Abutalıb Səmədov: "Makron hesab edir ki, onun 13 "dəniz arxası" ərazisinə Ermənistan da əlavə edilib"
Fransa prezidenti Emmanuel Makron Fransa silahlı qüvvələri qarşısında salamlama nitqində deyib ki, xüsusilə Ermənistanla bağlı tarixi seçim etdik:
"2024-cü ildə biz yorulmadan xaricdəki ərazilərimizin müdafiəsini təmin edəcəyik və olduğumuz böyük millətin üzərinə düşən məsuliyyətlərlə üzləşəcəyik.
Burada onları təfərrüatlı sadalamaqdan çəkinəcəyəm. Diqqətimizi çəkən və mövqelərimizi gücləndirməyə və tarixi qərarlar qəbul etməyə, xüsusən də bayaq qeyd etdiyim Ermənistanla bağlı Balkanları, Ermənistanı qeyd edə bilərəm".
Makronun bu çıxışı bir daha onu deməyə əsas verirmi ki, Fransa öz müstəmləkə siyasətini davam etdirir?
Müstəqil siyasətçi Abutalıb Səmədov "Bakı-Xəbər"ə açıqlamasında bildirdi ki, Fransa ptezidenti son çıxışı ilə hamıya məlum olan həqiqətləri bir daha dilə gətirdi: "Məlumdur ki, Fransanın 13 "dəniz arxası" ərazisi var. Bu əraziləri əlində saxlaması üçün əlindən gələni edir. Makron bu çıxışı ilə öz planlarını bir daha cəmiyyətin diqqətinə çatdırdı. Sübut etdi ki, Fransanın həmin ərazilərdən əl çəkmək fikri yoxdur. Onların əksəriyyətində turizm inkişaf edib. Az qala Fransanın ərazisinə bərabər sahəni əhatə edirlər. Keçən əsrin 60-cı illərində Fransa məcbur olub bir çox müstəmləkələrindən imtina elədi. Buna baxmayaraq, hələ də onları əlində saxlamağa can atır. Xüsusilə də onların maliyyə rezervləri Fransanın nəzarəti altındadır. Təbiidir ki, "dəniz arxası" ərazilərindən də imtina etməyəcək. Maraqlı olan Makronun həmin ərazilərlə yanaşı Ermənistanın da adını çəkməsidir. Makron hesab edir ki, onun 13 "dəniz arxası" ərazisinə Ermənistan da əlavə edilib. Deməli, Ermənistanı da öz müstəmləkəsi hesab edir. Güman edir ki, Ermənistan tam olaraq Rusiyanın nəzarətindən çıxaraq Fransanın nəzarətinə keçib. Reallıq isə başqadır. Ermənistanın bu addımı atması qeyri-mümkündür. Çünki Ermənistanın üzərinə götürdüyü öhdəliklər var. Bunlardan imtina etmək o qədər də asan məsələ deyil. Üçtərəfli bəyanatda da yazılıb ki, Zəngəzur dəhlizini Rusiya qorumalıdır. Rusiya bu təsiri saxlamaq üçün əlindən gələni edəcək. Hələlik başı Ukraynaya qarışıb. Fransa bir neçə zirehli maşın verməklə Ermənistanı öz əlinə ala bilməyəcək. Makron bilməlidir ki, Ermənistan və digər müstəmləkələr uğrunda mübarizə onun üçün asan olmayacaq. Fransa öz müstəmləkələrini nəinki əlindən buraxmağı, əksinə, onların sayını daha da artırmağı düşünür".
İndi reallıq başqadır, belə ki, artıq Fransa Şimali Afrikada öz nüfuzunu itirib və heç bir ölkə rəsmi Parislə hesablaşmaq istəmir. "Ərəb baharı" adlanan rəngli inqilabların Qərbdən idxalı prosesindən əziyyət çəkmiş Misir, Tunis, Əlcəzair, hətta Liviya siyasətçiləri də yaxşı başa düşürlər ki, fransızların əsas məqsədi münaqişələr hesabına bu regionda təsirini qoruyub saxlamaqdır.
Fransa əsrlərdir ki, Afrikada cinayətlər törədir. Bu isə qitə ölkələrinin Parisə qarşı nifrətini son həddə çatdırıb. Malidə, Əlcəzairdə, Nigerdə və müstəmləkəçilərdən dəhşətli zülmlər görmüş digər dövlətlərdə fransızların qeyri-insani hərəkətlərinə qarşı etiraz aksiyaları başlayır.
Özünü demokratik dəyərlərin daşıyıcısı hesab edən bir ölkənin XXI əsrdə müstəmləkəçilik siyasətini davam etdirməsi beynəlxalq hüququn, demokratik dəyərlərin, insan hüquq və azadlıqlarının tapdalanması deməkdir. Fransa bu siyasətlə özünü nüfuzdan salıb.
Məhəmmədəli QƏRİBLİ
