Azərbaycana qarşı düşmənçilik siyasətini davam etdirən Fransa Cənubi Qafqaz regionunda sülh prosesinə zərbə vurmaqda davam edir. Elə Fransa Senatının növbəti anti-Azərbaycan qətnaməsi də bunun real göstəricisidir.
Xatırladaq ki, Fransa Senatı hələ 2023-cü il dekabrın 1-də təklif olunan "Azərbaycanın Dağlıq Qarabağa hərbi təcavüzünü pisləmək və Ermənistan Respublikasına qarşı növbəti təcavüz cəhdlərinin və ərazi bütövlüyünün pozulmasının qarşısını almaq" adlı absurd qətnamə qəbul edib. Qətnamədə Azərbaycana qarşı sanksiyaların tətbiqi və Qarabağın erməni əhalisinin geri qayıtmaq hüququnun təmin edilməsi üçün təminatların verilməsi tələb olunur. Bundan başqa, Fransa Senatı 2023-cü il sentyabrın 19-20-də Azərbaycanın Qarabağda həyata keçirdiyi antiterror tədbirlərindən də ciddi narahat olduğunu bəyan edir. Senat Fransa hökumətinin Ermənistana hərbi texnika tədarükü ilə bağlı qərarını da alqışlayır. Qurum Qarabağın separatçı, terorçu liderlərinin həbsini pisləyir və onların dərhal azad edilməsinə çağırır. Mədəni və dini irsin vəziyyəti ilə bağlı məlumatlandırıcı hesabat hazırlamaq üçün dərhal YUNESKO nəzdində beynəlxalq ekspertlər qrupunun formalaşdırılaraq Qarabağa göndərilməsinin zəruriliyi vurğulanır. Beləliklə, bu sənəd reallaığın tam təhrifi, Azərbaycana qarşı növbəti düşmənçilik sənədidir. Şübhəsiz ki, öz tarixi müstəmləkəçilk, qırğınlar, insanların istismarı və islamofob siyasəti ilə zəngin olan bu dövlətin Azərbaycanla bağlı hər hansı bir qətnamə qəbul etməyə ümumiyyətlə haqqı yoxdur. Xatırladaq ki, Fransa Senatı əvvəllər də Azərbaycana qarşı qərəzli qətnamələr qəbul edib. Amma onların qəbul etdiyi qətnamələr ölkəmiz üçün lazımsız bir kağız parçasından başqa bir şey olmayıb. Bu mənada sözügedən kağız parçası Parisin Qafqaz siyasətinin iflasının növbəti göstəricisidir. Fransanın isterikası Parisin Bakı qarşısında nə qədər aciz qaldığını, artıq sağlam və səbatlı qərar verə bilməyərək, hətta özünə zərər vurmağa başladığını nümayiş etdirir. Məsələn, faktdır ki, Fransanın Azərbaycanla ticarət dövriyyəsi Ermənistan və Gürcüstanla birgə dövriyyəsindən xeyli çoxdur. Bu mənada, Senatın təklif etdiyi sanksiya ilk növbədə elə Fransanın özünün maraqlarına zərbədir. Deməli, Senat Azərbaycanı yox, məhz Fransanın Cənubi Qafqazdakı ticari mənafelərini hədəfə almış olur. Digər tərəfdən, əgər iqtisadi əlaqələri ehtiva edən sanksiyalardan söhbət gedirsə, sirr deyil ki, Parisin Mərkəzi Asiyaya artan marağı, xüsusən Qazaxıstanın yalnız yerüstü nəqliyyatla daşına bilən uran ehtiyatlarının nəqli məsələsində Fransa üçün Azərbaycan açar ölkədir. Amma belə görünür ki, fransızlar bunu başa düşmək istəmir. Ümumiyyətlə, İkinci Qarabağ müharibəsində Qələbəmizdən sonra Fransa hökuməti beynəlxalq müstəvidə ölkəmizə qarşı qarayaxma kampaniyası apararaq, bir çox beynəlxalq təşkilatlar vasitəsilə sanksiyaların qəbul edilməsinə cəhd göstərib. Lakin Azərbaycan dövlətinin yürütdüyü uğurlu xarici siyasət, beynəlxalq təşkilatlarla qurulan düzgün münasibət sayəsində bütün mənfi tendensiyaların qarşısı alınıb.
