Azər Həsrət: "İndiki şəraitdə bu çağırış yerinə düşür"
Fransanın Azərbaycana qarşı apardığı düşmənçilik siyasəti günü-gündən daha da şiddətlənir. Özünü bir ovuc erməninin ayağı altına sərən Fransanın antiazərbaycan addımlarına, təbii ki, Azərbaycan dövləti layiqli cavab verməkdədir.
Bir neçə gün əvvəl Fransa Senatının qətnaməsi ilə əlaqədar Azərbaycan Milli Məsclisinin Beynəlxalq Münasibətlər və Parlamentlərarası əlaqələr Komitəsi Bəyanat yayıb. Sözügedən bəyanatda "Xarici İşlər Nazirliyinə tapşırılsın ki, Kanaky, Maohi Nui və Korsikanın müstəqilliyinin tanınması istiqamətində addımlar atsın"-fikri də öz əksini tapıb.
Azərbaycan bu istiqamətdə nə zaman addım atacaq, yaxud atmalıdır? Bu istiqamətdə hansı işlər görülür? Gündəlikdə nələr var? Korsikanın, Kanakyın, Maohi Nuinin müstəqilliyinin tanınması yönündə Azərbaycan XİN ilkin olaraq hansı tədbirlər həyata keçirməyi hədəfləyir?
XİN-in mətbuat xidmətinin rəhbəri Ayxan Hacızadə "Bakı-Xəbər"in sorğusuna belə cavab verdi: "Bu məsələ ilə bağlı hər hansı bir şərhimiz yoxdur".
"Bu, Fransanın Azərbaycana qarşı apardığı qərəzli təbliğatın cavabıdır"
Siyasi şərhçi Azər Həsrət "Bakı-Xəbər"ə "Əlbəttə ki, Fransanın bu əməlləri ilə bağlı Azərbaycan yetərincə sərt reaksiya verir və nəticələr də göz önündədir. Özəlliklə də Fransanın qəddar müstəmləkəçilik tarixi gün üzünə çıxarılır, bu mövzuda beynəlxalq səviyyədə müzakirələr açılır. Bu, Fransanın Azərbaycana qarşı apardığı qərəzli təbliğatın cavabıdır. Eyni zamanda, qeyd olunan ərazilərin müstəqillik hərəkatlarının dəstəklənməsi ilə bağlı Azərbaycanın edə biləcəkləri əlbəttə var. Bilirsiz ki, Korsikadan, Kanakydan, Maohi Nuidən fərqli olaraq, Azərbaycan müstəqil dövlət kimi BMT-nin, həmçinin Qoşulmama Hərəkatının üzvüdür, əlavə olaraq Türk Dövlətləri Təşkilatının, Avropa Şurasının, İslam Əməkdaşlıq Təşkilatının və müxtəlif qlobal və regional səviyyəli platformaların üzvüdür"-deyə bildirdi.
A.Həsrət hesab edir ki, Azərbaycanın bu platformalarda həmin müstəqillik axtaranların səsinə çevrilmək imkanları var. "Milli Məclisin müvafiq komitəsinin məlum çağırışına gəlincə, deyim ki, indiki şəraitdə bu çağırış yerinə düşür. Amma biz o məsələləri kökündən həll etmək yönündə atacağımız addımlar çərçivəsində Fransada insan haqları ilə bağlı dinləmələr təşkil etsək yerinə düşər. Milli Məclisin təcrübəsində belə hallar olub. Əvvəlki illərdə ABŞ-da insan haqlarının durumu ilə bağlı müzakirələr təşkil edilib. Eyni zamanda bu yöndə QHT sektorunda çox sanballı müzakirələr, dinləmələr təşkil edilib. Kifayət qədər də effekt verib. O baxımdan da düşünürəm ki, həmin praktikanı təkrarlamaq lazımdır. Fransada insan haqlarının durumu ilə bağlı Milli Məclis, eyni zamanda QHT sektoru geniş dinləmələr təşkil etməlidir. Bu dinləmələrin nəticələri də sənədləşdirilərək müxtəlif xarici dillərdə beynəlxalq platformalarda yayımlanmalıdır. Fransanın deyəcəyi varsa, bizim də deyəcəyimiz var. Fransanın üstümüzə gələcəyi varsa bizim də göstərəcəyimiz var. O baxımdan düşünürəm ki, Milli Məclisin təşəbbüsü daha da inkişaf etdirilməlidir"-deyə A.Həsrət vurğuladı.
A.Həsrət hesab edir ki, Azərbaycan dövləti bundan sonra da bu məsələdə bütün lazımı addımları atacaq.
İradə SARIYEVA
