Bünyamin Qəmbərli: "Bizimlə bağlı aparılan bütün prosesləri, ərazilərimizin işğalını, 20 Yanvar faciəsini Rusiya özünün daxili işi hesab edib"
ABŞ-ın Azərbaycandakı səfiri 20 Yanvar faciəsi ilə bağlı başsağlığı verib. Bu barədə səfirliyin "X" hesabında paylaşım edilib: "Bu gün biz Qara Yanvar faciəsində həlak olanların xatirəsini ehtiramla yad edirik. Bu faciəli gündə yaxınlarını itirənlərin ailə üzvlərinə və dostlarına dərin hüznlə başsağlığı veririk".
Çox maraqlıdır ki, ABŞ bu ənənəni hər il davam etdirsə də, Rusiya heç vaxt 20 Yanvarla bağlı Azərbaycana başsağlığı verməyib. Rusiya niyə belə edir?
Müstəqil siyasətçi Bünyamin Qəmbərli "Bakı-Xəbər"ə açıqlamasında bildirdi ki, Azərbaycanın başına gələn bütün bəlaların səbəbkarı Rusiyadır: "Bu gün bizim media resurslarında Qərbi Azərbaycanda toponimlərimizin necə dəyişdirilməsi, abidələrimizin dağıdılması ilə bağlı ciddi müzakirələr gedir. Azərbaycan torpaqlarında erməni dövlətini yaradan Rusiya olub. Azərbaycan ərazilərində ermənilərin vəhşiliyi üçün şəraiti yaradan da Rusiyadır. Tariximizin araşdırılmasına da qadağa qoyan bu ölkə olub. Belə bir vəziyyətdə biz hələ də Rusiyadan qopmaq istəmirik. Rusiya hələ də bizi özünün bir quberniyası kimi görür. Biz də bunu qəbullanırıq. Soyad sonluğundan tutmuş, 350 yaxın rus məktəbindən canımızı qurtarmağa cəhd göstərmirik. Belə bir vəziyyətdə Rusiyanın 20 Yanvarla bağlı başsağlığı verməyi onun müstəqilliyimizlə bağlı qətliamlar törətdiyinin etirafı deməkdir. Moskva bizim müstəqilliyimizi qəbul etmək istəmədiyi üçün törətdiyi qətliamları da etiraf etməyə maraq göstərmir. Bizimlə bağlı aparılan bütün prosesləri, ərazilərimizin işğalını, 20 Yanvar faciəsini Rusiya özünün daxili işi hesab edib. Hələ bu günün özündə də Ermənistanın Qarabağı Azərbaycanın tərkibi kimi tanımasını Rusiya özünün faciəsi kimi qəbul edir. Çünki nəticədə rus sülhməramlılarının bölgədən çıxması gündəmə gələ bilər. Tək 20 Yanvarla bağlı deyil, heç Xocalı soyqırımı ilə bağlı da başsağlığı verməyib. Biz özümüzü Rusiyadan tam şəkildə asılı saymadığımız gün onlar mütləq bizə başsağlığı vermiş olacaq".
Bəllidir ki, vaxtilə bu qanlı faciəni törətmiş SSRİ-nin özü bir dövlət olaraq xəritə üzərindən yoxa çıxdı və onun yerində 15 müstəqil ölkə yarandı. 1991-ci ildə Rusiya özünü SSRİ-nin varisi elan etdi.
Belədirsə, o, 20 Yanvarla bağlı məsuliyyət daşıyırmı? Əgər Rusiya Sovet hökumətinin varisidirsə, bu məsuliyyəti qəbul etməli və həlak olanların ailələrinə, o vaxt yaralananlara kompensasiya da ödəməlidir.
Şübhəsiz ki, varislik hüququ ilə bağlı beynəlxalq hüquqda təsbit olunmuş normalara görə, SSRİ-nin varisi olan Rusiya 20 yanvar hadisələrinə görə tam məsuliyyət daşıyır. Rusiya isə nəinki bunu etiraf etmir, heç başsağlığı belə vermək istəmir.
Məhəmmədəli QƏRİBLİ
