Məhərrəm Zülfüqarlı: "Bu qurum daha çox Birləşmiş Ştatların təsiri altında fəaliyyət göstərir"
ATƏT-in Demokratik Təsisatlar və İnsan Haqları Bürosu məntəqələrdə səsvermə prosesinin təşkili ilə bağlı münasibətini bildirib. Münasibətdə qeyd edilir ki, 7 fevralda Azərbaycanda keçiriləcək prezident seçkiləri ilə bağlı işlər yaxşı təşkil olunub.
İlkin reaksiyalar ATƏT-in son hesabatda obyektiv olacağına nə qədər zəmanət verir? Nəzərə almaq lazımdır ki, Avropa Şurası Parlament Assambleyası ATƏT-in missiyasının işinə mənfi təsir göstərmək üçün çox çalışır. Çünki AŞPA-da Azərbaycan nümayəndə heyətinin səlahiyyətlərinin məhdudlaşdırılması ilə bağlı müzakirələrin təşəbbüskarı olan almaniyalı deputat Frank Şvabe bu günlərdə deyib ki, Azərbaycan seçkiləri müşahidə etmək üçün AŞPA-nı deyil, ATƏT DTİHB-ni dəvət edib. Onun fikrincə, ATƏT DTİHB AŞPA missiyasının iştirakı olmadan seçkiləri müşahidə etməyə razı olmamalıdır. Görünən odur ki, AŞPA ATƏT-ə bu yöndə təsir göstərməyə çalışır. Maraqlıdır, alınacaqmı?
"Düşünmürəm ki, ATƏT DTİHB AŞPA-nın istəklərinə görə geri addım atsın"
Məsələ ilə bağlı "Bakı-Xəbər"ə açıqlama verən AVCİYA-nın vitse-prezidenti, professor Məhərrəm Zülfüqarlı buna bir neçə aspektdən yanaşdı: "ATƏT DTİHB Azərbaycanda keçirilən seçkiləri müşahidə edib. Bu prosesdə biləvasitə iştirak edən şəxs olaraq hesab edirəm ki, ATƏT DTİHB Avropa İttifaqı, Avropa Şurası və digər qurumların müşahidəçilərindən fərqli olaraq seçkilərə rəy bildirib. Avropada bir sıra qurumlar var ki, ABŞ orada iştirak etmir. Məsələn, Avroittifaqda, Avropa Şurasında ABŞ yoxdur. Ancaq bunlardan fərqli olaraq, ATƏT-də ABŞ biləvasitə var. ATƏT DTİHB də, demək olar ki, daha çox Birləşmiş Ştatların təsiri altında fəaliyyət göstərir. Məsələn, biz əvvəlki seçkilərə baxsaq görərik ki, Avropa Şurası, Avropa İttifaqı seçkilərə daha müsbət münasibət bəsləyib, amma ATƏT DTİHB isə onlara nisbətən daha sərt münasibət bildirib. Bu ilki seçkilərdə AŞPA müşahidəçi kimi iştirak etmir. Azərbaycan-AŞPA münasibətləri də aydındır. AŞ-də gedən indiki proseslərin ATƏT DTİHB-yə təsirinə gəldikdə bununla bağlı konkret nəsə demək çətindir. Ancaq fikrimcə, əvvəllər Avropa Şurasının ATƏT DTİHB-yə təsiri yox idi. Çünki AŞ-nin rəyi daha müsbət olurdu, nəinki ATƏT DTİHB-nin rəyi. Ancaq bu dəfə ATƏT DTİHB öz münasibətini bildirərkən AŞ-nin rəyini nəzərə ala bilər. Lakin düşünmürəm ki, ATƏT DTİHB AŞPA-nın istəklərinə görə geri addım atsın. Yəni müşahidəçilikdən imtina etsin. Azərbaycandakı seçkilərin tarixi göstərir ki, bir sıra hallarda beynəlxalq qurumların seçki ilə bağlı münasibəti əvvəldən hazır olur. Qabaqcadan təlimatlar gəlir ki, münasibət bu cür olmalıdır. Buna etiraz edən ekspertlər olub və bu da həmin qurumun obyektivliyini şübhə altına alıb. İndiki dövrdə hələ ki, bunlar prosesə ilkin münasibət bildirirlər. Hətta bunların bir eksperti də deport olunub. Yəni öz münasibətinə görə Azərbaycana buraxılmayıb. Bu dəfə tam obyektiv olacaqlarını demək doğru olmaz. Biz buna hazır olmalıyıq. Ən nəhayət, biz çox zaman ATƏT DTİHB-yə çox ciddi yanaşırıq. Ancaq bu, bütün ölkələrdə belə deyil. Məsələn, ABŞ-ın bir neçə ştatında ATƏT DTİHB-ni seçkiləri müşahidə etməyə buraxmırlar. Hətta onların qovulması halı da olub. Ona görə də biz öz işimizi özümüz qurmalıyıq və bu kimi müşahidəçilərin rəyi ilə hərəkət etməməliyik".
Vidadi ORDAHALLI
