gəlib çatıb ki, Fransa dünyada silah ixracına görə Rusiyanı ötərək ikinci yerə çıxıb. İndiyə qədər deyilirdi ki, Fransa Ermənistana yalnız müdafiə xarakterli silahlar verir. Bunlar əsasən radioelektron mübarizə vasitələri və "Bastion" zirehli maşınlardır. Səfir O. Dekotinyi hər kəsin əldə etmək istədiyi silahları Fransanın Ermənistana veriyini deyirsə, deməli söhbət heç də adları çəkilən radar sistemlərindən getmir. Söhbət bir sıra ağır silahlardan gedə bilər. Məsələn, ola bilsin ki, Fransa Ermənistana "Sezar" uzaqvuran topları, digər artileriya və bəzi raket vasitələrini vermək istəyir. Çünki Makron hakimiyyətindən nə desən gözləmək olar. Ancaq nə qədər ki Rusiyanın Ermənistanda hərbi bazaları var, bu ölkə KTMT-də təmsil olunur, Fransanın kütləvi şəkildə erməniləri ağır hücum silahları ilə silahlandıracağı mümkün görünmür. Ən azından bu, Fransa üçün müəyyən risqlər yarada bilər. Rusiya həmin silahların sirrini öyrənə bilər və s. Başqa bir tərəfdən, Fransanın Ermənistanı silahlandırması regionda sabitliyə və sülh prosesinə təhdid yaradan haldır. Ermənistan nə qədər silahlandırılsa da, Azərbaycanı təhdid etmək və üstələmək gücündə olmayacaq. Bu bir reallıqdır".
Vidadi ORDAHALLI
