Parlamentlərarası İttifaqın baş katibi Martin Çunqonqu qəbul edərkən Prezident İlham Əliyev Azərbaycanla Qərb, xüsusən də Fransa barədə maraqlı fikirlər səsləndirdi.
Fransanın regionda dağıdıcı siyasət həyata keçirərək od üstünə benzin tökmək prinsipindən çıxış etdiyini, Ermənistanın militarizasiya siyasəti apardığını, geosiyasi intriqaların təşəbbüskarı olduğunu deyən Prezident İlham Əliyev rəsmi Parisin regionda vəziyyətin gərginləşməsinin səbəbkarı olduğunu, müxtəlif beynəlxalq təşkilatlarda və parlament müstəvilərində anti-Azərbaycan siyasət yürütdüyünü də diqqətə çatdırdı. Dövlət başçısı Fransanın Cənubi Qafqaz regionunda aparıcı mövqeyə nail olmaq və nüfuzunu gücləndirmək məqsədilə siyasət yürütdüyünü, lakin onların bu istiqamətdəki cəhdlərinin əbəs olduğunu vurğuladı.
Qeyd edək ki, məhz Azərbaycan onun işğal siyasətinin qurbanı olmasına baxmayaraq, Ermənistana beynəlxalq hüququn 5 prinsipi əsasında sülh sazişi imzalamağı təklif edib. Lakin münaqişənin başa çatmasından 3 ildən çox vaxt ötməsinə baxmayaraq, Ermənistan hələ də sülh müqaviləsini imzalamaqdan yayınır, üzərinə götürdüyü öhdəliklərinin icrasını ləngidir. Burada isə Fransa kimi ölkələrin Ermənistana təsiri özünü qabarıq büruzə verir. Fransanın Cənubi Qafqazda sülhün əldə olunmasını istəmədiyini və Ermənistanı silahla təmin etdiyini ekspertlər məhz bu fonda qiymətləndirir. Parisin addımları sülhə xidmət etməyən və yeni münaqişəni alovlandırmaq niyyətində olan yanaşmadır. Fransanın, onun dövlət qurumlarının ölkəmizə qarşı atdığı addımlar anti-Azərbaycan siyasətinin nəticəsidir. 44 günlük Vətən müharibəsi və lokal xarakterli antiterror tədbirlərindən sonra bu proses daha da sürətlənib. Bu ölkənin İrəvandakı səfiri Olivye Dekotini hökumətdən aldığı tapşırıq və əmrə uyğun fikirlər səsləndirir. O bildirib ki, Ermənistan öz suverenliyini və əhalisini qorumaq qabiliyyətində olmalıdır. Erməni ordusunun yaranmasının ildönümünə həsr olunan tədbirlərə qatılan diplomat bir sıra məsuliyyətsiz bəyanatlar verib. O iddia edib ki, Paris İrəvanla strateji yaxınlığı, eləcə də onunla müdafiə münasibətlərini üzərinə götürür. Amma Fransa hakimiyyəti hələ də anlamaq istəmir ki, erməni ordusunu nə qədər gücləndirməyə çalışsa da, səyləri nəticəsiz qalacaq. Fransa hər vəchlə Ermənistanla bağlı məkrli planını həyata keçirməyə, Rusiyanı bölgədən sıxışdırıb çıxarmağa, anti-Rusiya əhvali-ruhiyyədən yararlanmağa çalışır. Yəni Rusiya hərbi bazasının əvəzinə, oraya fransız hərbçilərin daxil olması üçün əlindən gələni əsirgəmir. Bu səbəbdən Fransanın Cənubi Qafqaz siyasəti iflasa uğrayır. Fransanın atdığı addımlar Ermənistanın yanında olduğu görüntüsü yaratsa da, Parisin İrəvana qarşılıqsız yardım göstərmədiyi də sirr deyil. Fransanın əsl hədəfi Cənubi Qafqazda yenidən qarşıdurmalar yaratmaq və İrəvanın əli ilə regionda mövcud olmaqdır. Fransızlar üçün bu məqsədin icrasında ən uğurlu vasitə məhz Ermənistandır.
O da faktdır ki, Afrikada, Yaxın və Uzaq Şərqdə Fransa tərəfindən həyata keçirilən neokolonializm siyasəti milyonlarla insanın əsas hüquqlarının kobud şəkildə pozulmasına səbəb olub. XX əsrin ikinci yarısı boyunca Əlcəzairdə, dənizaşırı ölkələrdə ətraf mühitin deqradasiyasına, insan hüquqlarının pozulmasına səbəb olmuş Fransa müstəmləkəsi altında yaşayan insanların hüquqlarını kobud şəkildə pozmaqdadır. İndi bu siyasəti Fransa Qafqazda da reallaşdırmağa can atır. Ermənistanın Azərbaycana qarşı açıq nifrətini dəstəkləyən çıxışlar edən Fransa bu fikirlərin qüvvətlənməsinə səbəb olur. Fransanın regionumuzla bağlı siyasəti də sülhün bərqərar olmasına deyil, Cənubi Qafqazda yeni münaqişə ocaqlarının yaranmasına yönəlib və dayanıqlı sülh prosesinə təhdid xarakteri daşıyır. Vətən müharibəsi və ondan sonrakı dövrdə Fransa Azərbaycana qarşı BMT-nin Təhlükəsizlik Şurasında bir neçə dəfə qətnamə qəbul olunmasını müzakirələrə çıxarmaq üçün cəhdlər göstərib. Əslində isə Fransanın ölkəmizə qarşı siyasətinin ayrı-ayrı təzahürləri illər boyu özünü göstərirdi. Məlumdur ki, Fransada böyük erməni lobbisi və çoxsaylı erməni diasporu var və onların uzun illər göstərdiyi fəaliyyət nəticəsiz qalmayıb. İş o yerə çatıb ki, yanvarın 11-də Azərbaycan haqqında obyektiv fikir söyləyən Rəşidə Datinin Fransanın mədəniyyət naziri təyin olunması ermənilər tərəfindən böyük etiraz aksiyası ilə qarşılanıb. Amma Fransa hakimiyyəti buna qarşı hansısa tədbir görməyib. İndilikdə Paris görür ki, ötən il antiterror tədbirlərinin uğurla nəticələnməsi, xunta rejiminin çökdürülməsi Fransanın regiona təsir imkanlarını tam şəkildə əlindən alıb. Vaxtilə separatçı rejimlə hərtərəfli əlaqələr saxlayan, onların həm maddi şəkildə maliyyələşdirilməsində, həm də silahlandırılmasında aktiv rol alan Paris artıq oyundankənar vəziyyətə düşüb. Bu səbəbdən də Ermənistanı yenidən müharibəyə təhrik etməklə Paris Cənubi Qafqazın əməkdaşlıq məkanına çevrilməsinə mane olmaq istəyir. Lakin əbəs cəhdlərdir və bu siyasət Fransanı regiondan daha sürətlə uzaqlaşdırır.
Nahid SALAYEV
