Amid Əliyev: "İndiki məqamda böyük müharibənin baş verəcəyini söyləmək bir qədər çətindir"
İran son günlər qonşu dövlətlərin ərazilərini raket atəşinə tutmaqla da gündəliyə gəlib. Yanvarın 15-dən 16-na keçən gecə ölkənin İnqilab Keşikçiləri Qvardiyası (SEPAH) İraqın şimalına, Suriyaya, yanvarın 17-də isə Pakistana dron və raketlərlə zərbələr endirib.
Tehranın yaydığı rəsmi açıqlamaya əsasən, SEPAH Suriya və İraq ərazisində terrorçuların mərkəzlərini vurub. Ancaq İranın ali rəhbəri ayətullah Seyid Əli Xamneinin iddiasına əsasən, İraqın şimalında Ərbil şəhərində MOSSAD-ın (İsrailin məxfi kəşfiyyat orqanı - red.) qərargahını vurublar. Tehranda həmin hücuma həsr olunan bannerdə yazılıb: "Allahın izni ilə sərt cavab. Biz kafirlərdən intiqam alacağıq".
Buna cavab olaraq Pakistan İran ərazisinə aviazərbələr endirib.
Pakistanın Xarici İşlər Nazirliyi zərbələrin endirildiyini təsdiq edib.
Nazirliyin məlumatına görə, ölkə "Marg Bar Sarmachar" adlı antiterror əməliyyatı həyata keçirib və İranın Sistan və Bəlucistan vilayətində terrorçulara hücum edib. Nəticədə iki ölkə sərhədində partlayışlar qeydə alınıb. Bir neçə terrorçunun zərərsizləşdirildiyi iddia edilir.
İran mediası isə hücum zamanı 3 qadın və 4 uşağın həlak olduğunu, zərbələrin raket və pilotsuz uçuş aparatları ilə endirildiyini yazıb.
Çox maraqlıdır, İranı Pakistan kimi nüvə ölkəsini atəşə tutmağa hansı səbəb və qüvvə vadar edib və bunun sonu necə görünür?
Politoloq Amid Əliyev "Bakı-Xəbər"ə açıqlamasında bildirdi ki, hazırda İran qüvvələrinin İraq və Suriyadakı hərbi düşərgələri və eləcə də Pakistan ərazisini raket atəşinə tutmasının səbəbləri ilə bağlı müxtəlif versiyalar səsləndirilir: "Səbəblərdən biri budur ki, hələ 2022-ci ildə İranda daxili ziddiyyətlərin kəskinləşməsi fonunda başlayan etiraz aksiyalarının episentri məhz İranın qərbində kürdlərin kompakt şəkildə çox yaşadığı bölgə idi. Bu səbəbdən də İran milli qüvvələri həmin əraziləri özü üçün təhlükəli hesab edir.
Digər tərəfdən isə, İranın Pakistana zərbələr endirməsi də olduqca maraq doğuran səbəblərdən biridir. Hər iki ölkənin rəsmiləri tərəfindən antiterror və terror yuvalarının dağıdılması haqqında bəyanatlar verilir. Yəni hər iki ölkə bir-birinin ərazisində ona təhlükə yarada biləcək qüvvələrin cəmləşdiyi məntəqələrə zərbə endirməklə öz maraqlarını təmin edib. Bundan başqa, bir məsələni də nəzərdə saxlamaq lazımdır ki, indiki məqamda İranın Pakistana zərbə endirməsi olduqca təhlükəlidir. Ən azından ona görə ki, Pakistanın hazırki siyasi hakimiyyəti ABŞ-la çox yaxındır. ABŞ isə hazırda İranı İsrailə qarşı başlanmış hərbi kampaniyada günahlandırır, İraqa müdaxilə isə İran tərəfindən yeni işğal kimi qiymətləndirilir. ABŞ müttəfiqi olan Pakistanın da prosesə qoşulması isə aksiyaların arxasında İraqda fəaliyyət göstərən kürd partiyalarının dayandığından xəbər verir və onlar İran daxilində separatizmi alovlandırırlar.
Bunlarla yanaşı, hamıya çox yaxşı məlumdur ki, İranın bölgədəki ölkələrin daxilində proksi qüvvələri var. Bu da Pakistanı çoxdan narahat edən məqamlardandır. Eyni zamanda Pakistanın da qüvvələri İran ərazisində fəaliyyət göstərir.
İndiki məqamda böyük müharibənin baş verəcəyini söyləmək bir qədər çətindir, amma diplomatik qarşıdurmanın pik həddə qədər artacağını indidən söyləmək olar".
Məhəmmədəli QƏRİBLİ
