Daşdəmir Əliyev: "Həm bu biabırçılığı ört-basdır edir, həm də bu hərracdan pul qazanmsğı hədəfləyir"
Ermənistanda hərbi xidmətdən yayınanların müəyyən məbləğ ödəməklə cinayət təqibindən azad olmaq imkanı olacaq.
Ermənistan Milli Assambleyası növbəti iclaslarının işini davam etdirib və "Hərbi xidmət və hərbi qulluqçuların statusu haqqında" qanuna və Ermənistan Respublikasının Cinayət Məcəlləsinə təklif olunan yeni müddəaların ikinci oxunuşda müzakirəsini başa çatdırıb. Layihə "Mülki müqavilə" fraksiyasından olan deputat Hayk Sarkisyan tərəfindən təqdim edilib.
Yaşı 27-dən yuxarı ordudan yayınan şəxslərə aid olan layihəni 61 deputat dəstəkləyib, 27 deputat əleyhinə səs verib, 6 nəfər isə bitərəf qalıb.
Layihə 27 yaşına çatmış və məcburi hərbi xidməti başa vurmamış vətəndaşların cinayət məsuliyyətindən azad edilməsi imkanını təklif edir. Birinci variant: iki il xidmət et, ikinci: bir il xidmət et və dövlət büdcəsinə 2,5 milyon dram ödə. Üçüncüsü: altı ay xidmət edib dövlət büdcəsinə 5 milyon dram ödəmək, dördüncü: bir ay xidmət etmək və dövlət büdcəsinə 8 milyon dram ödəmək, beşinci: hərbi xidmət əvəzinə dövlət büdcəsinə 15 milyon dram ödəmək.
Qanun layihəsinə əsasən, 27 ildən sonra başqa ölkənin vətəndaşlığını qəbul etmiş Ermənistan vətəndaşları əvvəllər yerləşdikləri ölkənin ordusunda azı bir il xidmət etmiş və ya Ermənistan büdcəsinə 2,5 milyon dram ödəmişlərsə, hərbi xidmətdən azad edilirlər.
Ermənistanın belə bir qanunu qəbul erməyə hazırlaşması nədən xəbər verir:
büdcədə pul yoxdur, yoxsa bilirlər ki, müharibə etmək mənasızdır?
Hərbi-siyasi şərhçi, ehtiyatda olan polkovnik-leytenant Daşdəmir Əliyev "Bakı-Xəbər"ə açıqlamasında bildirdi ki, Ermənistan ordusunu biz son müharibədə tamamilə məhv etmişik: "Onların hətta müharibə etmək niyyətləri olsa belə, bunu edə bilməzlər. Çünki 10 il sonra ancaq özlərinə gələ bilərlər. Ancaq bu heç də o anlama gəlmir ki, biz arxayınlaşa bilərik. Tarixin müxtəlif mərhələlərində belə hallar olub. Bir balaca dirçələn kimi ermənilər yenə hücuma keçiblər. Ermənistanda fərarilik yüksək səviyyəyə çatıb. Onlar öz ayıblarını bu üsulla ört-basdır etmək istəyirlər. Ancaq digər məqsədləri isə büdcəyə pul toplamaqdır. Bilirlər ki, heç bir başqa üsulla fərariliyin qarşısını ala bilməyəcəklər. Ona görə də bu üsula əl atıblar. 15 milyon dram verib əsgərliyə getməmək az məbləğ deyil. Bu, 37 min dollardan artıq vəsait deməkdir. Təbiidir ki, böyük əksəriyyətin bu pulu ödəməyə gücü çatmayacaq. İstənilən halda, Paşinyan hökuməti ordunu hərraca çıxarmaq variantını daha məqbul sayıb.
Çünki müharibənin gedişində Ermənistan parlamentinin növbədənkənar iclasının sessiyasında ikinci və yekun oxunuşda müharibə dövründə bəzi əməllərə görə cəzaların sərtləşdirilməsini nəzərdə tutan Cinayət Məcəlləsinə dəyişiklik layihəsi qəbul edildi. Ancaq bunun da fərariliyin qarşısını almaqda heç bir faydası olmadı. Dəyişikliyə əsasən, müharibə dövründə hərbi xidmətdən, təlim düşərgələrindən və ya səfərbərlikdən yayınma, əvvəllər nəzərdə tutulduğu kimi, 4 ildən 8 ilədək deyil, 6 ildən 12 ilədək müddətə azadlıqdan məhrumetmə ilə cəzalandırılmalıdır. Müharibə dövründə vəzifə borcunu yerinə yetirməkdən və ya vergi ödəməkdən yayınan şəxslər üçün cəzanın ən yüksək həddi 4 ildən çox olmayan müddətə azadlıqdan məhrumetmədən bir ildən 5 ilədək müddətə azadlıqdan məhrumetməyə dəyişdirilmişdi. Müharibə dövründə əmrə tabe olmamağa görə cəza 5 ildən 15 ilədək müddətə azadlıqdan məhrumetmədən 8 ildən 15 ilədək müddətə azadlıqdan məhrumetmə cəzası ilə əvəzləndi. Bütün bu faktorlar göstərir ki, Ermənistan hakimiyyəti fərariliyin qarşısını almaqda çox acizdir. Bu səbəbdən də həm bu biabırçılığı ört-basdır edir, həm də bu hərracdan pul qazanmsğı hədəfləyir. Bunu qətiyyən ermənilərin sülh istədiyi səbəbilə, ordudan imtinası ilə izah etmək olmaz".
Məhəmmədəli QƏRİBLİ
