Məhəmməd Əsədullazadə: "İrəvana dəstək verirlər ki, bu ölkə sanksiyalardan yayınmaq hesabına toparlansın"
Məlum olduğu kimi, Rusiyanın Ukraynaya hücumu ilə əlaqədar bu ölkəyə qarşı çoxsaylı sanksiyalar tətbiq olunur. Söhbət Qərbin sanksiyalarından gedir. Ancaq hər zaman olduğu kimi, Qərb Ermənistanın sanksiyalardan yayınmasını görməzdən gəlir.
Məsələn, ötən il Ermənistanın xarici ticarət dövriyyəsi 20.7 milyard dollar olub. Bu, 2022-ci illə müqayisədə 46 faiz artım deməkdir. 2023-cü ildə Ermənistanın ixracı 55 faiz, idxalı isə 40 faiz yüksəlib. Ermənistanın sırf Rusiyaya ixracındakı artımsa 60 faizə yaxındır. Məsələ ondadır ki, Ermənistan Rusiyadan gətirdiyi bəzi məhsulları yenidən digər ölkələrə ixrac edir. Eyni zamanda, Ermənistan xaricdən gətirdiyi bəzi məhsulları təkrar Rusiyaya ixrac edir. Burada təəccüb doğuran məqam odur ki, Qərb Türkiyəni sanksiyalardan yayınmaqda günahlandırır, banklarını Rusiya ilə maliyyə əməliyyatları aparmasını dayandırmağa məcbur edir. Bəs Ermənistanı niyə görməzdən gəlir?
"Ermənistanda son 2 il ərzində əhəmiyyətli iqtisadi artım sanksiyalardan yayınma hesabına olub"
Sözügedən məsələni "Bakı-Xəbər"ə şərh edən politoloq Məhəmməd Əsədullazadə bunu bir sıra amillərlə əlaqələndirdi: "Əfsuslar olsun ki, Qərbin Ermənistana münasibətdə loyal siyasətini görürük. Onlar çalışır ki, Cənubi Qafqazda Ermənistana ciddi şəkildə dəstək versinlər. Qərbdəki erməni lobbisinin də bunda rolu az deyil. Ermənistan bu gün əsasən Rusiya hesabına iqtisadi inkişafa nail ola bilib. Təbii ki, bu da Rusiyaya qarşı sanksiyalar hesabına və bunun nəticəsində Ermənistanda fəaliyyət göstərən erməni şirkətləri sayəsində mümkün olub. Ermənistanda son 2 il ərzində əhəmiyyətli iqtisadi artım sanksiyalardan yayınma hesabına olub. Təbii ki, bütün bunları Qərbdəki mərkəzlər bizdən də yaxşı bilirlər. Yaxşı bilirlər ki, Ermənistan qadağan olunan məhsulları Rusiyaya ötürür. Sadəcə, marağında deyillər ki, buna görə Ermənistanı cəzalandırsınlar. Maraqlıdılar ki, Ermənistan iqtisadi baxımdan bundan qazansın və Cənubi Qafqazda mövqelərini möhkəmləndirsin. Mövzu Türkiyə olduqda isə o dəqiqə buna reaksiya verib qərəzli mövqe ortaya qoyurlar. Türkiyənin Rusiya ilə birgə regionda fəaliyyəti Ankaranın milli maraqlarına cavab verir. Bu, Türkiyəni müəyyən bir geosiyasi üstünlüyə gətirib çıxarıb. O üzdən, burada ikili standartlar və qərəz var. Ermənistana dəstək verirlər ki, bu ölkə sanksiyalardan yayınmaq hesabına toparlansın. Ancaq Türkiyəyə gəldikdə o dəqiqə bu ölkəni sanksiyalardan yayınmaqda günahlandırırlar. Məqsədləri odur ki, Türkiyəni Rusiya ilə qarşıdurmaya sövq etsinlər. O üzdən, sanksiyaları bəhanə edib Türkiyəni hədəf alırlar. Türkiyənin regionda və dünyada artan rolu Qərbdə qısqanclıqla qarşılanır. Hesab edirəm ki, nə qədər təzyiqlər olsa da, Türkiyə Rusiyaya qarşı sanksiyalara qoşulmayacaq".
Vidadi ORDAHALLI
