"Azərbaycan xalqı uzun müddətdən sonra nəhayət ki, öz ata-baba torpaqlarını geri qaytardı. Məhz bu baxımdan prezident seçkilərinin təyin edilməsi mühüm və vaxtında qəbul edilmiş qərardır. Çünki azad edilən ərazilərdə Azərbaycan vətəndaşlarına da öz vətəndaş iradələrini ifadə etmək imkanı yaradılmalı idi. Şübhəsiz ki, qarşıdan gələn 7 fevral prezident seçkiləri Azərbaycan cəmiyyətinin daha da möhkəmlənməsinə xidmət edəcək". Bunu secki-2024.az saytına rusiyalı siyasi xadim, Rusiya-Azərbaycan parlamentlərarası dostluq qrupunun rəhbəri, Dövlət Dumasının deputatı Dmitri Savelyev deyib.
Dmitri Savelyevin sözlərinə görə, siyasi sabitlik dövlətin iqtisadi və sosial inkişafının ən mühüm komponentidir və Azərbaycanın son iyirmi ildə əldə etdiyi uğurlar bunu əyani şəkildə sübut edir. "Əminliklə demək olar ki, müstəqil dövlət kimi Azərbaycanın uğurunun üç sütunu - güclü hakimiyyət, şaxələndirilmiş iqtisadiyyat və xarici və daxili siyasətdə əsas prioritetlərin müəyyənləşdirilməsində milli maraqlara arxalanmaqdır", - deyə deputat qeyd edib.
Siyasətçi əlavə edib ki, Azərbaycan Rusiya ilə təxminən eyni vaxtda və eyni məqsədlərlə iqtisadiyyatının şaxələndirilməsinə başlayıb və əslində bu məsələdə ölkələr bir-birinin təcrübəsinə arxalanır:
"Bu, əsasən ölkələrimiz və xalqlarımız arasında mövcud olan inamlı münasibətlər sayəsində mümkün olub. İndi isə Rusiyanın diqqət dairəsi qərbdən cənuba keçdikdə, Bakı Rusiyanın daha da mühüm strateji tərəfdaşına çevrilib. Bunun nəticəsidir ki, qarşılıqlı ticarətin artırılması üçün potensialımız son dərəcə yüksəkdir. Ekspertlər bildirirlər ki, bu il Rusiya və Azərbaycanın xarici ticarət dövriyyəsi iki dəfə arta bilər. Təbii ki, demokratik seçkilərlə təmin edilən siyasi sabitlik və güclü hakimiyyət bu inkişafa təkan verəcək", - deyən Rusiya-Azərbaycan parlamentlərarası dostluq qrupunun rəhbəri vurğulayıb ki, Azərbaycanda bütün əlamətdar tədbirlər daim yüksək səviyyədə keçirilib. Fevralın 7-də də seçkilərin ənənəvi olaraq qüsursuz təşkil olunacağına əminliyini ifadə edən Dmitri Savelyev sonda Azərbaycan xalqına sülh, firavanlıq və tərəqqi arzulayıb.
