Azərbaycanın işğaldan azad edilən ərazilərinə Böyük Qayıdış prosesi göstərir ki, keçmiş məcburi köçkünlər öz doğma torpaqlarına böyük həvəslə, sevgi ilə qayıdırlar. Torpaqlarımız işğaldan azad edildikdən sonra o ərazilərdə geniş tikinti quruculuq işlərinə start verildi, orada neçə-neçə yaşayış məntəqəsi, kəndi insan edildi, hazırda həmin ərazilərdə məskunlaşdırma həyata keçirilib.
Öz doğma yurdlarında yaşamaq üçün onlara hər cür şərait yaradılıb. Bu gün azad ərazilərdə sözün əsl mənasında həyat dirçəlib və insanlar böyük ruh yüksəkliyi ilə həyatlarını davam etdirirlər.
Azərbaycan dövlətinin və cəmiyyətinin həyatında mühüm hadisə olan 7 fevral növbədənkənar Prezident seçkilərinin azad ərazilərdə keçirilməsi üçün bütün lazımı şərait yaradılıb.
Yayılan məlumata görə, Ombudsman Səbinə Əliyeva Xankəndi, Şuşa və Laçında seçki məntəqələrində yaradılan şəraitlə tanış olub və şəraiti yüksək qiymətləndirib.
Məlum olduğu kimi, işğaldan azad olunmuş ərazilərdə seçici fəallığı çox yüksəkdir. Hər kəs seçkilərdə iştirak edib səsverməyə maraq göstərir. Müsbət hadisələrdən biri odur ki, keçmiş məcburi köçkünlər ilk dəfə öz yer-yurdlarında səs verəcəklər.
Heç şübhəsiz, böyük qayıdışın nümunələrindən biri 7 fevralda onların səs verməsidir. Azad rayonlarda seçicilərin məntəqələrə gəlib öz iradələrini ifadə etməsi önəmli faktordur.
Hansı rayon üzrə nə qədər seçici səs verir...
Artıq hansı azad rayonda nə qədər əhalinin səs verəcəyi açıqlanıb. Rəsmi məlumata görə,
Füzuli şəhərində daimi məskunlaşan seçicilərdən 1292 nəfəri doğma yurdunda ilk dəfə səs verəcək. Suqovuşanda yaradılmış 58 saylı seçki məntəqəsində 162 nəfər seçici qeydə alınıb.
Laçın şəhərində yaradılan seçki məntəqəsində 1464 seçici qeydiyyata alınıb.
Şuşa şəhərindəki 105 saylı seçki məntəqəsində 1189 nəfər səsvermə hüququndan istifadə edəcək. Bir neçə gün əvvəl açıqlanmışdır ki, Hadrutda yerləşən 108 saylı seçki məntəqəsi səsvermə prosesinə tam hazırdır, Hadrut sakinləri bu gün orada səs verəcəklər.
Burada maraqlı məqamlardan biri də seçicilərin yaşı ilə bağlıdır. Məsələn, 123 saylı Kəlbəcər seçki dairəsi üzrə 10 seçicinin yaşı 100-dən yuxarıdır.
Bu gün Xankəndidə, Laçında, Kəlbəcərdə, Şuşada, Füzulidə, Zəngilanda və digər azad rayon və kəndlərimizdə keçmiş məcburi köçkünlər seçkiyə çox böyük maraq göstərirlər, seçici fəallığı yüksəkdir. Bunu onların mətbuata verdikləri açıqlamalardan da görmək olur.
Tarixi hadisə, Zəfər seçkisinin təntənəsi...
Əksər ekspertlər qeyd edir ki, keçmiş məcburi köçkünlərin öz ata-baba yurdlarında seçkilərə qatılması tarixi hadisədir.
Məsələn, Sumqayıt Dövlət Universitetinin baş müəllimi, Azərbaycan Yazıçılar Birliyinin üzvü Əli Rzazadə seçki-2024.az-a "Elə bir tarixi dönəmi yaşayırıq ki, bu gün beynəlxalq aləmin diqqəti dünya miqyasında sürətlə irəliləyən ölkələr sırasında ilk yerlərdən birini tutan Azərbaycana istiqamətlənib" - deyib.
Onun sözlərinə görə, uzun illər həsrətində olduğumuz tarixi torpaqlarımızın sakinləri, artıq digər bölgələrdə deyil, öz ata-baba yurdlarında seçkilərə qatılmaqla öz gələcəklərinə səs verəcəklər. "Bu, tarixi hadisədir. Seçki gününü - fevralın 7-ni hər bir Azərbaycan vətəndaşı sevinc və fərəh hissi ilə gözləyir və hər bir azərbaycanlı əmindir ki, ölkəmizdə bütün sahələrdə gözəçarpan, davamlı və iti addımlarla aparılan inkişaf tendensiyası keyfiyyətcə yeni mərhələyə qədəm qoymaqdadır", - deyə o vurğulayıb.
