Mirkazım Seyidov: "Ən maraqlısı budur ki, belə reputasiyada olan ölkə başqalarına, hətta bizə demokratiyadan dərs keçmək istəyir"
İfrat sağçı və populist Almaniya üçün Alternativ (AfD) Partiyasının gizli toplantılarının üzə çıxmasından sonra ölkənin Avropa İttifaqından (Aİ) çıxması (Dexit) müzakirələri başlayıb.
AfD Partiyasının həmsədri Elis Veydelin hakimiyyətə gəldikləri təqdirdə ölkənin Aİ-dən çıxması ilə bağlı referendum keçirəcəklərini açıqlaması gərginliyi daha da artırıb.
Almaniya kansleri Olaf Şolz parlamentdə büdcə müzakirələri zamanı AfD siyasətçilərinin də iştirak etdiyi iclasda məsələyə münasibət bildirib. "Ölkədəki villalarda əhalinin bir hissəsinin bu ölkədən necə çıxarıla biləcəyinin müzakirə edildiyi konfranslara səssiz qala bilmərik. Bu, Almaniya tarixinin ən qaranlıq dövrlərini xatırladır" - Şolz deyib. Şolz illərdir Almaniyada yaşayan və uşaqlarını burada böyüdənlərin ölkəni tərk etmək söhbətindən narahat olduqlarını bildirib.
AfD nümayəndələrinin Almaniyanın AB-dən çıxmasını ifadə edən "Dexit" sözünü işlətdiyini qeyd edən Şolz bunun Avropa və Almaniyanın başına gələ biləcək ən böyük fəlakət olacağını deyib. Onun sözlərinə görə, Almaniya Aİ-dən ən çox faydalanan ölkədir.
Azərbaycana demokratiya dərsi keçmək istəyən Almaniyanın öz daxilində belə təzahürlərin baş qaldırması nədən xəbər verir?
Müstəqil siyasətçi Mirkazım Seyidov "Bakı-Xəbər"ə açıqlamasında bildirdi ki,
Almaniyanın getdikcə daha çox faşist ideologiyasına meyl göstərməsi diqqət çəkir: "Artıq Almaniyanın bir çox bölgələrində faşist dərnəklərinin yaradılması işi aparılır. Bununla bağlı hökumət xeyli vəsait də ayırıb. Bəzi hallarda Almaniyanın dünyada gedən münaqişələri, müharibələri qızışdırması, onları maliyyə və hərbi silah-sursatla təchiz etməsi də məhz yeni yaranan nasistlərin sifarişi və dəstəyidir. Almaniya dövləti faşist ideologiyasının məqsəd və vəzifələrinin gənclər arasında daha geniş təbliğ edilməsi məqsədilə Adolf Hitlerin qələmə aldığı "Mayn kampf ("Mənim mübarizəm") kitabını yeni formada çap etməklə yayımını həyata keçirir. Bütün bunlar isə təhlükəlidir. Dünyada baş verən müharibələrin, münaqişələrin statistikası təsdiq edir ki, son iki yüz ildə bəşəriyyətə ən böyük faciələri, insan qırğınlarını Almaniya yaşadıb. Dünya tarixində yeganə dövlətdir ki, bir milləti yer üzündən silmək üçün soyqırımı aktları həyata keçirib və bunu sonradan açıq şəkildə etiraf edib. Məhz buna görə də ilk dövlətdir ki, törətdiyi soyqırımı aktına görə İsrail dövlətinə təzminat ödəməkdədir. Qısası, Almaniya bəşəriyyətə və insanlığa təhlükə yarada biləcək dövlətdir. Həm də unutmaq olmaz ki, iyirminci əsrdə iki dəfə dünya müharibəsi baş verib ki, həmin müharibələrin ikisinin də müəllifi faşist Almaniyası olub. Bu baxımdan insanlıq ehtiyatlı olmalı, Almaniyada faşist ideologiyasının çiçəklənməsinin qarşısını almaq üçün təcili və təxirəsalınmaz birgə tədbirlər görməlidir. Ən maraqlısı budur ki, belə reputasiyada olan ölkə başqalarına, hətta bizə demokratiyadan dərs keçmək istəyir. Təbiidir ki, belə təzahürlərin artması Almaniyanın daxilindəki miqrantların qovulması ilə nəticələnə bilər".
Məhəmmədəli QƏRİBLİ
