"Xocalıda Prezidentin mesajlarından biri dünya ictimaiyyətinə, beynəlxalq təşkilatlara, böyük super dövlətlərə idi"
Bildiyimiz kimi, Azərbaycan Prezidenti İlham Əliyev fevralın 26-da, Xocalı soyqırımının 32-ci il dönümündə Xocalı rayonuna səfər etdi və Xocalı soyqırımı memorialının təməlini qoydu.
Ölkə başçısı eyni zamanda rayon ictimaiyyətinin nümayəndələri ilə görüşüb.
"Biz bu həqiqəti (Xocalı soyqırımı ilə bağlı – red.) dünya ictimaiyyətinə çatdırmaq üçün bir çox səylər göstərmişdik və haqlı olaraq dünyadan ədalət tələb edirdik". Bu sözləri Prezident İlham Əliyev fevralın 26-da Xocalı rayon ictimaiyyətinin nümayəndələri ilə görüşündə söyləyib.
"Xocalı soyqırımı dünyanın gözü qarşısında baş vermiş qanlı cinayətdir. Xocalı soyqırımını inkar etmək ədalətsizlik və vicdansızlıqdır", - deyən Prezident Əliyev Ermənistan dövlətinin, o vaxt və bu gün onun arxasında duran eyni qüvvələrin bu hadisənin ört-basdır edilməsi üçün əllərindən gələni etdiklərini diqqətə çatdırıb.
Prezidentin Xocalının 32- ci ildönümünü Xocalıda qeyd etməsi nə deməkdir? Xocalıdan verilən mesajlar dünyanın vicdanını sızladacaqmı?
"Bütün dünya Ermənistanı Xocalı soyqırımını törədən xalq və dövlət kimi göstərmir, amma göstərməlidir"
"Fevralın 26-da Prezident İlham Əliyevin Xocalı şəhərində Xocalı Soyqırımı Memorialının təməlini qoyması ilk növbədə onu göstərir ki, Xocalı bizdədir, ərazimiz bütövdür, suverenliyimiz bərpa olunub, Azərbaycan öz ərazisində bayrağını dalğalandırır və bütün işləri həyata keçirməyə başlayıb".
Bu sözləri "Bakı-Xəbər"ə açıqlamasında "SƏS" Media Qrupunun rəhbəri, siyasi şərhçi Bəhruz Quliyev deyib.
Bəhruz Quliyev sözlərinə belə davam edib: "Cənab Prezident ötən çıxışlarının birində qeyd etdi ki, "Mən Xocalıda bayraq qaldırdıqda fikirləşdim ki, Xocalı soyqırımında şəhid olanların qanı yerdə qalmadı. Xankəndidə bayraq qaldırdıqda isə düşündüm ki, Azərbaycan torpaqları artıq işğaldan azad olundu". Yəni cənab İlham Əliyev ötən çıxışında Xankəndini bir paytaxt kimi göstərmişdi. Amma Xocalı haqqında danışanda Xocalı soyqırımında həlak olan insanların qanının alındığını bildirmişdi. Bu da onu göstərir ki, Xocalı soyqırımında rəhmətə gedən insanların qanı yerdə qalmadı.
Prezident Xocalı sakinlərinə çıxışında bildirdi ki, 30 il ədalətin bərpa olmasını gözlədik, amma günahkarlar cəzalandırılmadı və biz orada ədaləti bərpa etdik. O qeyd etdi ki, 44 günlük Vətən müharibəsi və 2023-cü ildəki antiterror tədbirləri ədalətin təntənəsi oldu. Sözün əsl mənasında 30 il dünyada ədalət axtardıq, Ermənistanın Azərbaycana qarşı ərazi iddiasını, etnik təmizləmə siyasətini dünyaya göstərmək istədik. Amma təəssüflər olsun ki, bu alınmadı. Yəni dünya ermənilərin cəzalanmasını istəmədi. Ən nəhayət ədaləti biz bərpa etdik.
Xocalıda Prezidentin mesajlarından biri dünya ictimaiyyətinə, beynəlxalq təşkilatlara, böyük super dövlətlərə idi. O bildirdi ki, Xocalı soyqırımını indiyə qədər cəmi 18 dövlət tanıyıb. Yəni niyə dünya bu soyqırımı tanımır? Burada məqsəd nədir?
Bütün dünya Ermənistanı Xocalı soyqırımını törədən xalq və dövlət kimi göstərmir, amma göstərməlidir". B.Quliyev qeyd etdi ki, biz buna nail olmalıyıq, bu bizim üçün bir ömür yadda qalan hadisədir. "Amma əsas odur ki, ədalət bərpa olundu. Azərbaycan lideri Xocalıda ordu quruculuğu, ordunun gücü, vətənpərvər gəncliyin Azərbaycan dövlətinin və Prezidentin ətrafında birləşib torpaqların işğaldan azad olunmasında köməklik göstərməsi daxili auditoriyaya hesablanmış fikir, beynəlxalq ictimaiyyətə bir mesajdır ki, onlar öz səhvlərini görsünlər və bundan sonra Azərbaycana yanaşmalarında düzgün mövqe tutsunlar.
Ali Baş Komandan qeyd etdi ki, əgər Ermənistan sülh istəyirsə, bizim bütün şərtləri qəbul etməlidir. Bizim şərtlər də qeyri-adi deyil. Sadəcə olaraq şərtlərimiz Azərbaycanın ərazi bütövlüyü, səhərdlərin tanınması, gələcəkdə Ermənistanın heç bir ərazi iddiasına düşməməsidir. Ermənistan bu şərtlərlə razılaşsa, sülhə nail olmaq mümkündür. Bir sözlə, cənab Prezidentin Xocalıdakı çıxışında sülh mesajı da var idi" - deyə B.Quliyev əlavə etdi.
İradə SARIYEVA
