Qərbin Ukraynaya xəyanət etməsi, onu Rusiya ilə savaşda yalnız qoyması artıq dünya miqyasında etiraf olunur. Bu məsələdə artıq Ukraynanın özündə də yüksək səviyyədə maraqlı fikirlər səslənir.
Məsələn, Ukrayna prezidenti Volodimir Zelenski hesab edir ki, Qərb tərəfdaşlarının göstərdiyi hərbi və maliyyə yardımı Ukraynanın müharibədən sağ çıxması üçün həlledici idi, lakin qələbə üçün kifayət etmədi.
Dövlət başçısı Britaniyanın "Channel 4 News" telekanalına müsahibəsində Qərbin yanaşmasının qəbuledilməz olduğunu da vurğulayıb. Bununla yanaşı, o hələ də siyasi nüanslara öyrəşmədiyini, buna görə Ukraynanın hazırda Qərbin yardımının azaldılması təhlükəsi ilə üzləşdiyini etiraf edib: "Hamı gülümsəyir, qucaqlayır, deyir ki, sən israrlısan, çox güclüsən, azad dünyanın liderisən, demokratiyamızı xilas edirsən. Ukrayna xalqının belə prezidenti olmasaydı, biz Avropanın yarısını itirə bilərdik və onda Rusiya Federasiyası ABŞ-a hücum edərdi və biz əlimizdə olan hər şeyi sizə verməliyik. Və sonra dayanırlar". Ukrayna prezidenti qeyd edib ki, nankor görünmək istəməzdi, çünki Qərb tərəfdaşları Ukraynaya çox kömək ediblər və bu dəstək olmasaydı, ölkə ayaqda qala bilməzdi: "Onlar bizə sağ qalmağımızda həqiqətən kömək etdilər. Düşünürəm ki, qalib gəlməyimiz üçün bizə daha çox kömək edə bilərdilər". Jurnalistin "Qərb ölkələri hər şeyi Ukraynanın uduzmaması və qazanması üçün edirmi" sualına Zelenski belə cavab verib: "Bu, ayaqda qalmaq məsələsidir, ona görə də emosional ola bilmirəm, amma bəzən elə anlar olur ki, mən həqiqətən başa düşə bilmirəm və ya başa düşmək istəmirəm". O əlavə edib ki, Qərbin bu və ya digər silah növünü təmin etməkdə tərəddüd etməsi Ukraynada yalnız əlavə ölümlərə səbəb olur: "Vaxt keçir, insanlar ölür. Ona görə də mən bu dəfə müvəqqəti dəhlizi qanlı, çox ağrılı hesab edirəm. Amma bunu heç də hamı başa düşmür. Mən bunu ilk günlərdən çatdırıram". İndi Qərbin Ukrayna savaşına yönəlik mövqeyində müşahidə olunan müəyyən dəyişikliklər Rusiyanın daha sərt mövqe sərgiləməsinə gətirib çıxarır. Çünki Qərb Ukraynaya artıq əvvəlki intensivlikdə hərbi dəstək vermir. Belə vəziyyət bir tərəfdən Rusiyanın savaş meydanında hərbi təşəbbüsü ələ keçirtməsinə imkanlar açır. Digər tərəfdən, Ukraynanın bir dövlət kimi mövcudluq imkanlarını böyük sual altında qoyur.
Baş verənlər Qərbin Ukrayna məsələsində parçalanması ilə də müşayiət olunur. Elə bu fonda Almaniyanın "Süddeutsche Zeitung" qəzeti maraqlı bir məqama diqqət edir. Qəzet yazır ki, Almaniya kansleri Olaf Şolts Parisdən Ukrayna ordusuna hərbi yardımı artırmağı tələb edib: "Ukrayna üzərində qara buludlar gəzir. Belə ki, yaydakı əks-hücumlar uğursuzluqla nəticələnib və ABŞ Konqresindəki respublikaçılar yeni tranşların ayrılmasına mane olurlar. Avropa isə Kiyevin bu il məğlub olacağından və ya ciddi çətinliklərlə üzləşəcəyindən qorxur. Bunun fonunda bəzi Avropa liderlərindən Ukrayna Silahlı Qüvvələrinə silah-sursat tədarükünü artırmaq çağırışları var. Bu qrupa ilk növbədə Almaniya kansleri Şolts daxildir. Son həftələrdə o, Aİ-dəki həmkarlarına şəxsən onun üçün və ittifaqda qüvvədə olan nəzakət qaydalarına uyğun olmayan bir şəkildə mühazirə oxuyub. Şolts digər Aİ ölkələrindən bu il Ukraynaya hərbi yardımı iki dəfə artıraraq səkkiz milyard avroya çatdıran Berlindən nümunə götürməyi açıq şəkildə tələb edib. Onun müraciəti böyük ölkələrə: İtaliyaya, İspaniyaya və xüsusilə Fransaya ünvanlanıb. Almaniya bu il Kiyevə səkkiz milyard avro, Niderland krallığı 2,5 milyard avro vəd edib, Fransa isə susub. Lakin buna baxmayaraq, Fransanın müdafiə naziri Lekornu bu cür qınaqlara sərt reaksiya verib. O, Parisin Ukraynaya Polşa, Böyük Britaniya, Almaniya, Skandinaviya və Baltikyanı ölkələrlə müqayisədə daha az yardım göstərdiyini hesablayan Kiel Dünya İqtisadiyyatı İnstitutunun məlumatlarını şərh edərək, onların hər şeyi qarışdırdıqlarını vurğulayıb. Yəqin ki, reputasiyası ilə bağlı problemləri hiss edən Fransa bu yaxınlarda Kiyevə silah, o cümlədən 78 "Caesar" özüyeriyən silah tədarük etmək üçün yeni planlarını açıqlayıb. Lakin sonra tipik fransız manevrləri başladı: Paris ümumi dəyəri 50 milyon avro olan cəmi 12 haubitsa alınmasını maliyyələşdirəcəyini vəd etdi, daha 60 özüyeriyən silahın pulunu "Ukraynanın müttəfiqləri" ödəməli olacaq, lakin bunların hansı dövlətlər olacağı açıqlanmayıb". Göründüyü kimi, Fransa bu dəfə Ukraynaya xəyanət edir. Bu, Ukraynada da Fransanın mövqeyinin alt-üst olacağı anlamına gəlir. Belə bir vaxtda prezident Volodimir Zelenski Polşanın baş naziri Donald Tusk ilə birlikdə tələbələrlə görüşdə çıxışı zamanı deyib ki, Ukraynanın NATO-ya üzvlüyünə qarşı çıxan dövlətlər var: "Ukraynanın NATO-ya üzvlüyünə qarşı çıxan dövlətlər var. Onlar Rusiyanın eskalasiyasından qorxurlar. Bu, Ukraynaya qarşı xəyanətdir". Həmin dövlətlərdən birinin Fransa olduğu da məlumdur. Belə bir vaxtda Ukrayna xarici işlər naziri Dmitro Kuleba Qərb ölkələrini Rusiyaya silahların kritik komponentlərinin verilməsində ittiham edib. Nazir qeyd edib ki, bu ehtiyat hissələrinin Rusiyaya tədarükünün dayandırılması özəl və dövlət sektorunun genişmiqyaslı, birgə səylərini tələb edir: "Bu, Ukraynada bir çox mülki vətəndaşın həyatını xilas edəcək və Rusiyanın döyüş maşınını sıradan çıxaracaq". Bundan əvvəl Fransa şirkətlərinin də Rusiyaya ehtiyat hissələri satması barədə mediada məlumatlar yayılıb.
Tahir TAĞIYEV
