Abutalıb Səmədov: "Şübhəm yoxdur ki, eyni məsələ seçkilərdən sonra səsə qoyulanda, o deputatların böyük əksəriyyəti onun lehinə, yəni seçkinin qeyri-demokratik keçirildiyinə səs verəcək"
Rusiyada keçiriləcək prezident seçkilərinin nəticələrinin tanınmaması çağırışı Avropa Parlamentinin cəmi 29 üzvü tərəfindən dəstəklənib.
Müvafiq müraciət Rusiya Federasiyasının yeni regionlarında seçkilərin keçirilməsinin "demokratiya prinsiplərinə zidd" olduğunu bildirən Estoniya parlamentinin deputatı Riho Terras tərəfindən irəli sürülüb. Sənədi Baltikyanı ölkələr, Macarıstan, Finlandiya, Polşa, Çexiya, İsveç və s.-nin parlamentariləri də imzalayıblar. Ümumilikdə Avropa Parlamenti 705 deputatdan ibarətdir.
Daha sonra müraciət Avropa Komissiyasının sədri Ursula fon der Lyayen, Avropa Şurasının prezidenti Şarl Mişel və Aİ-nin xarici siyasət xidmətinin rəhbəri Xosep Borrelə göndəriləcək.
Rusiya Federasiyasında növbəti prezident seçkiləri 2024-cü il martın 15, 16 və 17-nə təyin edilib. Seçkidə yeni regionların - DXR və LPR, Zaporojye və Xerson vilayətlərinin sakinləri iştirak edə biləcək. Rusiya Federasiyasının prezident seçkilərində ilk dəfə olaraq məsafədən elektron səsvermə mexanizmindən istifadə olunacaq. Bu imkan ölkənin 29 rayonunun sakinlərinə təqdim olunacaq. 2024-cü il yanvarın 1-nə Rusiya seçicilərinin ümumi sayı 112,309 milyon nəfər olub. Bu məlumat ilk dəfə olaraq Rusiyanın dörd yeni subyektində yaşayan seçicilər nəzərə alınmaqla təqdim edilir, MSK-nın bundan əvvəl verdiyi məlumatda deyilir.
Məntiqlə, Avropa Parlamentinin əksər deputatları Rusiyanın əleyinə olan sənədə səs verməliydi. Ancaq biz tam fərqli mənzərəni görürük.
Belə maraqlı göstərici, 705 deputatdan cəmi 29 nəfərin Rusiyanın maraqlarına zidd olan qətnaməyə imza atması nəyin göstəricisi sayıla bilər?
Müstəqil siyasətçi Abutalıb Səmədov "Bakı-Xəbər"ə açıqlamasənda bildirdi ki, Avropa strukturlarında qəribə bir praktika yaranıb: "Öz maraqlarına uyğun olaraq, müəyyən dövlətlərdə keçirilən seçkilər haqqında rəy əvvəlcədən formalaşdırılır, əvvəlcədən hesabat hazırlanır, seçkilər bitməmiş onun haqqında artıq mənfi hesabat ortaya çıxır. Son illərdə bu geniş yayılmış praktikadır və biz bunun dəfələrlə şahidi olmuşuq. Ancaq hesabatlar əvvəlcədən hazırlansa da, müəyyən Avropa qurumlarının, Qərb dövlətlərinin bəzilərinin seçkilər barədə hesabat hazırlaması məlum olsa da, heç olmasa seçkinin sonunu gözləyirdilər, əvvəlcədən hazırlanmış hesabatı seçki başa çatdıqdan sonra ictimaiyyətə təqdim edirdilər. Biz də yaxşı bilirdik ki, bu əvvəlcədən hazırlanıb və seçkilərin necə keçirilməsindən asılı olmayaraq, onların rəyi dəyişə bilməz. Seçkilər ciddi pozğunluqlarla keçirilib, demokratik birlik, bərabərlik gözlənilməyib. Ancaq son dövrdə bunu da gözləmirlər. Bəzən 6 ay əvvəldən seçkiqabağı kampaniya başlamamış seçkiləri qeyri - demokratik elan edirlər. Avropa Parlamentinin Rusiyadakı prezident seçkiləri ilə bağlı məlum qərarı buna misal ola bilər. İndi də hələ seçkilər bitməyib. Təbii ki, Rusiyada ciddi problemlər var. Müxalifət ölkə xaricindədir. Orada demokratik seçkilərin keçirilməsi mümkünsüzdür. Hamı bilir ki, Putinin ölkə daxilində rəqibi yoxdur. Seçkilərə isə hələ ay yarımdan artıq vaxt qalıb. Bunu gözləmək lazımdır. Həmin o səsvermədə də deputatlar bunu nəzərə alıb, qətnamənin əleyhinə səs veriblər. Ancaq şübhəm yoxdur ki, eyni məsələ seçkilərdən sonra səsə qoyulanda, o deputatların böyük əksəriyyəti lehinə, yəni seçkinin qeyri-demokratik keçirildiyinə səs verəcəklər. Ən azından müəyyən məsələlər gözlənilməlidir, insanlar ayıb bilməlidirlər. Seçki başa çatdıqdan sonra onun haqqında rəy ortaya qoymaq olar. Mən hesab edirəm ki, deputatların böyük əksəriyyətinin bu qətnamənin əleyhinə səs verməsinin kökündə də bu amil dayanır. Eyni münasibət Azərbaycana da göstərilir. Rusiyadan fərqli olaraq, Azərbaycanda müxalifətin seçkidə iştirakı üçün hər cür şərait yaradıldı. Dəfələrlə müraciət olundu, müxalifət seçkiyə dəvət edildi. Amma gəlmək istəmədilər. Səbəb də aydındır. Ortaya qoyulacaq səviyyə yoxdur və bir bəhanələri var, o da qəfil seçkilərdir. Bu adamlar anlaya bilmirlər ki, demokratik dövlətlərdə seçkilər adətən növbədənkənar keçirilir. Hakimiyyətdə olan partiya da seçkini udmaq üçün onu ən əlverişli məqamda təyin edir. Ona görə də, Azərbaycanda normal seçkilərin keçirilməsi üçün hər bir şərait olsa da, müxalifət öz şansının olmadığını düşünərək, qəfil seçki bəhanəsi ilə seçkilərdən imtina etdi. Rusiyada isə vəziyyət tam başqadır. Rusiya müharibə aparır, müxalifət ölkə kənarındadır, yaxud həbsdədir. Bu vəziyyətdə orada demokratik seçkilerin keçirilməsi, keçirilsə belə, Rusiya cəmiyyətinin Putinin rəqibinə səs verməsi mümkünsüzdür".
Məhəmmədəli QƏRİBLİ
