Ukrayna münaqişəsi fonunda Qərb və Rusiya arasında münasibətlər getdikcə daha kəskin xarakter alır. Bununla yanaşı artıq NATO-nun Rusiya ilə müharibəyə hazırlıq görməsi də açıq mərhələyə keçir. NATO hərbi komitəsinin başçısı, niderlandlı admiral Rob Bauer bu fonda qeyd edir:
"NATO, Rusiya ilə müharibə də daxil, gözlənilməzliklərə hazır olmalıdır. Biz arxayın olmamalıyıq ki, sülh şəraitində yaşayırıq. Və buna görə də biz Rusiya ilə münaqişəyə hazır olmalıyıq".
Admiral deyib ki, alyans müharibəyə yüksək dərəcədə hazır olmalı, gözlənilməyəni gözləməlidir. Bauer əlavə edib ki, NATO bu məqsədlə döyüş hazırlığı vəziyyətinə transformasiya edilməlidir. NATO admiralı insanlara müharibəyə hazırlaşmağı tövsiyə edir və müvafiq tövsiyələr verir: "Sizdə su, radio və ilk 36 saatda sağ qala biləcəyinizə əmin olmaq üçün batareyalarda fənər olmalıdır". Bauer onu da bildirib ki, onilliklər ərzində Əfqanıstan və ya İraqda təhlükəsizlik məsələlərini həll etmək üçün peşəkar ordulara güvənmək anlayışı mövcud olub. O, yeni müharibə üçün belə peşəkar ordunun kifayət etməyəcəyini vurğulayıb. Buna uyğun olaraq o, hərbi çağırış və ya ehtiyatda olan hərbçilərin aktivləşdirilməsi kimi sistemlərə yenidən baxmağı təklif edib. Almaniyanın müdafiə naziri Boris Pistorius da "Tagesspiegel" qəzetinə müsahibəsində xəbərdarlıq edib ki, Ukraynadakı müharibə qonşu ölkələrə yayıla bilər: "Biz Kremldən gələn hədələri hər gün eşidirik. Bu yaxınlarda belə hədələr Baltik dövlətlərindəki dostlarımıza ünvanlanıb". Bu arada onu da qeyd edək ki, Ukrayna müharibəsinin şərq cəbhəsində son zamanlar ciddi dəyişiklik baş vermir. Rusiya Ukrayna şəhər və kəndlərini raket və dron atəşinə tutmaqda davam edir. Ukrayna isə Rusiyanın dərinliklərindəki iqtisadi və hərbi hədəfləri vurmağa çalışır. Amma hesab edilir ki, NATO-nun özünün müharibəyə hazırlaşması savaşın artıq Ukrayna sərhədlərini aşacağını göstərir. Artıq bu həftə NATO "Soyuq müharibə"dən sonrakı ən böyük təlimlərinə start verir. Bir neçə ay davam edəcək təlimlərdə 90 min hərbçi iştirak edəcək. "Steadfast Defender" manevrləri may ayının sonuna qədər davam edəcək. NATO-ya üzv olan 31 ölkənin hər biri, eləcə də hazırda namizəd statusunda olan İsveç bu hazırlıqlarda iştirak edəcək. Təlimlərdə Rusiyanın NATO-ya üzv ölkələrdən birinə hücumu ilə bağlı tədbirlərin işlənib hazırlanması həyata keçiriləcək. Belə bir hücumun edilməsi NATO müqaviləsinin kollektiv müdafiəni təmin edən beşinci bəndinin qüvvəyə minməsi deməkdir. Bu bəndin hüquqi gücündən tarixdə yalnız bir dəfə - 2001-ci il 11 sentyabr tarixindən sonra istifadə edilib. "Steadfast Defender" manevrləri Şimali Amerikadan NATO-nun şərq sərhədlərinə qədər müxtəlif ölkələrdə keçiriləcək. Təlimlərdə 50 döyüş gəmisi, 80 uçuş aparatı və 1100-dən çox döyüş maşını iştirak edəcək.
