Turab Rzayev: "Paşinyan hakimiyyətini gücləndirmək, Ermənistanda olan siyasi iqtidarın onun əlində təmərküzləşməsinə xidmət edir"
Ermənistan Ədliyyə Nazirliyinin hökumətə göndərdiyi konstitusiya islahatları konsepsiyası layihəsində Konstitusiyanın preambulasının dəyişdirilməsi, yəni istiqlal bəyannaməsinin müddəalarının istisna edilməsindən bəhs edilmir.
Bununla bağlı Konstitusiya islahatları şurasının üzvü Daniel İohannisyan açıqlama verib.
O, 80 səhifəlik konstitusiya islahatları konsepsiyasının layihəsini təqdim edib.
İohannisyanın sözlərinə görə, son iki ildə şura heç vaxt nə konstitusiyanın preambulasını, nə orada qeyd olunan müstəqillik bəyannaməsini, həm də "Dağlıq Qarabağ"a aid olan hissəni müzakirə edib.
Ermənistan konstitusiyasının məhz preambula hissəsində Azərbaycan və Türkiyəyə qarşı açıq ərazi iddiaları var. Belə çıxır ki, Ermənistan öz sərsəm iddialarından tam əl çəkməyib?
Siyasi şərhçi Turab Rzayev "Bakı-Xəbər"ə açıqlamasında bildirdi ki, Ermənistanda konstitusiya dəyişikliyi məsələsi gündəmə gələndə bizim cəmiyyətdə daha çox həmin qonşu ölkələrə, xüsusilə də Azərbaycana qarşı ərazi iddiaları gündəmə gəldi: "Qarabağla bağlı müddəalar, daha geniş götürsək, Ermənistan konstitusiyasında fərqli qanunvericilik aktlarında açıq və ya üstüörtülü şəkildə Türkiyə, Azərbaycan və Gürcüstana qarşı ərazi iddiaları yer tutur. Türkiyənin 6 şərq vilayəti, Azərbaycanın Qarabağ və Naxçıvan, Gürcüstanın isə Cavaxetiya ərazilərinə qarşı iddiaların yer alması ilə bağlı ümumi bir tədbirlər görəcəyini düşünürdüm. Faktiki olaraq, Ermənistan gerbində Ağrı dağın yer alması Türkiyəyə qarşı ərazi iddiasıdır. Bütün bunlar sistemli şəkildə ərazi iddiasına meyl edir. Burda başqa bir məsələni qeyd etmək istəyirəm. Burada təkcə Paşinyanın qonşu ölkələrə hər hansı ərazi iddiası məsələsinin hüquqi aktlardan, konstitusiyadan çıxarılmasın söhbət getmir. Əsl məsələ Paşinyanın ölkədəki hakimiyyəti əlinə almaq, siyasi gücünü artırmaqdır. Çünki Paşinyana zaman-zaman keçmiş "Qarabağ klanı", onun vəzifədə olan üzvləri, hüquq - mühafizə orqanlarında özünə yer eləmiş şəxslər problem yaradırlar. Eyni zamanda Rusiya da "Qarabağ klanı"nı açıq şəkildə dəstəkləyir. Bu da Paşinyan siyasəti üçün ciddi təhdidə çevrilib. O əslində bütün ipləri öz əlinə almağa çalışır. İndi konstitusiyanın preambula hissəsinin dəyişməyəcəyi açıqlaması onu göstərir ki, həmin hissədə Qarabağa aid olan hissə də dəyişməyəcək. Belə olan təqdirdə ortaya başqa bir məsələ çıxır. Əslində Ermənistanın konstitusiya dəyişikliyinə getməkdə əsas məqsədi heç də bizim cəmiyyətdə iddia olunduğu kimi Azərbaycana və qonşu ölkələrə qarşı ərazi iddialarının hüquqi sənəddən yığışdırılması deyil, sadəcə, məqsəd Paşinyan hakimiyyətini gücləndirmək, Ermənistanda olan siyasi iqtidarın onun əlində təmərküzləşməsidir. Belə çıxır ki, bu daha çox sülh prosesinə hazırlıq deyil, Rusiya və ona bağlı qüvvələr qarşısında öz mövqeyini möhkəmləndirməyə xidmət edir".
Məhəmmədəli QƏRİBLİ
