Elşən Həsənov: "Ermənistan rəsmilərinin ritorikasında aydın görünür ki, Zelenskinin səfəri daha çox vəziyyəti gərginləşdirməyə yönəlib"
Ermənistan parlamentinin spikeri Alen Simonyan deyib ki, Ukrayna prezidenti Vladimir Zelenskinin Ermənistana səfəri baş tutsa, bu, regional xarakter daşımalıdır.
Simonyan qeyd edib ki, hazırda Zelenskinin səfəri barədə məlumatı yoxdur. Jurnalistin "Azərbaycan Zelenskinin Bakıya səfərinin planlaşdırılmadığını bildirib" sözlərinə cavab olaraq spiker əsəbiləşib:
"Təəccüblənirəm ki, Azərbaycan rəsmilərinin dedikləri son həqiqət hesab olunur. Bəs onun Azərbaycana getdiyi üzə çıxsa? Onda nə deyirsən?!"
Onun sözlərinə görə, səfərin Bakı ilə İrəvan arasında sülhə nail olmaq məqsədi daşıdığı barədə söhbətlər, səfər hər iki ölkəyə ediləcəksə məqbuldur:
"Ümid edirəm ki, belə bir səfər baş tutsa, müsbət dəyişikliklər gətirəcək, baxmayaraq ki, hazırda dəqiq bir şey deyə bilmərəm".
Zelenskinin səfəri barədə ortada rəsmi nəsə yoxdur. Onda niyə erməni mediası və rəsmiləri bu məlumatla belə spekulyasiya edir? Bəyəm spiker bilmir ki, Zelenski İrəvana gələcək, yoxsa yox?
Ermənistan rəsmiləri həm də bu təqdimatı edirlər ki, güya Zelenskinin yalnız Ermənistana deyil, bütün Qafqaz ölkələrinə səfəri olsa, yəni burada əsasən Azərbaycan və Ermənistan nəzərdə tutulur, bunun bölgədəki sülh prosesinə müsbət təsiri olacaq. Ermənistan sülh sazişi imzalamaq istəsə, Zelenskiyə nə gərək var? Zelenskinin belə sülhyaratma qabiliyyəti varsa, niyə bunu öz ölkəsinə tətbiq etmir? Bu, Ermənistanın sülhü pozmaq üçün növbəti cəhdidir. Onlar başa düşür ki, Zelenski regiona səfər etsə, vəziyyət pisə doğru dəyişəcək. Hazırkı məqamda Azərbaycan onu qəbul etsə, Rusiya buna qıcıqlanacaq. Bu qənaətə gəlmək olarmı ki, Zelenskinin səfəri ətrafında yaradılan ajiotaj əslində Ermənistan tərəfdən sülh prosesini növbəti dəfə pozmağa hesablanıb?
Müstəqil siyasətçi Elşən Həsənov "Bakı-Xəbər"ə açıqlamasında bildirdi ki, Zelenskinin Ermənistana reallaşacaq səfəri ətrafında yaradılan süni ajiotaj artıq gülməli xarakter alıb: "Mən ilk dəfədir görürəm ki, hansısa liderin səfəri nəzərdə tutulan ölkənin rəsmiləri özlərini belə gülməli vəziyyətə salırlar. Adətən, dövlət rəsmilərinin səfərləri kiçik detalına qədər protokol xidmətləri tərəfindən əvvəlcədən razılaşdırılır. Orada, nəinki dövlət başçısının səfər edəcəyi tarix, haranı ziyarət edəcəyi, hansı abidənin önünə əklil qoyacağı da əvvəlcədən müəyyənləşir. İndi necə olur ki, bir ölkənin spikeri səfərin təfərrüatını şərh edir, ancaq bunun reallaşıb-reallaşmayacağını sual altına qoyur? Deməli bu məqsədli şəkildə dövriyəyə buraxılan piyardı. Düzdür, Zelenski hazırda diqqətdə olan dövlət başçısıdır. Onun hara səfər edəcəyi Qərb və ABŞ tərəfindən planlaşdırılır. Ancaq bu o anlama gəlmir ki, dövlət səfərini belə məsxərəyə qoyasan. Birincisi, Zelenski Azərbaycana səfər etmək istəsə, bunu Ermənistan rəsmiləri ilə deyil, bizimlə razılaşdırmalıdır. İkincisi, Zelenskinin Ermənistana edəcəyi səfər heç də regiondakı sülhə yönəlmir. Əksinə, bununla Qərb Rusiyaya mesaj verir ki, biz Ermənistanda Paşinyanın qismində növbəti Saakaşvili və ya Zelenski hazırlamışıq. Zelenski hazırda münasibətləri gərginləşdirə biləcək fiqurdur, nəinki sülh yaradan. Rusiyanın regionda böyük təsir imkanları var. Zelenski Rusiya ilə müharibə edir. Təsəvvür edin ki, onun Azərbaycana səfəri reallaşır. Bu, Rusiyada qıcıq doğurmaya bilməz. Bizə bu lazımdırmı? Təbii ki, yox. Ermınistan onu qəbul edirsə, etsin. Bizə əlavə məsləhət vermək lazım deyil. Ermənistan rəsmilərinin ritorikasında aydın görünür ki, Zelenskinin səfəri daha çox vəziyyəti gərginləşdirməyə yönəlib".
Məhəmmədəli QƏRİBLİ
