Yadigar Məmmədli: "Bu, siyasi-mənəvi baxımdan böyük bir hadisədir"
Azərbaycanda 1990-cı il yanvarın 20-də baş vermiş faciədən 34 il keçir. Bununla bağlı Azərbaycanda Ümumxalq Hüzn Günüdür.
1990-cı il yanvarın 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi surətdə qətlə yetirilib.
Tariximizdə ilk dəfə olaraq 20 Yanvarın ildönümünü Azərbaycanın ərazi bütövlüyü və tam suverenliyinin təmin olunması şəraitində qeyd edirik. Məsələ ondadır ki, 20 Yanvar zamanı soydaşlarımız şəhid olanda ərazilərimiz bütöv deyildi, suverenliyimiz pozulmuşdu. Faktiki olaraq Bakı Xankəndiyə, Qarabağın bir sıra yaşayış məntəqələrinə nəzarət edə bilmirdi. Məlum olduğu kimi, artıq Azərbaycanın ərazi bütövlüyü və suverenliyi problemi yoxdur. Bu gün onların ruhunu şad edən vəziyyət yaranıb. O baxımdan bunun əhəmiyyəti necə dəyərləndirilir?
Sözügedən məsələ ilə bağlı fikirlərini baki-xeber.com-la bölüşən media eksperti Yadigar Məmmədli hesab edir ki, bu, siyasi-mənəvi baxımdan böyük bir hadisədir: "Həqiqətən də bu gün biz 20 Yanvarı başqa bir ovqatda qeyd edirik. Ümumxalq Hüzn Günü olsa da ilk dəfədir ki, Azərbaycan öz ərazi bütövlüyünü və suverenliyini tam təmin edib. Belə bir ovqatda bunun qeyd edilməsi şəhidlərin ruhunu şad edir. Çünki biz uzun illər torpaqların işğal şəraitində bu günü qeyd etmişik. Bu isə bizim üçün daha ağır və əzablı idi. Çünki həm şəhidlər vermişdik, həm də əraziləri itirmişdik. Ona görə də bu, bizim üçün çox ağır idi. Ancaq ötən il antiterror əməliyyatlarından sonra Azərbaycan Qarabağda suverenliyini tam təmin etdi və olduqca böyük tarixi qələbəyə imza atdı. Xankəndidə bayrağımız ucaldı. O üzdən, belə bir möhtəşəm qələbənin fonunda 20 Yanvar şəhidlərinin yad edilməsi qürurvericidir. Torpaqlarımızı azad edəndən sonra şəhidlərin ruhu qarşısında üzümüz ağdır. 1990-ci ilin 20 yanvarında məlum hadisələr baş verəndə Azərbaycan hələ müstəqil olmamışdı. Kimsə bilmirdi ki, bir ildən sonra ölkəmiz müstəqillik əldə edəcək, SSRİ dağılacaq. Azərbaycan oğulları əliyalın sovet imperiyasına qarşı müqavimət göstərirdilər. Bu hadisələr həm də Azərbaycanın müstəqilliyinə yol açdı. Ölkədə milli azadlıq hərəkatının güclənməsinə təkan verdi. Ona görə də suverenliyimizin, ərazi bütövlüyümüzün tam təmin olunduğu bir vaxtda 20 Yanvarın qeyd edilməsinin qüruru böyükdür. Suverenliyimizi tam təmin etməklə şəhidlərin ruhu qarşısında alnımız açıqdır. Bir daha sübut olundu ki, biz boşuna şəhid verməmişik. Həmin şəhidlər hesabına müstəqillik əldə olundu".
Vidadi ORDAHALLI
