Turab Rzayev: "Bununla Paşinyan Rusiyaya arxa çevirdiyini açıq isbatlamış olacaq"
Ukrayna Prezidenti Vladimir Zelenskinin İrəvana səfəri Ermənistan və Rusiya arasında münasibətlərdə dönüş nöqtəsi ola bilər.
Qeyd edək ki, bir çox ekspertlərin sözlərinə görə, Ukrayna liderinin gəlişinin Ermənistanın real maraqları ilə heç bir əlaqəsi ola bilməz. Bu, çox güman ki, kollektiv Qərbin Rusiyanın Ermənistanın hazırkı rəhbərliyi ilə əlaqələrini birdəfəlik məhv etmək istəyindən xəbər verir.
Zelenskinin İrəvana səfəri Paşinyanın Rusiyadan Qərbə istiqamətlənmə siyasətinin zirvəsi ola bilər. Hərbi əməliyyatlar başlayandan indiyədək Zelenski, Baltikyanı ölkələr istisna olmaqla, heç bir postsovet ölkəsinə səfər etməyib. Buna görə də onun Cənubi Qafqaz ölkələrinə gəlişi ziddiyyətlərə səbəb olacaq. Zelenski, faktiki olaraq, təkcə İrəvana deyil, Bakıya da səfər edərsə, bu, mənfi təsiri bir qədər yumşalda bilər. Ümumilikdə İrəvanla Moskvanın münasibətlərində hazırkı vəziyyət çox qeyri-müəyyəndir. Zelenski İrəvana səfər edərsə, bu, Ermənistanın hazırkı rəhbərliyi ilə Rusiyanın normallaşma ehtimalını əngəlləyəcək.
Siyasi şərhçi Turab Rzayev "Bakı-Xəbər"ə açıqlamasında bildirdi ki, Zelenskinin Ermənistana reallaşacaq səfəri haqqında məlumatı yalnız Ermənistan mətbuatı yayıb: "Bu səfərin reallaşacağı ilə bağlı ehtimallar Ukrayna rəsmi dairələri tərəfindən təsdiqlənməyib. Qarabağ münaqişəsi mövcud olan zaman regiona səfər edən nüfuzlu liderlər balansı qorumaq üçün həm Ermənistana, həm də Azərbaycana səfər edirdilər. Zelenskinin Ermənistana səfəri olarsa, onun Azərbaycana da səfəri reallaşmalıdır. Belə olmasa, bu bir qədər yanlış qəbul olunacaq. Xüsusilə də Rusiya - Ukrayna müharibəsi fonunda bu səfərin baş tutması Ermənistan - Rusiya münasibətlərinə də mənfi təsir edə bilər. Çünki Zelenski münaqişə mövcud olandan sonra heç bir MDB ölkəsinə səfər etməyib. Bununla Qərb, həm də Rusiyaya mesaj verir ki, bizim bir qalamız da Ermənistandır. Amma Ermənistanla bağlı vəziyyət fərqlidir. Çünki həmin ölkədə Rusiyanın hərbi bazası mövcuddur. Ermənistan Rusiyanın liderlik etdiyi bir çox təşkilatlara üzvdür. Zelenskinin mövqeyi isə tam bəllidir. Belə bir məqamda Paşinyan Zelenskiyə qucaq açarsa, Rusiya bunu siyasi xəyanət elementi kimi qəbul edəcək. Ancaq Paşinyan belə addımlara meyllidir. Qərbin yanında etimadını daha da möhkəmlətmək istəyir. Bu səfər Ermənistanla Rusiya arasında olan münasibətləri daha da gərginləşdirəcək. Bununla Paşinyan Rusiyaya arxa çevirdiyini açıq isbatlamış olacaq. Paşinyan bir neçə gün əvvəl KTMT - də fəaliyyətlərini dondurduqlarını deyirsə, Zelenskini də qəbul etməkdən çəkinməz. İstənilən halda, hadisələrin belə cərəyan etməsi Azərbaycan üçün faydalıdır. Çünki regionda marağı və gücü olan Rusiya İrəvana qarşı daha amansız siyasət yürütməyə başlayacaq".
Məhəmmədəli QƏRİBLİ
