Suriyanın paytaxt Dəməşq üzərində bir neçə İsrail raketini vurması xəbərini şadyanalıqla yayması hər şeydən əvvəl çox təəssüf doğurdu.
Bu dövlətin nəyə sevindiyi təəccüblüdür. Hansı gününə İsrail raketlərini vurmaqlarını toy-bayram edir?
Bunu "Bakı-Xəbər" Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Əvvəla, Suriya özünü dövlət hesab edirsə, özündə cəsarət taparaq heç olmasa bir dəfə İsrailin paytaxtı Təl-Əvivi vursun. Yerusəlimi (Qüdsü) vurmasa da olar.
İkinci, İsrail düz 57 ildir işğalda saxladığı Colan təpəliyindən Dəməşqi vurur, Əsədlər hakimiyyəti əlindən alınmış Colana bircə zərbə vura bilmir.
3. Sən nə dövlətsən ki, "suverenliyin" kimsənin ayaqqabı təmizləməsinə də yaramayan cındır parçası kimi ayaqlar altında qalıb...
4. Sən nə dövlətsən ki, ərazilərinin bir hissəsi ABŞ-ın, bir hissəsi Rusiyanın, bir hissəsi Türkiyənin, bir hissəsi İŞİD-in, bir hissəsi İranın, bir hissəsi YPG-nin nəzarətindədir .
5.Sən nə dövlətsən ki, Suriya dövləti deyilən şey Əsədlər tayfasının nəzarətində Dəməşqin mərkəzi hissələrindən ibarət "ailə fazendası" halına gəlib.
Belə çıxır ki, İsrailin raketlərindən qoruduqları "ailə fazendasından" başqa bir şey deyilmiş. Atası 1967-ci ildə Colan təpələrini İsrailə verib hakimiyyətə gəldi. Özü isə 90- cı illərdə Hafiz atanın verdiyi Colanı geri istəməmək şərti ilə hakimiyyət varisliyinə dünyanın dəstəyini aldı. Bu da axırı... İsrail daha Colan təpələri ilə də kifayətlənmir. Dəməşqin özünə də göz dikib.
Bəs harda qaldı yekə-yekə təriflədiyiniz "Suriya dövlət millətçiliyi" ideologiyası? Etnik millətçilik yox haa, bundan qat-qat böyük "dövlət millətçiliyi"?.. Harda qaldı 800-900 il əvvəl Aslan ürəkli Riçard, Filippin, Barbarossa kimi səlibçi imperatorların burunlarını əzməsi ilə öyünən Suriya dövlətçiliyi tarixi? Nağıl deyil bunlar? Nağıl deyilsə, sübut edin ki, deyil...
Ən gülməlisi Rusiyanın XİN başçısı Lavrovun sözləridir. Deyir ki, "Suriya xalqı Bəşər Əsədin hakimiyyətini dəstəkləyir və biz Suriyaya xalqın iradəsini ifadə edən Əsədin dəvəti ilə gəlmişik"...
Vay, vay... hardadır o Suriya xalqı? Yuxarıda dediyim kimi, azı 5- 6 yerə parçalanmış topluma xalq deyirsiz? Hələ Türkiyənin, Avropanın küçələrinə səpilmiş azı 5 milyonluq Suriya qaçqınlarını demirəm. Suriya kimi bir dövləti "ailə fazendası" gününə qoymuş hakimiyyəti xalq hansı məntiqlə dəstəkləyə bilər, cənab Lavrov?!.. Milli hakimiyyətlərə xalqın dəstək fəlsəfəsinin mahiyyətini belə başa düşürsünüzsə...
Tahir TAĞIYEV
