ABŞ Senatı prezident Co Baydeni İranın neft infrastrukturuna hücum etməyə çağırıb. Senatorlar, həmçinin, 2024-cü ildə ABŞ və İran arasında baş verəcək müharibədən də danışıblar.
Respublikaçı senator Lindsey Qraham deyir ki, İran və ABŞ arasında müharibə 2024-cü ildə başlayacaq: "İran və ABŞ arasında müharibə bu il başlayacaq, çünki İran tezliklə İsrailə hücum etmək üçün atom bombası yaradacaq".
Sonda Qraham Amerika liderini İranın neft infrastrukturuna hücum etməyə çağırıb: "Əgər siz İranın neft infrastrukturuna hücum etməsəniz, onların pul kisəsini vurmasanız və sizdən qorxmasalar, onlar bizim əsgərlərimizə hücum etməyə davam edəcəklər". Bu durumda Tehran da xəbərdarlıq edib ki, İranın neft infrastrukturuna və Yaxın Şərqdəki gəmilərinə hücumlar olarsa, ölkə ABŞ-a qarşı müharibəyə başlayacaq. Bundan əvvəl ABŞ İraq və Suriyadakı SEPAH hərbi bazalarına hücum edib. "Associated Press" agentliyinin Ağ Evdəki mənbələri bildirir ki, Tehran özünün "Bekhshad" və "Saviz" gəmilərinə hücumu İran ərazisinə zərbə kimi qiymətləndirə bilər. Eyni zamanda, ABŞ bu gəmiləri təhlükə hesab edir. Pentaqonun məlumatına görə, "Behshad" və "Saviz" gəmiləri yəmənli husilərin Qırmızı dənizdə hücumlarının koordinasiyasında iştirak edib. Xatırladaq ki, fevralın 2-dən 3-nə keçən gecə Amerika hərbi qüvvələri İraq və Suriyada SEPAH və bir sıra iranyönlü təşkilatların mövqelərinə hücum edib. Bu, İordaniyada üç ABŞ əsgərinin ölümünə görə qisas idi. Vaşinqton raket zərbələrini davam etdirəcəklərini qeyd edib. Məhz belə bir vaxtda İranın Suriyada himayə etdiyi silahlı qruplaşmalar Birləşmiş Ştatlar və onun müttəfiqlərini yenidən hədəf alırlar. ABŞ hərbi rəsmiləri bildiriblər ki, Birləşmiş Ştatlar və koalisiya qüvvələrinin şərqi Suriyadakı Missiyaya Dəstək Fərat Məkanı bazasına bir raket atılıb. Son üç hücum Birləşmiş Ştatların İraq və Suriya boyu 85 hədəfə zərbələr endirməsindən sonra baş verib. Yarım saat içərisində ABŞ qüvvələri 125 dəqiq təyinatlı bomba ilə militant mövqelərini vurublar. Vaşinqton rəsmiləri deyir ki, məqsəd idarə-nəzarət mərkəzlərini, dron və raket anbarlarını və digər mühüm obyektlərini sıradan çıxarmaqla militant qruplaşmaların döyüş imkanlarını məhdudlaşdırmaqdır. ABŞ xəbərdarlıq edib ki, əlavə zərbələr endiriləcək. ABŞ-ın müdafiə naziri Lloyd Austin Birləşmiş Ştatların Yaxın Şərqdə ABŞ qüvvələrinə qarşı oktyabrın ortalarından başlayaraq 165-dən çox hücuma daha sərt cavab vermək üçün əlavə addımlar atılacağını bildirib. Austin də ABŞ-ın çox sayda hərbi zərbələri ehtiva edən bir neçə mərhələli cavab üzərində işlədiyini deyib. ABŞ prezidenti Co Bayden həm İraqda, həm də Suriyada İranın personalı və obyektləri daxil olan hədəflərə bir neçə gün ərzində zərbələr endirmək planlarını təsdiqləyib. ABŞ Ordusu Mərkəzi Komandanlığının rəhbəri Maykl Erik Kurila bildirib ki, Sepahın "Qüds" qanadı və onunla əlaqəli olan silahlı qruplar region, o cümlədən amerikalıların təhlükəsizliyinə birbaşa təhdiddir.
Milli Təhlükəsizlik Şurasının sözçüsü Con Kirbi deyib ki, yeni hərbi zərbələr endirməkdə məqsəd ABŞ-ın qruplaşmaların Amerika ordusuna və obyektlərinə hücum etmək imkanlarının azalmasını təmin etmək, eyni zamanda onların himayədarı - İran İslam İnqilabı Keşikçiləri Korpusuna güclü siqnal göndərməkdir: "Prezident qoşunlarımızı və obyektlərimizi, milli təhlükəsizliyimizi və regiondakı maraqlarımızı qorumaq üçün əlindən gələni edəcək". Birləşmiş Ştatlar Prezidentinin milli təhlükəsizlik məsələləri üzrə müşaviri Ceyk Sallivan isə "NBC News"a müsahibəsində vurğulayıb ki, Birləşmiş Ştatlar Suriya, İraq və Yəməndəki hazırkı bombardmanlarla kifayətlənməyəcək və İordaniyadakı qüvvələrinə qarşı hücuma cavab olaraq əlavə zərbələr endirmək niyyətindədir. London bütün istiqamətlərdə Vaşinqtonu dəstəkləyir. Britaniyanın xarici işlər naziri Devid Kemeron "Sunday Times" qəzetinə müsahibəsində iranlı həmkarı Hüseyn Əmir Abdullahianla söhbətinin təfərrüatını açıqlayıb: "Mən ona dedim ki, proksi qüvvələr sizə bağlıdır, siz onlardan boyun qaçıra bilməzsiniz. Siz onları yaratdınız, dəstəklədiniz və nəhayət onların etdiklərinə görə cavab verəcəksiniz". İran hərbi qüdrətinə görə ABŞ-la müqayisə oluna bilməz. Hesab olunur ki, amerikalılar hələlik İranın etibarlı qüvvələrinə qarşı hücumlara fokuslanacaqlar. Bunlar təkcə "Hizbullah" və Husilər deyil, həm də Yaxın Şərqin müxtəlif ölkələrində Amerikanın regiondakı mövqelərinə hücum etməyə hazır olan kiçik qruplardır. Amma vəziyyətin hər an nəzarətdən çıxıb genişmiqyaslı savaşa çevrilmə ehtimalı da artır. Tehranı zəiflətmək üçün əsas amil xaricdəki "müqavimət hərəkatları"nın neytrallaşdırılmasıdır. Bu, İranın Yaxın Şərqdə əl-qolunun bağlanması ilə nəticələnəcək. Buna paralel olaraq, İranın strateji obyektlərinə, o cümlədən neft emalı, hərbi zavodlarına, nüvə təsisatlarına qarşı hibrid müharibə taktikasında hücumlar da gözlənilir. Elə bu da böyük savaşın başlanğıcı ola bilər.
Nahid SALAYEV
