Siyasi mədəniyyət həm cəmiyyət, həm də ölkənin siyasi kəsimi üçün çox vacib bir keyfiyyətdir. Adətən bu keyfiyyətin formalaşmasına ölkələrdə keçirilən seçkilər, bu seçkilərdə iştirak edən müxtəlif yönlü partiyalar, onların təmsilçiləri təkan verir.
Azərbaycanda keçirilən 7 fevral növbədənkənar prezident seçkilərinin siyasi mədəniyyət vərdişlərinə hansı dərəcədə təsir göstərdiyi müzakirə olunmaqdadır.
Əksər ekspertlərə görə, Azərbaycanda keçirilən seçkilərin, xüsusən də prezident seçkilərinin bu istiqamətdə oynadığı rol böyükdür. Bu seçkilərə müxtəlif siyasi qütblərə, baxışlara, yönlərə malik olan partiyaların, müstəqil siyasətçilərin qatılması, seçki kampaniyası dövründə onların təbliğatı üçün bərabərhüquqlu şərait yaradılması buna nümunədir. Ekspertlər hesab edir ki, son prezident seçkilərində namizədlərin və onların nümayəndələrinin təbliğat kampaniyası, onların çıxışları ölkədə siyasi mədəniyyətin artıq inkişaf etməkdə olduğunu göstərdi. Ən azından namizədlər öz çıxışlarında siyasi mədəniyyətin prinsip və qaydalarına riayət etdilər. Bəzilərinin fikrincə, əvvəlki seçkilərdə radikal müxalifət öz təbliğat kampaniyalarında çıxışları zamanı əsasən siyasi mədəniyyətin prinsiplərini pozub. Bu isə cəmiyyətdə neqativ bir hal kimi qarşılanıb. Bu hallar da baş verib.
Amma aydın şəkildə görsənən odur ki, Azərbaycanda siyasi mədəniyyət nəinki formalaşır, hətta onun Azərbaycan təcrübəsi də özünü geniş şəkildə ifadə edir.
Bir sıra ekspertlər hesab edir ki, müstəqil Azərbaycanda siyasi mədəniyyətin özülünü ulu öndər Heydər Əliyev qoyub. Belə ki, onun rəhbərliyi dövründə müstəqil Azərbaycan Respublikasının Konstitusiyasının qəbul edilməsi siyasi mədəniyyətin formalaşması və inkişafına şərait yaradan fundamental amil qismində çıxış edib.
"Yeni hədəf daha güclü Azərbaycan qurulmasıdır ki..."
Müasir İnkişaf Birliyinin sədri, siyasi şərhçi Mübariz Göyüşlü "Bakı-Xəbər"ə bildirdi ki, Azərbaycan Respublikasının, onun rəhbərliyinin, xalqının qarşında artıq yeni çağrışlar, yeni hədəflər var. "Çünki 2024-cü ilə qədər bizim bütün gücümüz, resurslarımız Qarabağın işğaldan azad olunması uğrunda sərf olunurdusa, əsas ideya və hədəfimiz bu məsələ idisə, onu birdəfəlik həll etdik. Bu ağır problemi kökündən həll edən bir dövlət, xalq olaraq yeni hədəflər, yeni çağırışlar uğrunda çalışmalar gerçəkləşdirməliyik. Yeni hədəf daha güclü Azərbaycanın qurulmasıdır ki, burada insan hüquq və azadlıqlarının müdafiəsi, vətəndaşların hüquqi-siyasi mədəniyyət səviyyəsinin yüksəldilməsi, sosial təminatın gücləndirilməsi, ictimai siyasi fəallalığın artırılması, mədəni dəyərlərin təbliği, gənclərin vətənpərvərlik ruhunda yetişməsi əsas hədəflərdir. Eyni zamanda yeni milli ideoloji istiqamətlərin yaradılması əsasdır. Biz düzdür, Qarabağ problemini həll edib torpaqlarımız üzərində suverenliyimizi tam bərpa etmişik. Amma Cənubi Qafqaz həssas bir regiondur, burada hər an gərginliklər ola bilər. Hələ də narahatedici məqamlar var. Bu bölgədə sülh və stabilliyi daimi etmək uğrunda çalışmalıyıq. Azərbaycanın qarşıdakı hədəfləri həm də bunlardır.
Düşünürəm ki, bizim Azərbaycan adına beynəlxalq açlışmaları genişləndirməyimizin məqamıdır. Fransanın yeni müstəmləkəçiliyə qarşı Azərbaycan çox qətiyyətli mübarizə aparır. Azərbaycan bir sıra qlobal problemlərin həllində aktivlik göstərir. Bütün bunlar təbii ki, ölkə daxilində sabit, stabil bir vəziyyət olmasından, ölkə daxilində olan güclü sosial təminatdan, vətəndaş həmrəyliyindən, siyasi mədəniyyətin daha da gücləndirilməsindən keçir" - deyə M.Göyüşlü qeyd etdi.
"Siyasi mədəniyyət ölkə və cəmiyyət üçün çox vacib məsələdir"
M.Göyüşlünün sözlərinə görə, Azərbaycan hökuməti ölkədə siyasi mədəniyyətin daha güclü müstəvidə inkişafı üçün bütün şəraitləri yaradıb. O, hesab edir ki, biz siyasi mədəniyyətin Azərbaycan təcrübəsini 7 fevral seçkilərində də aydın şəkildə gördük. "Siyasi mədəniyyət ölkə və cəmiyyət üçün çox vacib məsələdir.
Siyasi mədəniyyət həm də fərqli siyasi partiyalar və onları təmsil edən şəxslər arasında normal siyasi mübarizənin genişlənməsini ehtiva edir. Biz sonuncu prezident seçkilərində siyasi mədəniyyəti müşahidə edə bildik. Prezident İlham Əliyevin rəqibləri olan fərqli siyasi partiyaların liderləri, namizədlər yüksək siyasi mədəniyyət nümayiş etdirdilər. Biz bunu çıxışlarda, debatlarda aydın şəkildə gördük. Onların seçkidə qalib gələn Prezident İlham Əliyevi rəqib olaraq təbrik etmələri bir siyasi mədəniyyət göstəricisdir. Bu cür məsələlərin genişlənməsi lazımdır. Başqa bir məsələni də qeyd edək ki, ölkədə fəaliyyət göstərən siyasi partiyaların öz dövlətindən maliyə alması, yəni dövlət büdcəsindən maliyələşməsi də əhəmiyyətli məqamlardan biridir. Çünki siyasi institutların xaricdən deyil, milli donorlardan, dövlət büdcəsindən maliyələşməsi çox faydalıdır. Bu cür addımlar gələcəkdə siyasi partiyalarla yanaşı vətəndaş cəmiyyəti institutlarının da fəaliyyətini daha da genişləndirəcək. Çünki onlara dəstək məsələsi daim gündəmdədir. Hesab edir ki, bu Azərbaycan cəmiyyətini, Azərbaycan dövlətini daha da gücləndirən, irəliyə aparan mühüm amillər sırasında öndədir" - deyə M.Göyüşlü qeyd etdi.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
