Zaur Əliyev: "Xocalı soyqırımında iştirak edən hər bir cani Azərbaycan qanunları qarşısında cavab verməli olacaq"
1992-ci il fevralın 25-dən 26-na keçən gecə Ermənistan Silahlı Qüvvələri tərəfindən Xocalı şəhərinin işğalı zamanı azərbaycanlılara qarşı törədilən soyqırımdan 32 il ötür.
Bu faciənin 32-ci ildönümü artıq fərqli şəkildə anılır. Çünki bu gün torpaqlarımız işğaldan azaddır. Xocalı soyqırımı qurbanlarının, şəhidlərimizin qisası alınıb. 44 günlük Vətən müharibəsi Prezident, müzəffər Ali Baş Komandan İlham Əliyevin rəhbərliyi ilə Ordumuzun şanlı qələbəsi ilə yekunlaşıb. 2023-cü ilin sentyabrında antiterror tədbirləri nəticəsində Azərbaycan öz suverenliyini tam bərpa edib. Hərbçilərimiz böyük qəhrəmanlıq, şücaət və peşəkarlıq göstərərək, ağır relyef şəraitinə, düşmən mövqelərinin əlverişli yerlərdə yerləşdirilməsinə baxmayaraq, 23 saatdan az müddət ərzində separatçıları torpaqlarımızdan qovub.
Qeyd etdiyimiz kimi, Xocalı soyqırımı 32 ildən sonra fevralın 26-da ilk dəfə məhz Xocalının özündə anılır.
"Şəhidlərimizin ruhunu məhz azadlığına qovuşmuş Xocalıda anmaq xalqımıza qürur hissləri yaşadır"
Tarixçi alim, dosent Zaur Əliyev "Bakı-Xəbər"ə açıqlamasında qeyd etdi ki, Xocalı faciəsi hər bir azərbaycanlı üçün sağalmaz dərddir: "Kadrlara baxanda xocalılıların necə zülmlə öldürüldüyünü görmək olur. Bu gün Xocalıda Azərbaycan bayrağının dalğalanması, Prezident İlham Əliyevin ordan xalqa müraciəti, eyni zamanda, bu bölgədə bərpa quruculuq işlərinin davam etməsi ölkəmizin qüdrətindən xəbər verir. Azərbaycan Xocalı faciəsinin qisasını alıb. Biz xocalılıların qisasını aldıq. Ancaq onu da unutmaq lazım deyil ki, Xocalı hadisəsində iştirak edən şəxslərin bəzisi hələ də azadlıqdadır. Robert Koçaryan, Serj Sarkisyan, Vitali Balasanyan və 366-cı alayın tərkibində olan zabit və əsgərlər azadlıqdadır. Həmin soyqırımda iştirak edən şəxslərin bir qismi bu gün Ermənistanda vəzifədədir. Bu faktlar onu göstərir ki, biz caniləri tam cəzalandıra bilməmişik. Bu gün Azərbaycan həbsxanasında soyqırımda iştirak edən şəxslərin olması bizim üçün təsəllidir. Ümid edirəm ki, Xocalı soyqırımında iştirak edən hər bir cani Azərbaycan qanunları qarşısında cavab verməli olacaq".
Həmsöhbətimizin sözlərinə görə, Azərbaycan xalqı üçün Xocalı faciəsi sağalmaz yaradır. Xocalı soyqırımı zamanı insanlarımızın başına açılan min bir əzab-əziyyət bütün dünyaya məlumdur. Ümumiyyətlə, Xocalı soyqırımı təkcə Azərbaycan xalqına qarşı deyil, bütün bəşəriyyətə qarşı törədilmiş ən ağır cinayətlərdən biridir. Sevindirici haldır ki, Xocalı bu gün azaddır: "Vəhşicəsinə öldürülən və qeyri-ənənəvi üsulla basdırılan şəxslərin meyiti bu gün bərpa-quruculuq işləri zamanı aşkar olunur. İtkin düşən şəxslərlə bağlı Xocalıda abidə ucalacaq.
Xocalının qisasının alınması Azərbaycan xalqının qürur yeri, şərəf səhifəsidir. Xocalı soyqırımı qurbanları 32 ildən sonra fevralın 26-da ilk dəfə məhz Xocalının özündə anılır. Bu həm hüznlü, həm də qürurlu gündür. Biz həmin gün şəhidlərimizin xatirəsini anıb, onlara ömür boyu minnətdarlıq borcumuzu bir daha ifadə edəcəyik. Şəhidlərimizin ruhunu məhz azadlığına qovuşmuş Xocalıda anmaq xalqımıza qürur hissləri yaşadır".
Günel CƏLİLOVA
