Tural İrfan: "ABŞ-ın guya ölkəmizdə dini etiqad azadlıqlarının pozulması ilə bağlı bəyanatı özünə tətbiq edilsə, daha məntiqli olar"
Prezident İlham Əliyev Azərbaycanda dini qurumlara maliyyə yardımı göstərilməsi haqqında Sərəncam imzalayıb.
Sərəncama əsasən, Azərbaycanda dini qurumlara maliyyə yardımı göstərmək üçün Azərbaycan Respublikasının 2024-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Qafqaz Müsəlmanları İdarəsinə 2,0 (iki) milyon manat, Rus Pravoslav Kilsəsinin Bakı və Azərbaycan Yeparxiyası dini qurumuna 350,0 (üç yüz əlli) min manat, Bakı şəhəri Dağ yəhudiləri dini icmasına 350,0 (üç yüz əlli) min manat, Avropa yəhudilərinin Bakı dini icmasına 350,0 (üç yüz əlli) min manat, Azərbaycan Respublikasında Katolik Kilsəsinin Apostol Prefekturası dini qurumuna 350,0 (üç yüz əlli) min manat və Azərbaycan Respublikasının Alban-Udi xristian dini icmasına 350,0 (üç yüz əlli) min manat, habelə digər qeyri-islam dini icmalarına maddi dəstək məqsədilə Azərbaycan Respublikası Dini Qurumlarla İş üzrə Dövlət Komitəsinin tabeliyində Mənəvi Dəyərlərin Təbliği Fonduna 350,0 (üç yüz əlli) min manat ayrılıb.
Çox maraqlıdır ki, dini azlıqlara belə tolerant münasibət özünü demokratiyanın beşiyi sayan ölkələrdə belə yoxdur. Ancaq onlar bunu qəbul etmək istəmir, hətta Azərbaycanı bu sahədə qaralamağa da çalışırlar.
Bugünlərdə ABŞ Dövlət Departamenti dünya ölkələrində dini azadlıqların vəziyyəti ilə bağlı illik hesabat yayımlayıb. Hesabatda bildirilib ki, bir neçə ölkə ilə yanaşı Azərbaycanda da dini etiqad azadlığı ciddi şəkildə pozulub.
Hesabatda həmçinin Azərbaycanın işğaldan azad edilmiş ərazilərində olan erməni abidələrinin vəziyyəti ilə bağlı narahatlıq da bildirilir. 30 illik işğal dövründə ermənilərin müsəlman abidələrinə qarşı törətdiyi vandalizmə isə laqeyd yanaşılır. Ermənilərin Azərbaycanı könüllü tərk etmələri də mənfi hal kimi hesabata salınıb.
Maraqlıdır, paytaxt Bakıda erməni, pravoslav, katolik kilsələrinin, yəhudi sineqoqlarının eləcə də digər dini ibadətgahların olduğu halda niyə məhz bu siyahıda Azərbaycanın adı var?
İlahiyyatçı Tural İrfan "Bakı-Xəbər"ə açıqlamasında bildirdi ki, ABŞ Beynəlxalq Din Azadlığı Komissiyasının ötənilki hesabatında Azərbaycan ABŞ Dövlət Departamenti tərəfindən qondarma "xüsusi izləmə siyahısı"na daxil edilib: "Belə bir məsəl var: "Öz gözündə tiri görmür, başqasında çöp axtarır". Dünyaya demokratiya dərsi keçmək istəyən Amerikanın bu addımı reallıqdan uzaq, birbaşa qərəzli mövqeyin nümayişidir. Bu da ondan irəli gəlir ki, ölkədəki erməni əsilli amerikalılar və yaxud da erməni lobbisi canfəşanlıq göstərir. Azərbaycanda dini etiqad azadlığı ilə bağlı heç bir problem yoxdur. Əksinə, dini icmalara hərtərəfli dəstək göstərilir. Yəni ABŞ-ın Azərbaycanın da adını dini etiqad azadlığına dair "izləmə siyahısı"na salması təşəbbüsü son zamanlar ölkəmizin əldə etdiyi uğurlara kölgə salmaq niyyətidir. Prezidentin dini icmalara maddi dəstəyin verilməsi ilə bağlı imzaladığı sərəncam buna sübutdur.
ABŞ Azərbaycan kimi tolerant, bütün dinlərə hörmətlə yanaşan bir ölkəyə qara yaxır. Son illər xüsusən ABŞ-da dini və irqi zəmində çoxsaylı cinayətlərin baş verdiyi müşahidə olunur. ABŞ-da qaradərililər təqib olunur, döyülür, qəddarcasına öldürülür. Bu ölkədə irqi-dini ayrıseçkiliklə bağlı qətl hadisələri, polis tərəfindən güllələnmə və yaxud da döyülərək öldürülmə hadisələri adi hal alıb. ABŞ-ın guya ölkəmizdə dini etiqad azadlıqlarının pozulması ilə bağlı bəyanatı özünə tətbiq edilsə, daha məntiqli olar. Azərbaycanda olan müsəlman və qeyri-müsəlman icmalarının aparıcı qurumları mütəmadi olaraq belə qərəzli hesabatlarla bağlı xüsusi etiraz bəyanatları veriblər".
Məhəmmədəli QƏRİBLİ
