Məlum olduğu kimi, fevralın 7-də Azərbaycanda növbədənkənar prezident seçkiləri keçiriləcək. Namizədlərin qeydə alınması prosesi başa çatıb. Bir neçə gündür namizədlərin təbliğat kampaniyası başlayıb.
Ancaq bu dəfə seçkidə öz namizədi ilə iştirak etməyən partiyalar da az deyil. Maraqlıdır, seçki təşviqat dövründə namizədi olmayan partiyalar hansı mövqedən çıxış edəcəklər? Yəni seçki dövründə taktikaları necə olacaq? Passiv müşahidəçi mövqedən çıxış edəcəklər, yoxsa prezidentliyə namizədlərdən birinə dəstək verəcəklər?
Məsələ ilə bağlı bir neçə partiyanın mövqeyini öyrəndik.
Rəşad Bayramov: "AMİP bu seçkilərdə konkret monitorinqin həyata keçirilməsi ilə məşğul olacaq"
AMİP Mərkəzi Şurasının sədri Rəşad Bayramov "Bakı-Xəbər"ə açıqlamasında bildirdi ki, hansısa namizədi dəstəkləməklə bağlı partiyanın qərarı yoxdur: "Partiyamızın seçkilərlə bağlı konkret qərarı var. Bununla bağlı ötən ilin 23 dekabrında Ali Məclisin qərarı var. Qərar da ondan ibarətdir ki, AMİP bu seçkilərdə konkret monitorinqin həyata keçirilməsi ilə məşğul olacaq. Yəni başqa sözlə, AMİP müvafiq dairələr üzrə müşahidəçilərin təyin edilməsi ilə məşğul olacaq. Hazırda partiyamız bu işlə məşğuldur. Müşahidələrin həyata keçirilməsi, seçki monitorinqinin aparılması və sonda da seçkiyə qiymət verilməsini həll edəcək. Təbliğat kampaniyası birbaşa namizədlərin və yaxud da onları dəstəkləyən ayrı-ayrı siyasi partiyaların vəzifəsi olduğu üçün, bu kampaniyada partiyamızın işi prosesi monitorinq etmək olacaq. Yəni partiya birbaşa kiminsə namizədliyinin müdafiəsində və seçki təbliğatında iştirak etmir".
Fərəc Quliyev: "Səsvermədə bütün partiya üzvləri sərbəstdir"
Məsələ ilə bağlı Milli Dirçəliş Hərəkatı Partiyasının sədri Fərəc Quliyev qeyd etdi ki, partiyası seçkidə iştirak etməyəcək: "Ancaq bu, partiyamızın seçkini boykot etməsi anlamına gəlmir. Seçkiyə ümumən qatılırıq və müşahidəçilərimizi artıq dairələrə təqdim etmişik. Müşahidəçilərimiz prosesi izləyəcəklər. Səsvermədə bütün partiya üzvləri sərbəstdir. Kim hansı namizədə səs verəcəksə, bu məsələdə azaddır. Şəxsən mən özüm İlham Əliyevə səs verəcəm. Hesab edirəm ki, onun bu gün başladığı işləri davam etdirməsi vacibdir. Hətta bizim partiyanın resursu olsaydı, qalib gəlmək imkanımız olsaydı belə, Əliyevin xeyrinə geri çəkilərdik. Söhbət bir şəxsdən getmir. Söhbət ondan gedir ki, qlobal şərtlər var və dünyanın böyük ölkələrində seçkilər keçirilir. Bir sıra yarım qalmış işlər var. Fikrimcə, bu komandanın o işləri bitirməsi lazımdır. Digər tərəfdən, İlham Əliyevin reytinqi çox yüksəkdir".
Cavanşir Abbaslı: "Bu seçkilərdə seyrçi mövqe tutmaqdan söhbət gedə bilməz"
AĞ Partiya sözçüsü Cavanşir Abbaslı qəzetimizə açıqlamasında bildirdi ki, seçki prosesində təşkilatları hər hansı mövqe tutmayacaq: "Doğrudur, seçkilərdə AĞ Partiya iştirak etmir. Onun üçün də seçki dönəmində hər hansı bir mövqe tutmayacaq. Amma üzvlərimizə sərbəstlik vermişik. Yəni bu seçkiləri AĞ Partiya boykot etmir. Kim istəsə, seçkilərdə iştirak edə, istədiyi şəxsə səs verə bilər. Eyni zamanda, müşahidəçi kimi seçkiləri izləyə də bilər. Bu seçkilərdə seyrçi mövqe tutmaqdan söhbət gedə bilməz. Hər bir vətəndaşın özünü ifadə etmək haqqı var. Amma rəsmi olaraq, kiməsə dəstək vermək kimi partiyanın mövqeyi yoxdur və olmayacağı da dəqiqdir. Seçki taktikamız iştirak etmirsə, demək yoxdur da. Daha çox seçki taktikası gələcəyə hədəflənib. Partiyamızın 30 dekabr tarixli bəyanatında hər şey əks olunub. Bütün namizədlərə uğurlar arzulayırıq".
Vidadi ORDAHALLI
