Azər Həsrət: "Onların münasibətində bizə qarşı qərəz var"
Avropa İttifaqının (Aİ) Ermənistanı açıq şəkildə dəstəkləməsi özünü bütün istiqamətlərdə büruzə verir. Aİ-nin Ermənistandakı səfiri mütəmadi olaraq ermənipərəst mövqedən çıxış edir və erməni revanşizminə dəstək verir. O, qondarma Sumqayıt hadisələrinə də reaksiya verib.
36 il əvvəl erməni başbilənlərinin fitvası ilə törədilən və zorla "etnik münaqişə" donu geyindirilməyə çalışılan Sumqayıt hadisələrinin təşkilatçıları da, icraçıları da ermənilər özləri olublar. Sumqayıt hadisələrini törədənlərdən olan Eduard Qriqoryan azadlıqda gəzir. Halbuki, onun cinayətləri barəsində vaxtilə Sumqayıtda yaşayan ermənilərin çoxsaylı şahid ifadələri mövcuddur. Amma ermənilər, bir qayda olaraq, Azərbaycanı, azərbaycanlıları hədəfə alır.
Bu arada, Aİ-nin Ermənistandakı nümayəndəliyinin rəsmi Feysbuk səhifəsində "36 il əvvəl Sumqayıtda yaxınlarını itirənlərə" başsağlığı verilib.
"Biz hamımız belə faciələrin bir daha baş verməyəcəyinə əmin olmaqla, barışıq, eləcə də sabit və davamlı sülh əldə etmək üçün güclü səylər göstərməyə davam etməliyik", - deyə diplomatik nümayəndəlikdən bildirilib.
Göründüyü kimi, Aİ-nin Ermənistandakı nümayəndəliyi, gerçəyi görmək əvəzinə, erməni toruna düşüb Sumqayıt yalanlarına ciddi yanaşır. Bir əsas şeyi unudurlar ki, Cənubi Qafqazdakı münaqişələrdə ermənilərin "rolu" çox böyükdür. Sumqayıt hadisələri də, Qarabağ hadisələri də, Xocalı faciəsi də ermənilər tərəfindən törədilib, təbii ki, onların dəstək verənləri, arxalarında duranları da az olmayıb.
Ölkəmizdəki Qərb diplomatları, Qərb ölkələri səfirləri Xocalı ilə bağlı başsağlığı verirlər, amma bu soyqırımın ermənilər tərəfindən törədildiyini vurğulamırlar. Aİ-nin Ermənistan nümayəndəliyi geninə-boluna Sumqayıt hadisəsindən bəhs edir, bununla da ermənilərə qol-qanad verir, sülh prosesinə əngəl olan yanaşmalar ortaya qoyur. Aİ nümayəndəliyinin açıqlaması bütün hallarda hadisələrlə bağlı qızışdırıcı mövqe nümayiş etdirməkdir.
"Avropa Birliyi yenə də ermənilərin yalanlarına inanmağı üstün tutur"
Siyasi şərhçi Azər Həsrət "Bakı-Xəbər"ə bildirdi ki, bütün hallarda qızışdırıcı mövqenin sərgilənməsi müsbət nəticələrə səbəb olmur. O qeyd etdi ki, Qərb ölkələri səfirləri Xocalı soyqırımının 32-ci il dönümü ilə bağlı paylaşım edib Azərbaycana başsağlığı veriblər, amma onların heç biri öz paylaşımında Xocalı soyqırımını kimin törətdiyini yazmayıb. "Hətta mən özüm tvitter üzərindən ABŞ, Böyük Britaniya və Fransa səfirlərinə bu məsələ ilə bağlı iradımı yazdım ki, bu faciəni kimin törətdiyi haqda da bir kəlmə deyəydiniz. Təbii ki, reaksiya verməyiblər. Fransa səfirinə yazdım ki, Fransa nə qədər Ermənistanı dəstəkləməyə, silahlandırmağa davam edəcək, bu faciələr yenə də olacaq. O da hiss etdim ki, bir az da əsəbi tonda cavab yazmışdı ki, hər bir dövlətin özünü müdafiə hüququ var, Ermənistan Azərbaycanın ərazi bütövlüyünü tanıyır.
Demək istədiyim odur ki, onlar reaksiya veriblər, sadəcə olaraq, bu soyqırımı tərədən Ermənistanın, ermənilərin və onlarla da bərabər rusların adlarını çəkmirlər"-deyə A.Həsrət bildirdi.
A.Həsrətin sözlərinə görə, Aİ də, bütüövlükdə Qərb ölkələri də bu məsələlərdə diqqətli olsunlar, neytrallıq lazımdırsa bəli, neytrallıq etsinlər, amma bu neytrallıq faktları, gerçəklikləri gözardı etməklə olmamalıdır.
A.Həsrət qeyd etdi ki, ümumiyyətlə Sumqayıt hadisələri ilə bağlı gerçəkləri biz illərdir dünyaya çatdırmağa çalışırıq, amma ermənilər vaxtında öz bildiklərini təbliğ ediblər. "Təəssüflər olsun ki, Avropa Birliyi də daxil olmaqla, bu cür beynəlxalq qurumlar və onların təmsilçiləri erməni yalanlarına inanmağı üstün tuturlar. Yəni söhbət nədən gedir? Söhbət ondan gedir ki, Sumqayıt hadisələrini törədən, ümumiyyətlə bu işə başçılıq edən erməni əsilli şəxs hələ də həyatdadır. Onun istintaqa verdiyi ifadələr əlçatandır. İnterent üzərindən istənilən adam ona baxa bilər. Bu birmənalı olaraq ermənilərin özlərinin törətdiyi hadisələr idi, amma buna baxmayaraq müəyyən qurumlar, dairələr, o cümlədən də Avropa Birliyi yenə də ermənilərin yalanlarına inanmağı üstün tutur"-deyən A.Həsrət vurğuladı ki, bu qəbuledilməzdir. "Biz sadəcə Aİ-nin Ermənistandakı nümayəndliyinə mətbuat vasitəsilə cavab verməklə kifayətlənməməliyik. Biz Aİ-yə Sumqayıt hadisələri ilə bağlı gərəkli sənədləri müvafiq qaydada təqdim etməliyik. Yəni bu cür rəhbər vəzifədə olanlar, bu qurumu səfir, diplomat kimi təmsil edənlər mütləq o sənədləri almalı, baxmalı, görməlidir. Biz onlara öz həqiqətlərimizi çatdırmaq üçün sona qədər çalışmalıyıq. Onların münasibətində bizə qarşı qərəz var, birtərəfli münasibət var. Bütün bunlar sirr deyil. Biz bilirik ki, onlar ermənilərə qahmar çıxırlar, bizə qarşıdırlar. Ona görə də biz sözümüzü deməkdən çəkinməməliyik"-deyə A.Həsrət əlavə etdi.
İradə SARIYEVA