Ə.Rzazadə xatırladıb ki, Azərbaycanın 44 günlük Vətən müharibəsində qazandığı şanlı Zəfərdən sonra artıq dünyanın böyük gücləri heç kimdən asılı olmayan, öz iqtisadi və siyasi gücünə arxalanan güclü Azərbaycanla hesablaşma dönəminə qədəm qoyub: "Məhz bu faktoru Azərbaycanın həm də dünya siyasi arenasında böyük zəfəri hesab etmək olar.
"Tək əldən səs çıxmaz" prinsipini nəzərə alaraq, hamımız qarşıda duran bütün sosial proqramların, inkişaf planlarının uğurla icra edilməsi üçün bir yumruq şəkilində birləşməli, bu tarixi seçkilərdə həmrəylik nümayiş etdirməli, milli inkişafa təkan vermək üçün eyni hədəfə vurmalıyıq. Bu hədəfə doğru atılan ilk addım isə seçkilərə qatılmaqdan başlayır.
Uzun illər həsrətində olduğumuz tarixi torpaqlarımızın sakinləri, artıq digər bölgələrdə deyil, öz ata-baba yurdlarında seçkilərə qatılmaqla öz gələcəklərinə səs verəcəklər. Bu, tarixi hadisədir. Seçki gününü - fevralın 7-ni hər bir Azərbaycan vətəndaşı sevinc və fərəh hissi ilə gözləyir və hər bir azərbaycanlı əmindir ki, ölkəmizdə bütün sahələrdə gözəçarpan, davamlı və iti addımlarla aparılan inkişaf tendensiyası keyfiyyətcə yeni mərhələyə qədəm qoymaqdadır".
"Bu gün keçmiş məcburi köçkünlərin öz doğma yurdlarında səs verməsi mühüm hadisədir"
Müasir İnkişaf Birliyinin sədri Mübariz Göyüşlü "Bakı-Xəbər"ə şərhində bildirdi ki, azad rayonlarda səs verənlər çox xoşbəxtdirlər. "Bu gün keçmiş məcburi köçkünlərin öz doğma yurdlarında səs verməsi mühüm hadisədir.
Hesab edirəm ki, biz 4-5 il əvvəl hadisələri, bu cür möhtəşəm anları yaşayacağımızı bəlkə də təsəvvür edə bilməzdik. Biz deyirdik ki, bir rayonu, yaxud bir kəndi, bir qəsəbəni işğaldan azad edə bilsəydik çox xoşbəxt olardıq. Amma bütöv Qarabağı azad etmişik. Biz Xankəndinin azadlığını yaşayırıq, separatçı qrupu, Azərbaycanın bətnində yer etmiş bu xərcəng şişini məhv etdik. Bu gün yalnız torpaqlarımızın ərazi bütövlüyünün, suverenliyinin təmin edilməsinin sevincini yaşamırıq, həm də orada quruculuq-abadlıq işlərinin şahidi oluruq, ora qayıtmağın sevincini yaşayırıq. Bütün bunlarla yanaşı biz orada prezident seçkisi keçiririk, ellikcə səs veririk. Artıq hansı azad rayonda seçkiyə hansı sayda seçicinin qatıldığı barədə statistika verilib. Bundan gözəl nə xəbər ola bilər ki? Bu cür möhtəşəm nəticələrlə daxili və xarici düşmənlərimizə, ermənilərə və onların havadarlarına mesaj veririk ki, biz torpağımızın yiyəsiyik, dövlərimizin sahibiyik. Onlara çatdırırıq, o əraziləri azad edə bilirik, oranı abadlaşdıra, tikib qura, qayıda və seçki də keçirə bilirik. Bu seçkilər bizə qarşı birləşən çoxsaylı düşmənə verilən gözəl cavabımızdır.
Təsəvvür edin ki, 7 fevral seçkilərində necə böyük fəallıq var, seçicilər necə böyük həvəslə səsvermədə iştirak edirlər. Bu çox mühüm hadisədir. Əslində, bununla bir daha sübut edirik ki, o insanlar öz doğma evlərində əbədi yaşayacaqlar, sülh və rifah içində öz həyatlarını sürdürəcəklər" - deyə M.Göyüşlü qeyd etdi.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
