Faiq Ələkbərli: "Fransa repressiyanı, müstəmləkəçilik siyasətini dayandırmasa, korsikalılar da, Yeni kaledoniyalılar da öz mühacir hökumətlərini Bakıda elan edə bilərlər"
Tarixdə zülmkar və böyük müstəmləkə imperiyası kimi adı keçən Fransa, təəssüflər olsun ki, bu "mirası" XXI əsrə qədər daşıyıb gətirib. Bu gün Fransa müstəmləkəçilik siyasətindən, səlibçi zehniyyətdən xilas ola bilməyib və onun bu cinayətkar əməlindən milyonlarla insan zərər çəkir.
Bilirik ki, Fransa müstəmləkəsi olan Korsikada, Yeni Kaledoniyada və başqa müstəmləkələrdə insanlar ayağa qalxıb müstəqillik uğrunda mübarizə aparırlar. Aydın görsənir ki, Korsikada, Yeni Kaledoniyada və digər Fransa müstəmləkələrində müstəqillik uğrunda mübarizə güclənir. Eyni zamanda Fransanın polis repressiyaları da güclənir. Fransa müstəmləkələrində azadlıq hərəkatını dəstəkləmək üçün Qoşulmama Hərəkatı çərçivəsində Bakı Təşəbbüs Qrupu deyilən qrup yaranıb və müstəmləkələri dəstəkləyir, onların haqlı mübarizəsini dünyaya yayır, hüquqlarını müdafiə edir.
Fransa zülmünə qarşı mübarizə aparan xalqların Bakıda müstəqil mühacir hökumətləri yarana bilərmi? Azərbaycan onları dəstəkləyə bilərmi?
"Azərbaycan həmin xalqlara onlar öz azadlıqlarına qovuşana qədər dəstək verməlidir, verir də"
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər"ə bildirdi ki, Fransanın son əsrlərdə yürütdüyü müstəmləkəçilik siyasəti bütün dünyaya məlumdur: "Xüsusilə də son əsrlərdə Fransa Afrikada, eyni zamanda Asiyanın bəzi bölgələrində, hətta Avropanın özündə belə işğalçılıq siyasəti yürüdüb və bir sıra ərazilərdə müstəmləkəçiliyin əsasını qoyub. İndi Polineziya, Yeni Kaledoniya, Korsika kimi Fransa müstəmləkələri azad olmaq istəyir. Fransanın müstəmləkəsi olan bəzi ölkələr keçən dövrlərdə azadlığına qovuşub, bu gün Korisika, Yeni Kaledoniya və başqa müstəmləkələr də azad olmaq istəyir. Onların da azadlığa qovuşması üçün proseslər gedir. Orada xalq artıq Fransız işğalını qəbul etmir və öz müstəqilliklərini, azadlıqlarını başqa bir mərhələyə daşıyırlar. Fransanın işğalçılıq siyasəti daha vəhşi hal alıb. Bilirik ki, son günlər azadlıq, müstəqillik tələb edən korsikalılara, Yeni kalendoliyalılara qarşı polis represiyası güclü böyük şəkil alıb".
F.Ələkbərlinin sözlərinə görə, Azərbaycan dövləti fransız müstəmləkəçiliyinə qarşı mübarizə aparan bu xalqları dəstəkləyir. Bu istiqamətdə Bakı Təşəbbüs Qrupunun ayrıca rolu olduğunu deyən F.Ələkbərli vurğuladı ki, bu qrup Azərbaycanın sədrlik etdiyi Qoşulmama Hərəkatının Əlaqələndirmə Bürosunun nazirlər toplantısı çərçivəsində 6 iyul 2023-cü ildə Bakıda "Müstəmləkəçiliyin tamamilə aradan qaldırılmasına doğru" adlı konfransın iştirakçıları tərəfindən yaradılıb. "Bakı Təşəbbüs Qrupunun Fransa müstəmləkəçiliyindən əziyyət çəkən, fransız polisi tərəfindən əzilən, represiyaya məruz qalan korsikalılara və digərlərinə dəstək göstərməsi müsbət haldır. Bakı Təşəbbüs Qrupu XXI əsrdə hələ də müstəmləkəçilikdən əziyyət çəkən dünyanın müxtəlif bölgələrində yerləşən xalqların azadlıq uğrunda apardıqları mübarizəyə dəstək verir. Onların azadlıq və müstəqillik hüquqlarının bərpa olunması əsas məsələdir. Fransa müstəmləkəçiliyinə, zülmünə qarşı mübarizə aparan azadlıqsevər xalqların rəsmi Bakı tərəfindən dəstəklənməsi onlara böyük ümid verir. Qoşulmama Hərəkatının da bu prosesə qoşulması olduqca tədirəlayiq haldır.
Bilirsiz ki, 2024-cü il yanvarın 28-də Korsikada 700-ə yaxın insan müstəqillik uğrunda mübarizə aparan strukturları və fəalları birləşdirən, Fransa müstəmləkə hökmranlığına qarşı mübarizəyə sadiqliyini təsdiqləyən yeni "Nazione" hərəkatını təsis edib. Onu da deyək ki, bu günlərdə Milli Məclisdə yaradılmış Korsika xalqına dəstək qrupu bu barədə bəyanat yayıb. Bəyanatda azadlıqsevər Korsika xalqına dəstək nümayiş olunub və eyni zamanda Fransa hüquq-mühafizə orqanlarının Korsikada müstəqillik tərəfdarlarına qarşı apardığı qeyri-qanuni hərəkətlərin qətiyyətlə pisləndiyi vurğulanıb.
Əlbəttə, irəliləyən dövrdə Bakı fransız müstəmləkəçiliyinə qarşı mübarizə aparan xalqların mühacir hökumətlərinin yaranması mərkəzinə də çevrilə bilər. Onlar buna çox yaxındır. Çünki rəsmi Bakı Fransa işğalına, müstəmləkəçiliyinə qarşı mübarizə aparan xalqlara hər cür dəstək olmağa hazır olduğunu göstərir. Azərbaycan həmin xalqlara onlar öz azadlıqlarına qovuşana qədər dəstək də verməlidir, verir də. Hesab edirəm ki, Fransa repressiyanı, müstəmləkəçilik siyasətini dayandırmasa, korsikalılar da, Yeni kaledoniyalılar da öz mühacir hökumətlərini Bakıda elan edə bilərlər" - deyə F.Ələkbərli qeyd etdi.
F.Ələkbərli bildirdi ki, Azərbaycan uzun illər Çar Rusiyasının və Sovet impersiyasının müstəmləkəçilik siyasətindən əziyyət çəkib, biz XX əsrdə iki dəfə azadlığımıza, müstəqilliyimizə qovuşmuşuq: "Bu mənada biz onların yanında yer ala bilərik, almalıyıq da. Məncə, rəsmi Bakı onlara siyasi dəstək də verə bilər. Azərbaycanın fransız müstəmləkəçiliyindən əziyyət çəkən azadlıqsevər xalqlara dəstək verməsi dünya tarixinə düşəcək bir hadisədir".
İradə SARIYEVA