Onu da qeyd edək ki, Fransanın Azərbaycan qarşısında məğlubiyyətinin qisasını Xurşidbanu Natəvanın heykəlindən alacaq qədər cılızlaşıb. Fransa bu kimi addımlarla Ermənistan və Azərbaycan arasında sülh perspektivlərinə kölgə salmaqla özünün beynəlxalq hüquq düşməni olmasını bir daha ifşa edir. Baş verənləri şərh edən gürcü politoloq Simon Kopadze qeyd edir ki, Ermənistanın Azərbaycanla sülh prosesində tutduğu destruktiv mövqenin arxasında da Fransa dayanır: "Paris və İrəvan əlbir olub oyun qurub, amma onlar heç nə əldə edə bilməyəcəklər". O bildirib ki, 2020-ci ildən 2023-cü ilə qədər mərhələli şəkildə cərəyan edən bütün proseslərdə Azərbaycan Ermənistana sülh danışıqlarının aparılmasını təklif edib: "Sülh təklifi hər zaman Azərbaycan tərəfdən gəlib. Rəsmi Bakı həmişə şərait yaradırdı ki, İrəvan getdiyi səhv yoldan qayıtsın. Amma Ermənistanda elə düşünürdülər ki, Fransa ilə hansısa formada əlbir olub nəyəsə nail olacaqlar. Bu, onlarda alınmayacaq, qurduqları oyun baş tutmayacaq. Ermənistan tərəfi hansısa irəliləyiş istəyirsə, bu zaman ən azı ilkin mərhələdə ekspertlər səviyyəsində Tiflisdə görüşlər keçirməyə razılıq verməlidir. Çünki Cənubi Qafqazda sülh istəyiriksə, burada olan 3 ölkə bunu etməlidir. Amma Ermənistanın atdığı addımlar onu dünyadan təcrid etdi, bütün iqtisadi layihələrdən uzaqlaşdırdı. Düşünürəm ki, Ermənistanın etdikləri onun xeyrinə olmadı. Ermənistan öz səhvlərinin qurbanı oldu. Bu uğursuz siyasətlə onlar Azərbaycanın qarşısında dura bilməyəcəklər. Çünki artıq heç nəyi tələb edə bilməzlər. Tələb edəcəkləri nəsə olsaydı, çoxdan edərdilər. Azərbaycan nə insan hüquqlarını pozub, nə əsirlərə işgəncələr verib, nə də beynəlxalq hüquqa zidd hərəkət edib. Azərbaycan hər şeyi beynəlxalq hüququn norma və prinsipləri çərçivəsində edib". Gürcü politoloqa görə, Azərbaycanın mövqeyi ondan ibarətdir ki, sülh olarsa, həyat inkişaf edəcək, iqtisadiyyat güclənəcək və region xalqları gözəl şəraitdə yaşayacaqlar: "Amma bu proses bir çox ölkələri narahat edir. Azərbaycan isə bütün ölkələrlə gözəl əlaqələr qurmağı bacarıb, dünyanın investisiya yatırdığı dövlətlərdən birinə çevrilib. Artıq demək olar ki, hər kəs Azərbaycanla yaxşı münasibətlər qurmağa çalışır. Bunu etmək istəməyənlər isə uduzacaq. Azərbaycan çox sürətlə inkişaf edir və bu inkişafı heç kim saxlaya bilməyəcək". Onun sözlərinə görə, nəinki Azərbaycanın, dünyanın istənilən dövlətinin ərazi bütövlüyünün bərpa olunması, həmin ərazilərin yenidən qurulması müsbət haldır.
Nahid SALAYEV
