Elşad Həsənov: "İndi Almaniyanı qabağa verməklə Fransa ilə bağlı iz azdırmağa çalışırlar"
Azərbaycanın Avropa Şurası Parlament Assambleyasındakı (AŞPA) nümayəndə heyətinin səsvermə hüququ məhdudlaşdırıla bilər. Bu barədə məlumat AŞPA-nın rəsmi saytında yayımlanıb.
Məlumatda bildirilir ki, Parlament Assambleyasının Almaniyadan olan üzvü Frank Şvabe Azərbaycanda siyasi məhbusların olduğunu, insanların Dağlıq Qarabağdan zorakılıqla köçürüldüyünü, Assambleyanın məruzəçilərinin 2023-cü il ərzində ən azı üç dəfə Azərbaycana gedə bilməmələrini, həmçinin fevralın 7-də keçiriləcək prezident seçkilərini müşahidə etmək üçün Assambleyaya dəvət göndərilmədiyini əsas gətirərək Azərbaycan nümayəndə heyətinin etimadnaməsinin qəbul edilməməsini təklif edib. Şvabenin təklifi Assambleyanın ən azı otuz üzvü tərəfindən dəstəklənib və müraciət Assambleyanın Monitorinq Komitəsinə, həmçinin rəy üçün Qaydalar Komitəsinə göndərilib.
Qərar əsasən Fransa və Almaniyanın təşəbbüsü ilə qəbul olunub. Bunların da Azərbaycana münasibəti bəllidir. Ermənistana görə, Rusiya ilə ölkəmiz arasında olan münasibətlərə görə Azərbaycana düşmən kəsiliblər. Müharibənin nəticələrini qəbul etmək istəmirlər. Fransa əslində dünyada, o cümlədən Avropada nüfuzunu itirib. O üzdən, bir növ anti-Azərbaycançı qüvvələr Almaniyanı qabağa veriblər. O baxımdan Almaniya-Fransa tandeminin Azərbaycana qarşı düşmənçiliyi və bunun perspektivləri nə vəd edir?
"Belə ədalətsiz siyasət davam edərsə, Avropanın Mərkəzi Asiya ilə bağlı gələcək layihələri perspektivdə effektivliyini itirəcək"
Sözügedən məsələni "Bakı-Xəbər"ə şərh edən siyasi ekspert Elşad Həsənov hesab edir ki, Azərbaycana qarşı bu kimi davamlı qərəzli fəaliyyət perspektivdə Avropanın ziyanına işləyəcək: "Əvvəla, Avropa qurumlarından belə ədalətsiz addımlar gözlənilən idi. Məsələ ondadır ki, 44 günlük zəfər müharibəsindən sonra, Fransa başda olmaqla, Avropanın bir sıra qurumları Azərbaycana qarşı fəaliyyətlərini genişləndirdilər. Fransa təkcə BMT Təhlükəsizlik Şurası müstəvisində Azərbaycana qarşı 5 dəfə qətnamə, sanksiya qəbul olunmasına cəhd etdi, amma alınmadı. İndi Avropa təsisatları bu yolla Azərbaycana təzyiq göstərmək istəyirlər. Yanvarın 17-də Fransa Senatı Azərbaycana qarşı qərəzli qərar qəbul etdi. Fransa eyforiyadadır və atdığı addımları strateji baxımdan hesablamır. O cümlədən, Avropanın bəzi qurumları da analoji mövqe sərgiləyir. Bunlar anlamaq istəmirlər ki, belə qərəzli qərarlar Ermənistana xeyir yox, ziyan gətirəcək. Sülhün əldə olunmasının uzanması Ermənistanın Azərbaycan və Türkiyə ilə sərhədlərinin bağlı qalması deməkdir. Bununla belə, Ermənistanda Rusiya təsirinin güclənməsinə əlavə zəmin yaranır. Avroittifaqın siyasi məsələlərinin həyata keçməsində əsas rolu Fransa oynayır. İqtisadi məsələlərdə isə Almanıyanın təsir və çəkisi daha böyükdür. İndi Almaniyanı qabağa verməklə Fransa ilə bağlı iz azdırmağa çalışırlar. Əslində isə bütün bu kampaniyanın əsas moderatoru Fransadır. Avropa İttifaqının Ermənistandakı müşahidə missiyasının tərkibi əsasən fransız və almanlardan ibarətdir. Bununla ölkəmizə qarşı sinxron fəaliyyət göstərirlər. AŞPA-nın Azərbaycanla bağlı qəbul etdiyi qərarı 30 deputat dəstəkləyib ki, onlar da Fransa və Almaniyanı təmsil edirlər. Avropanı Mərkəzi Asiya ilə birləşdirən əsas yol Azərbaycandan keçir. Belə ədalətsiz siyasət davam edərsə, Avropanın Mərkəzi Asiya ilə bağlı gələcək layihələri perspektivdə effektivliyini itirəcək. O üzdən, bu ədalətsizliyə son qoyulmalıdır".
Vidadi ORDAHALLI
