Xaricdə yaşayan azərbaycanlılar dövlətimizin, dövlətçiliyimizin, mədəni, mənəvi dəyərlərimizin dünyada ən önəmli təbliğatçısı, tərənnümçüsü olmalıdır. Dünyanın beş qitəsində məskunlaşan azərbaycanlılar tarixin müxtəlif dövrlərində Şimali və Cənubi Azərbaycandan, Gürcüstandan, Qərbi Azərbaycandan köçərək xarici ölkələrə üz tutublar.
Təbii ki, bu insanların hər birinin də özünün ayrıca həyat hekayəti, köç tarixçəsi var. Bu insanlar illərdir Vətəndən kənarda yaşasalar da, ürəkləri, ruhları və kökləri ilə öz ata yurdlarına bağlıdırlar. Amerika, Avropa, Asiya, Afrika və Avstraliya qitələrində yaşayan soydaşlarımız son 30 ildə daha çox fəallıqları, Azərbaycan gerçəkliklərini, dövlətimizin ədalətli mövqeyini təbliğ etməyi özlərinə əsas xətt seçiblər. Sözsüz ki, 50 milyonluq dünya azərbaycanlılarının artıq formalaşmış diaspor qurumları, lobbi təşkilatları da bu xəttin əsas hərəkətverici qüvvəsi kimi görsənir.
Gizlin deyil ki, bu gün bəlli qara qüvvələr, antiazərbaycançılar Amerikadan, Avropa ölkələrindən ölkəmizə qarşı qara piar kampaniyası həyata keçirir. Xüsusən də, Azərbaycanın 7 fevral növbədənkənar prezident seçkilərinə hazırlaşdığı, artıq namizədlərin seçki kampaniyasına başladığı günlərdə Avropada, ABŞ-da fəaliyyət göstərən müxtəlid institutlar, icmalar, media qurumları ölkəmizi hədəfə alıblar. Fransa Senatının son günlər Azərbaycan əleyhinə qəbul etdiyi qətnamə, ondan əvvəl əleyhimizə qəbul edilən sənədlər dünya azərbaycanlılarını, diaspor fəallarını narahat etməyə bilmir. Seçki öncəsi müxtəlif məsələləri bəhanə tutub Azərbaycana qarşı hücuma keçənlərin məqsədi açıq düşmənçilikdir. Onlar çalışırlar ki, bu çirkin kampaniyaları ilə Azərbaycanla bağlı yanlış imic yaratsınlar və indidəndən seçkinin nəticələrini qaralasınlar.
Heç şübhəsiz, bu gün xaricdəki erməni diasporunun nümayəndələri gecə-gündüz demədən Azərbaycan əleyhinə müxtəlif dövlətlərə, beynəlxalq təşkilatlara məktublar göndərir, müraciətlər edirlər. Onların müraciət etdikləri bütün ölkələr olmasa da, Fransa kimi qatı ermənipərəst dövlət Azərbaycan əleyuhinə öz senatında bədnam qətnamə qəbul edə bilir. Fransa senatının, ABŞ konqresinin, eləcə də başqa Qərb təşkilatlarının senatorları, konqresmenləri, deputatları erməni diasporunun əlində oyuncağa çevirilib. Elə buna görə də, seçki öncəsi onların bizə qarşı qərəzli, düşmən kampaniyaları davam edir.
Növbədənkənar prezident seçkiləri öncəsi Azərbaycana qarşı qarayaxma kampaniyalarına qarşı dünya azərbaycanlıları nə iş görməlidir?