Xatırladaq ki, bir müddət əvvəl "Bild" nəşri Almaniya Müdafiə Nazirliyinin məxfi sənədinə istinad edən NATO ilə Rusiya Federasiyası arasında mümkün müharibə ssenarisinin hazırlanması barədə məqalə dərc etmişdi. Yazıda qeyd olunub ki, ehtimal olunan münaqişə 2025-ci ilin yayına planlaşdırılıb. ABŞ və Böyük Britaniya Yəməndə hərbi əməliyyatlara başlayarkən Niderland Quru Qoşunlarının komandanı, general-leytenant Martin Vijnenin də "Rusiya ilə müharibəyə hazır olmalıyıq" bəyanatı səsləndirib. bütün Avropada geniş əks-sədaya səbəb olub. Dünyanın ən nüfuzlu müdafiə nəşri olan Britaniyanın "Jane's Report"un hərbi mənbələrdən əldə etdiyi məlumata görə, NATO Təchizat və Baxım Agentliyi (NSPA) Avropa ölkələrinin tələbi ilə ABŞ istehsalı olan 1000 ədəd "Patriot" hava hücumundan müdafiə sistemi (EDS) sifariş edib. Əsasən Almaniya, Niderland, Rumıniya və İspaniyaya paylanacaq "Patriot" sistemləri ilə yanaşı, NSPA da Aİ üzvü NATO ölkələri adından ABŞ hökuməti ilə 5,6 milyard dollarlıq silah müqaviləsi imzalayıb. Müqavilə çərçivəsində ABŞ-dan Avropa ölkələrinə "Patriot" sistemlərinin yenilənmiş hissələri, əlavə yardımçı şirkətlərin xidmətləri, sınaq avadanlığı və texniki xidmət materialları çatdırılacaq. Bu arada Fransa Vətənpərvərlər Partiyasının lideri Florian Filippot etiraf edib ki , NATO yaxın aylarda Rusiyaya qarşı saxta bayraq əməliyyatı keçirə bilər. O, Moskvaya qarşı aqressiv ritorikaya görə ölkəni alyansdan çıxmağa çağırıb. Belə ki, siyasətçi NATO Hərbi Komitəsinin sədri admiral Rob Bauerin bəyanatına cavab verib. Filippo qeyd edib ki, Rusiya ilə mümkün münaqişə ilə bağlı sözlərin daim təkrarlanması şübhə doğurur: "Önümüzdəki aylarda saxta bayraq əməliyyatlarından (2022-ci ildə "Şimal axını" təxribatı kimi) ehtiyatlı olun! Bu NATO dəliləri hər şeyə hazırdır!". Filippo Rusiyaya qarşı aqressiv siyasət yürütdüyü üçün Fransanı NATO-dan çıxmağa çağırıb. Belə ki, o, alyansın ən böyük hərbi təlimləri ilə bağlı xəbərləri şərh edib: "Şimali Atlantika Alyansı, deyəsən, Üçüncü Dünya Müharibəsinin yaxınlaşmasını sürətləndirmək istəyir. Gəlin NATO-dan çıxaq, bu ölüm spiralından çıxaq, azad Fransa və sülhü seçək!". Ukraynanın ABŞ-dakı keçmiş səfiri Valeri Çalıy isə vurğulayır ki, Kiyev Şimali Atlantika Alyansının birbaşa iştirakı olmadan Rusiyanın öhdəsindən gələ bilməz: "Bizim tərəfimizdə NATO ölkələri olmalıdır. Təkcə köməklə yox, müharibədə iştirak etməklə Avropada müharibəyə son qoya bilərlər. Ukrayna müstəqil şəkildə mübarizə apara bilməz. Çünki ölkə əhalisinin sayına görə Rusiyadan geri qalır və zavodları Rusiya raketləri üçün əlçatmaz yerlərə köçürmək iqtidarında deyil".
Nahid SALAYEV
