Qulamhüseyn Əlibəyli: "Hədəf Rusiyanı Ermənistandan çıxarmaqdır"
Avropa İttifaqı Şurası Ermənistanda qurumun müşahidəçi missiyasının genişləndirilməsini təsdiqləyib. Bu barədə missiyanın mətbuat xidməti məlumat yayıb.
"Biz Avropa İttifaqı missiyasını genişləndirmək qərarını alqışlayırıq. Missiya heyətinin artırılması Aİ-nin regionda sülh və təhlükəsizliyə sadiqliyini göstərir", - məlumatda deyilir.
Məlum olub ki, Aİ Şurası Ermənistandakı müşahidəçi missiyasının 138 əməkdaşdan 209 nəfərə qədər genişləndirilməsinə razılıq verib. Aİ-nin bu qərarına Rusiyanın reaksiyası gecikməyib. Rusiya Federasiyası xarici işlər nazirinin müavini Mixail Qaluzin bildirib ki, Aİ missiyasının Ermənistanda genişləndirilməsi faydasız addımdır, bu yalnız gərginliyi artıracaq.
Görünən odur ki, region ölkələri Aİ missiyasının Ermənistanda genişləndirilməsinə qarşıdır. Ümumən, bütün bunları ekspertlər necə dəyərləndirir?
"Avroittifaq yaxşı bilir ki, Azərbaycanla Ermənistan arasında sərhəddə genişmiqyaslı eskalasiya risqi yoxdur"
Sözügedən məsələni "Bakı-Xəbər"ə şərh edən sabiq millət vəkili, hüquqşünas Qulamhüseyn Əlibəyli buna bir neçə aspektdən yanaşdı: "Avroittifaqın müşahidə missiyasının genişləndirilməsi qurumun, bütövlükdə Qərb ölkələrinin Rusiyanı Ermənistandan və daha sonra Cənubi Qafqazdan sıxışdırmaq planının bir tərkib hissəsidir. Məlum məsələdir ki, müşahidə missiyası mülki missiya adlansa da, faktiki olaraq hərbçilərdən, kəşfiyyatçılardan təşkil olunub. Onun tərkibində olan hərbçilər həm hərbi funksiyanı, həm kəşfiyyat və digər funksiyaları yerinə yetirmiş olurlar. Ona görə də Avroittifaq çalışır ki, həmin o müşahidə missiyası adlanan hərbçilərin köməyi ilə tədricən öz məqsədlərini həyata keçirsin. Tədricən həm Rusiya ilə bağlı müəyyən məlumatları toplasın, həm də Ermənistanla bağlı məlumatlardan istifadə edib Moskvanı regiondan sıxışdırmaqla bağlı öz strategiyasını qursun. Çünki ümumi işin fəlsəfəsi buna hesablanıb. Avroittifaq yaxşı bilir ki, Azərbaycanla Ermənistan arasında sərhəddə genişmiqyaslı eskalasiya risqi yoxdur. Bunun elementləri olsaydı, antiterror əməliyyatlarından sonra sərhəddə atəşkəs pozulardı və s. Bunların heç biri baş verməyib və sərhəddə sabitlik hökm sürür. Üstəlik, guya Azərbaycanın Zəngəzura hücum edəcəyi və buna hazırlaşdığı barədə kampaniya da fiaskoya uğradı. Məlum oldu ki, Azərbaycanın belə bir niyyəti yoxdur. Azərbaycanın məqsədi Qarabağda tam suverenliyini bərpa etmək idi ki, buna da nail oldu. Belə olan halda müşahidə missiyası tərkibi niyə genişləndirilir və sayları artırılır? Hədəf Rusiyanı Ermənistandan çıxarmaqdır. Rusiya xarici işlər nazirinin müavini Mixail Qaluzinin bəyanatı onu göstərir ki, Moskva regiondan çıxmaq fikrində deyil. O cümlədən, Ermənistandan çıxmaq niyyətində deyil. Müşahidə missiyası üzvlərinin sayının artırılmasının əsl səbəblərini bilir. O baxımdan yəqin ki, Rusiya bununla bağlı müəyyən əks tədbirlər görəcək".
Vidadi ORDAHALLI