Müasir İnkişaf Birliyinin sədri Mübariz Göyüşlü "Bakı-Xəbər"ə bildirdi ki, biz indi çox həssas və məsuliyyətli bir mərhələdiyik, ölkəmiz növbədənkənar prezident seçkilərinə hazırlaşır. O, qeyd etdi ki, ölkədə keçiriləcək bu seçkilər xaricdə yaşayan soydaşlarımızı da ciddi maraqlandırmalıdır. Müsahibimiz vurğuladı ki, antiazərbaycan qüvvələr prezident seçkiləri öncəsi xüsusi təşkilatlanıb və xarici təşkilatlar vasitəsilə dövlətimiz əleyhinə çıxışlar, qətnamə qəbul edirlər. O, hesab edir ki, Fransansanın Qarabağla bağlı qəbul etdiyi son qətnamə bu ziyanlı addımlardan biridir. "Xaricdə yaşayan azərbaycanlılar bu antiazərbaycan təbliğatına qarşı əlindən gələni etməlidir" deyən M.Göyüşlü qeyd etdi ki, biz hər bir yeni gün mövqeyimizi daha da gücləndirməliyik. "Əvvəla, dünya azərbaycanlıları daha güclü şəkildə təşkilatlanmağa çalışmalıdır. Onların təşkilatlanma istiqamətində çalışmaları zəif təsir bağışlayır. Mənə elə gəlir ki, yetərli qədər deyil. Güclənmiş Azərbaycan diasporu öz sözünü həm yerli dövlət qurumlarının qarşısında deyər, haqq səsini çatdırıb sözünü deyə bilər. Bunu ona görə deyirəm ki, onlar onların nüfuzu güclənməlidir. Hər bir dövlət qurumunda, təşkilatda söz sahibi olmağa çalışmalıdırlar.
Bununla belə, indiyə qədər diasporumuzun Azərbaycan dövlətinin müdafiəsi ilə bağlı diqqət çəkən davranışları, hərəkətləri olub. Bilirsiz ki, 44 günlük Vətən müharibəsi günlərində Azərbaycan diasporu xaricdəki qara qüvvələrə qarşı mübarizə apardı, sonrakı dönəmlərdə də biz bunun şahidi olduq. Elə 2 il əvvəl Fransa senatının qəbul etdiyi üzdəniraq qətnaməyə etiraz olaraq senatın qarşına toplaşıb öz sözlərini dedilər. İstəyimiz odur ki, azərbaycanlıların səsləri eşidilsin.
Dünya azərbaycanlılarından hər zaman fəallıq tələb olunur. Xüsusən də prezident seçkiləri öncəsi onların fəaliyyətinin daha da güclənməsinə ehtiyac var" - deyə M.Göyüşlü bildirdi.
"Diasporumuz hər cür təxribatın qarşısının alınmasında aktiv olmalıdır"
M.Göyüşlü bildirdi ki, bəzi Avropa ölkələri, Qərb təşkilatları Qarabağdan könüllü köğçən erməniləri bəhanə gətirib Azərbaycana qarşı müxtəlif addımlar atırlar. Onların məqsədinin Azərbaycanın nüfuzuna xələl gətirmək olduğunu deyən M.Göyüşlü "Diaspor fəallarımız, lobbi təşkilatlarımız xaricdəki antiazərbaycan qüvvələrə qarşı aktiv fəaliyyət göstərməlidir. Xüsusən də seçki öncəsi qara qüvvələr daha çox aktivləşib. Diasporumuz hər cür təxribatın qarşısının alınmasında aktiv olmalıdır. 2024-cü ildə Azərbaycanda çox mühüm tədbirlər həyata keçiriləcək. Növbədənkənar prezident seçkiləri olacaq, Azərbaycan COP29-a ev sahibliyi edəcək, həmçinin başqa beynəlxalq tədbirlərə də şahidlik edəcəyik. Bu il çox önəmli ildir. Onlar hər zaman Azərbaycanın maraqlarını müdafiə etmək üçün mütamadi olaraq tədbirlər keçirmələli, müsahibələr verməli, yazılar hazırlamalıdırlar"-deyə bildirdi. O əlavə etdi ki, dünya azərbaycanlıları bizim haqlı işimizin əsas müdafiəçisi kimi daim fəaliyyətdə olmalıdır. Bu sahədə onların üzərinə böyük ioşlər düşdüyünü deyən M.Göyüşlü əlavə etdi ki, Azərbaycanda keçiriləcək Prezident seçkilərinin obyektivliyinə, demokratikliyinə, xalqımızın iradəsinə, seçiminə heç bir xarici qüvvə ləkə yaxa bilməz.
İradə SARIYEVAYazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
