Qabil Hüseynli: "İranın əsl məqsədi budur ki, Ter-Petrosyanın da əqidəsinə təsir edib onu da yolundan döndərsinlər"
İranın Ermənistandakı səfiri Mehdi Sübhani Ermənistanın birinci prezidenti Levon Ter-Petrosyanla görüşüb. Bu barədə erməni mediası yazıb.
Baş tutan görüş iki saat davam edib. Tərəflər Ermənistan-İran dostluğunun möhkəmləndirilməsi, iqtisadi və mədəni əlaqələrin dərinləşdirilməsi, o cümlədən regional təhlükəsizliyin təmin edilməsi və kommunikasiya marşrutlarının fasiləsiz fəaliyyətinin təmin edilməsi və inkişafı məsələlərini müzakirə ediblər.
Maraqlıdır, İran səfiri niyə digər eks-prezidentlərlə deyil, məhz Qərpərəst mövqeyi ilə tanınan Ter-Petrosyanla görüşüb?
Politoloq Qabil Hüseynli "Bakı-Xəbər"ə açıqlamasında bildirdi ki, istefa verməyə məcbur edilməzdən əvvəl yazdığı məşhur məqalədə Ermənistanın sabiq prezidenti Levon Ter-Petrosyan ölkəsinin "Dağlıq Qarabağ" münaqişəsində əvvəl-axır güzəştlərə getməli olduğunu demişdi: "Məhz həmin məqalə Ter-Petrosyanın istefasına səbəb oldu və məhz həmin məqalə çoxlarında, xüsusilə Azərbaycanda belə bir təsəvvür yaratdı ki, eks-prezident münaqişənin Azərbaycan üçün ən əlverişli surətdə həll edilməsi üçün ən "üzüyola" rəhbər ola bilərdi. O deyirdi ki, qarşılıqlı güzəştlərdən qaçınmaq, yaxud qorxmaq mənasızdır. Çünki təbiətdə başqa həll yolu yoxdur: "Biznesdə olduğu kimi, siyasətdə də yalnız hər iki tərəf üçün sərfəli olan sazişlər uğurlu sayılır. Bir tərəf üçün sərfəli olan saziş heç vaxt uğurlu, yaxud davamlı ola bilməz". İlk baxışdan adama təəccüblü gələn İran səfirinin davranışında görünməyən niyyətlərin olmasıdır. Doğrudan da maraqlıdır, İranın bəyənmədəyi və Qərbin adamı kimi tanınan bir siyasətçi ilı görüşüb müzakirə aparmaq səfirin nəyinə lazımdır? İş burasındadır ki, burada Azərbaycan amili də var. Mövcud reallıqlar İrana sərf etmir. Çünki Azərbaycan güclənir. Onlar Ter-Petrosiyanın hansı əqidəni daşıdığını yaxşı bilir. Petrosiyanın mövqeyi obyektivdir. Qarabağın Azərbaycanın tərkib hissəsi olmasını tanıyan xətdir. Ter-Petrostan həm də Paşinyanın müəllimi sayılır. Ona Qərb ölkələri ilə yaxın olmağı məhz o tövsiyə edib. Hələ çox-çox əvvəl o deyirdi ki, Qarabağ və ətraf rayonları işğalda saxlamaq onlara nəsə verməyəcək. İranın əsl məqsədi budur ki, Ter-Petrosyanın da əqidəsinə təsir edib onu da yolundan döndərsinlər. Ancaq buna nail ola bilməyəcəklər. Çünki münaqişə və onun nizamlanması ilə bağlı fikirlərində Ter-Petrosyan sabitqədəmdir. O, möhkəm siyasətçi kimi xarakterizə olunur. İranın səfirinin niyyəti öz ürəyində qalacaq. Bu görüşün digər məqsədi həm də İranı narahat edən bəzi regional mövzularla da bağlı ola bilər. İran ABŞ və Qərbin onunla həmsərhəd olan Ermənistanda belə geniş əl-qol açmasından çox narahatdır. Onlar düşünür ki, Ter-Petrosiyanın əli ilə Paşinyanı bu yoldan çəkindirə bilərlər. Artıq İran özünü Pakistanla da müharibəyə sürükləmiş oldu. Hər tərəfdən sıxıldığını görən bu ölkə heç olmasa Ermənistan nəfəsliyini saxlamaq istəyir. Təbiidir ki, təcrübəli bir siyasətçi kimi Ermənistanın sabiq prezidenti bu vəziyyəti gözəl anlayır və inanmıram ki, İran onu öz toruna sala biləcək".
Məhəmmədəli QƏRİBLİ
