Mirkazım Seyidov: "Ermənistanın Azərbaycanla sülh müqaviləsi imzalamağa meylli olmadığını göstərən başlıca amillərdən biri də zaman uzatması və ordusunu gücləndirməsidir"
Rusiyanın xarici işlər naziri Sergey Lavrov ötən ilin yekunlarına həsr olunan mətbuat konfransında Azərbaycan-Ermənistan sülh prosesi və bölgədəki vəziyyət barədə danışıb. O, Naxçıvanla Azərbaycanın əsas hissəsini birləşdirən nəqliyyat əlaqəsinə alternativ olmadığını deyib.
Rusiyanın baş diplomatı Ermənistanın Baş naziri Nikol Paşinyanın tranzitlə bağlı açıqlamalarında məntiq görmədiyini bildirib: "Üçtərəfli Birgə Bəyanatın müddəalarından biri nəqliyyat-kommunikasiyanın blokdan çıxarılmasıdır. Bəyanatda da qeyd edildiyi kimi, nəqliyyat-kommunikasiyaların açılmasını həyata keçirməkdə çətinlik çəkən məhz Ermənistandır. Mərşrut boyu təhlükəsizliyin təmin edilməsi ilə bağlı yeni tələblər irəli sürən də rəsmi İrəvandır".
ABŞ Bakı ilə İrəvan arasında danışıqlarda finiş xəttinə çatmasına ümid edir. Rusiya xarici işlər naziri Sergey Lavrova istinadən Azərbaycanın Moskvada sülh sazişi imzalamağa hazır olması barədə sualının cavabında Dövlət Departamentinin mətbuat katibinin müavini Vedant Patel bildirib ki, ABŞ bu istiqamətdə çox səylə çalışır.
Azərbaycan və Ermənistan xarici işlər nazirlərinin Vaşinqtonda mümkün görüşünə gəldikdə isə, Patel bu məsələ ilə bağlı məlumatlı olmadığını vurğulayıb.
Rəsmi Bakı xarici işlər nazirlərinin növbəti görüşünün yeri və tarixinin hələlik razılaşdırılmadığını bildirib.
Bütün bunlar onu deməyə əsas verirmi ki, Ermənistan bu danışıqları dalana dirəyib? Proses niyə belə "ölü nöqtəyə" gəlib?
Müstəqil siyasətçi Mirkazım Seyidov "Bakı-Xəbər"ə açıqlamasında bildirdi ki,
Ermənistan xarici işlər naziri Ararat Mirzoyan Azərbaycanla sülh sazişi üçün üç əsas prinsipin olduğunu deyib.
"Nazir qeyd edib ki, Ermənistan və Azərbaycan bir-birinin ərazi bütövlüyünü qeyd-şərtsiz tanımalıdır və sərhəd SSRİ-nin səlahiyyətli orqanları tərəfindən yaradılmış və möhkəm hüquqi bazaya malik xəritələr əsasında müəyyən edilməlidir. Görürsünüzmü, necə qeyri-konstruktiv mövqe ortaya qoyulur? Əvvəla, tərəflər bir-birinin ərazi bütövlüyünü tanıyır. Bunu yenidən şərt kimi irəli sürmək nəyə lazımdır? Sərhədlərin konkret olaraq hansı xəritələr əsasında formalaşacağı ilə bağlı da İlham Əliyev mövqeyini açıqlayıb. O dedi ki, bu təklif qəbul edilə bilməz. Mirzoyan deyib ki, yanvarın əvvəlində İrəvan yeddinci təkliflər paketini Bakıya təqdim edib. Buna nə ehtiyac var? Rəsmi Bakı qalib tərəfdi, İrəvan ona hər gün yeni şərtlər diqtə edə bilməz. Biz sülh sazişi üçün 5 baza prinsipini irəli sürmüşük. Həmin təkliflər hər iki tərəf üçün məqbuldur. Ancaq görürük ki, Ermənistan hər dəfə yeni təkliflər göndərməklə prosesi sabotaj edir. Özləri də etiraf edirlər ki, artıq 7-ci dəfədir bunu edirlər. Mirzoyan deyir ki, İrəvan üçün önəmli olan vasitəçilərin olması deyil, danışıqların məzmunudur. Hansı məzmundan söhbət edirlər? Onlar elə əsas məzmundan yayındıqları üçün belə vəziyyət yaranıb. Ermənistanın Azərbaycanla sülh müqaviləsi imzalamağa meylli olmadığını göstərən başlıca amillərdən biri də zaman uzatması və ordusunu gücləndirməsidir. İrəvan bununla nəinki sülh müqaviləsi üçün əməli addımlar atmır, hətta 2020-ci il 10 noyabr tarixli üçtərəfli Bəyanatın yerinə yetirilməyən 9-cu bəndini də sabotaj edir. İrəvan silahlar almaqla Azərbaycanla qüvvələr balansını bərabərləşdirməyə cəhd edir. Bundan əlavə, ABŞ-la birgə keçirilən hərbi təlim və Avropa İttifaqının missiyasının bu ölkədəki fəaliyyəti həm də Ermənistan ordusunun gücləndirilməsinə hesablanıb".
Məhəmmədəli QƏRİBLİ
