Yeganə Hacıyeva: "Xanım senator bu cür mövqeyi ilə əsl cəsarət və ədalət nümunəsi sərgiləyib"
Fransa Senatı 336 "lehinə", 1 "əleyhinə" olmaqla Azərbaycan əleyhinə qətnamə qəbul edib. Natali Qule qətnamənin əleyhinə səs verən yeganə senatordur.
Natali Qule bildirib ki, bu gün Fransa Senatında qəbul edilən qətnamə Cənubi Qafqazda sülhün əleyhinə yönəlib:
"Bu qətnamənin reallıqla heç bir əlaqəsi yoxdur, o, sülh və sabitliyə, Cənubi Qafqazın daha yaxşı gələcəyinə qarşı yönəlib. Bu sənədin müəllifləri Ermənistanın işğalçılıq siyasətini tamamilə unudublar".
Qule əlavə edib ki, Fransadakı erməni diasporu çox təhlükəli oyun oynayır:
"Bu, faydasız fəaliyyətdir və sülhə qarşı yönəlib".
Qeyd edək ki, Senatda 2023-cü il dekabrın 1-də təklif olunan "Azərbaycanın Dağlıq Qarabağa hərbi təcavüzünün pislənməsi və Ermənistan Respublikasına qarşı növbəti təcavüz cəhdlərinin və ərazi bütövlüyünün pozulmasının qarşısının alınması" adlı
Qatnamədə, həmçinin, Qarabağın erməni əhalisinin geri qayıtmaq hüququna təminat verilməsi tələb olunur.
Göründüyü kimi, qondarma qətnamənin əleyhinə səs verən yeganə senator belə Fransanın bu addımını Qafqazda sülhə qarşı təhlükə adlandırır.
Xanım senatorun bu fədakar mövqeyini necə dəyərləndirmək olar?
Politoloq Yeganə Hacıyeva "Bakı-Xəbər"ə açıqlamasında bildirdi ki, Fransa Senatı hansısa başqa dövlətə sanksiya tətbiq edəcək, yaxud hansısa məhdudiyyəti müzakirə edəcək qurum deyil və qətnamə də bundan öncəkilər kimi tövsiyə xarakterlidir: "Amma məsələ ondadır ki, Fransa Senatı daxili qanunvericilikdə öz vətəndaşları üçün nəyisə müsbətə doğru dəyişəcək yöndə ideyalar, layihələr təklif etmək əvəzinə, suverenlik, ərazi bütövlüyü kimi beynəlxalq hüququn əsas prinsiplərinə hörmətsizlik nümayiş etdirməklə məşğuldur. Fransa XİN-ə hansısa ölkə ilə münasibətləri necə qurmaq barədə göstəriş verməklə məşğuldur. Fransa hökuməti beynəlxalq hüquqa məhəl qoymadan daim millətçi çıxışlar edən ermənilərin maliyyəsi ilə idarə olunan siyasətçilər tərəfindən ələ keçirilib.
Azərbaycanın ərazi bütövlüyü və suverenliyi prinsipini pozmağa yönəlik qərəzli və ədalətsiz qətnamə qəbul etməklə bir daha beynəlxalq hüququn norma və prinsiplərinə açıq-aşkar etinasızlıq nümayiş etdirir. Qətnamənin bəndlərindən də aydın görünür ki, Fransa Ermənistanı istifadə etməklə Cənubi Qafqaza yerləşməyə can atır.
Fransanın ermənipərəst bir ölkə olmasının bir neçə vacib əsası var. Burada çoxsaylı etnik erməni vətəndaş, onların geniş lobbi qrupları, diaspora təsisatları mövcuddur. Bu təsisatlar Fransanın bəzi bölgələrində seçki nəticələrinə həlledici təsir edən, ölkə mediasında fikrin formalaşdırılmasında iştirak edən, qanunverici orqanlarda etnik ermənilərdən ibarət siyasi qruplar, hüquq-mühafizə orqanlarında etnik ermənilərdən ibarət şəbəkə və s. kimi siyasi infransrtukturlardır. Bir sözlə, Fransa daxili siyasətinə təsir gücünə malik bələdiyyə strukturlarında kifayət qədər geniş erməni şəbəkələri mövcuddur".
Politoloqun sözlərinə görə, son illər Fransa aktiv tərzdə Cənubi Qafqazda hərbi mövcudluğu formalaşdırmaq üçün Ermənistanla müdafiə sahəsində əməkdaşlığın hüquqi bazasını firmalaşdırmağa çalışır: "44 günlük Vətən müharibəsinə qədər bu iki ölkə arasında münasibətlərin hərbi-siyasi ölçüsünü tam əhatə edəcək hərtərəfli strateji saziş və ya müqavilə mövcud deyildi. Hazırda isə Fransa Ermənistanla müdafiə sahəsində əməkdaşlığın inkşafını üç istiqamətdə: ikitərəfli, Aİ missiyası və NATO çərçivəsində davam etdirmək üçün hüquqi bazalar formalaşdırır. Keçən iki il ərzində ölkələrarası razılaşmalara görə, Fransa Ermənistana hava hücumundan müdafiə, hərbi alpinizm, sülhməramlı və Aİ-nin missiyası çərçivəsində hərbi yardımlar göstərir.
Qətnamə ilə bağlı diqqəti çəkən diğər məqam isə "Demokratik" Fransa parlamentinin SSRİ-də kommunistlərin "syezdləri" kimi az qala yekdilliklə qərar qəbul etməsidir. Heç totalitar rejimli ölkələrdə belə qərarlar bu cür yekdilliklə qəbul olunmur. Fransa iddia olunduğu qədər demokratikdirsə, Senatda niyə yalnız 1 nəfər qətnamənin əleyhinə səs verir? Xanım senator bu cür mövqeyi ilə əsl cəsarət və ədalət nümunəsi sərgiləyib".
Məhəmmədəli QƏRİBLİ
