Yaxın Şərqdə hadisələrin inkişaf axarı getdikcə daha təhlükəli xarakter almağa başlayır. ABŞ-İsrail-İran üçbucağında gərginlik daha çox hərbi zərbələrlə müşayiət olunur.
Məhz belə bir vaxtda İslam İnqilabı Keşikçiləri Korpusu (SEPAH) İraq Kürdüstanının paytaxtı Ərbildə ABŞ konsulluğu yaxınlığında yerləşən ABŞ hərbi bazası və hava limanına zərbələr endirib. Amerikanın ABC News telekanalı bildirir ki, Ərbildə təxminən yeddi-səkkiz güclü partlayış olub. Ballistik raketlərlə və pilotsuz uçuş aparatları ilə ABŞ-ın Hərirdəki hərbi bazasına və ona bitişik beynəlxalq hava limanına zərbələr endirilib. Hücuma görə məsuliyyəti öz üzərinə götürən İslam İnqilabı Keşikçiləri Korpusu bildirib ki, kəşfiyyat qərargahlarına və anti-İran qüvvələrinə qarşı ballistik raket zərbələri endirilib. İslam İnqilabı Keşikçiləri Korpusu sözügedən hücumun SEPAH komandirlərinin öldürülməsinə cavab olduğunu və bu hücumlar nəticəsində İsrailin casus qərargahlarından birinin məhv edildiyini bildirib. ABŞ Dövlət Departamenti artıq məsələyə reaksiya verib. Bildirilir ki, ABŞ İslam İnqilabı Keşikçiləri Korpusunun İraq Kürdüstanının inzibati mərkəzi olan Ərbil şəhərinə endirdiyi zərbələri pisləyir: "Biz İranın İraqda sabitliyi pozan ehtiyatsız raket hücumlarına qarşıyıq". Dövlət Departamenti bildirib ki, Birləşmiş Ştatlar İraq hökumətini və İraq Kürdüstan Regional Hökumətini ölkə xalqının istəklərini yerinə yetirmək səylərində dəstəkləyir. Məlumata görə, ümumilikdə səkkiz obyektə hücum edilib. ABŞ ordusu və koalisiya qüvvələri arasında xəsarət alanlar yoxdur. Bəzi məlumatlara görə, ölənlər kürd iş adamı, milyarder Peşrav Ceyi və onun ailə üzvləridir. Biznesmenin evinə raket düşüb. Kürdüstanda regional hakimiyyətə yaxın nüfuzlu iş adamı olan Peşrav Zeyinin "Mossad"la əlaqəsi olub. O, "Empire" və "Falcon Group" kimi böyük şirkətlərin sahibi idi. Bundan əlavə, kürd kəşfiyyatının yüksəkrütbəli məmurunun evi, eləcə də kürd kəşfiyyat mərkəzi raket hücumuna məruz qalıb. Koalisiya qüvvələri isə Ərbil beynəlxalq hava limanı yaxınlığında üç pilotsuz uçuş aparatını vurublar. Bundan sonra bombardman dayanıb. İraq Kürdüstanı Regional hökumətinin baş naziri Məsrur Bərzani bildirib ki, SEPAH-ın hücumlarının heç bir əsası yoxdur. O, bu hücumları İraq və Kürdüstan bölgəsinin suverenliyinin açıq şəkildə pozulması hesab edərək, Bağdaddakı federal hökumətdən buna qarşı mövqe nümayiş etdirməsini istəyib: "Kürdüstan bölgəsinin beynəlxalq aləmdəki müttəfiqləri İnqilab Keşikçiləri Korpusunun hərəkətlərinə səssiz qalmamalıdır".
Bütün bunlar ABŞ və Böyük Britaniyanın Yəmənə hücumu fonunda baş verir. Qeyd edək ki, Qəzza zolağında Fələstin-İsrail münaqişəsinin şiddətlənməsindən sonra Yəmənin husi üsyançıları İsrail ərazisinə hücumlar həyata keçirəcəklərini və Fələstin anklavında əməliyyat dayandırılana qədər əlaqəli gəmilərin Qırmızı dəniz və Bab əl-Məndəb boğazı sularından keçməsinə icazə verməyəcəklərini bildiriblər. Buna cavab olaraq ABŞ səlahiyyətliləri gəmilərin naviqasiya azadlığını və təhlükəsizliyini təmin etmək üçün Qırmızı dənizdə "Prosperity Guardian" əməliyyatına başlayıblar. Daha sonra ABŞ və Böyük Britaniya Yəməndə husilərin mövqelərinə aviazərbələr endirib. Bunun ardınca Yəmən husiləri Qırmızı dənizdə ABŞ-a məxsus "M/V Gibraltar Eagle" yük gəmisinə gəmi əleyhinə ballistik raket atıb. ABŞ Mərkəzi Komandanlığının (CENTCOM) bildirdiyinə görə, qırıcı təyyarə raketi liman şəhəri Hodey sahilləri yaxınlığında vurub. Qeyd edək ki, İsrail və HƏMAS arasında oktyabrın 7-də müharibənin başlamasından sonra İranın dəstəklədiyi qruplar Yaxın Şərqdə ABŞ qüvvələrinə qarşı hücumlarını artırıb. Yəməndə İranın dəstəklədiyi husilər bir neçə hərbi və ticarət gəmisinə ballistik raketlər və dronlarla hücum edib. ABŞ regionda Amerika qüvvələrinə dron və raket hücumlarını dayandırmaq üçün İrana qarşı çəkindirmə səylərinin effektiv olduğunu bildirir. Amma İranın dəstəklədiyi proksi qüvvələr quruda Amerika qüvvələrinə hücum edərkən, Yəməndə husi militantları ABŞ hərbi və ticarət gəmilərinə dənizdə raket zərbələri endirir. İstefada olan amerikalı kontr-admiral Mark Montqomeri qeyd edir: "Bunlar son nəticədə dənizdə ölümlərə, daşıma məhdudiyyətlərinə, sığorta və daşıma tariflərinin artmasına gətirib çıxaracaq və qlobal iqtisadiyyata təsir göstərəcək". O hesab edi rki, ABŞ-ın hərbi cavabları artdıqca İranla müharibə ehtimalı da yüksəlir: "ABŞ qüvvələri ölümlə nəticələnən ciddi hücuma məruz qalarsa, ABŞ çox ağır cavab verməli olacaq. Bu sərt cavab əslində onların narahat olduqları gərginliyin artmasına səbəb olacaq". Artıq rəsmi Vaşinqtonla Təl-Əvivin Suriya və İraqda İran hərbi bazalarına hücumunu Tehrana xəbərdarlıq kimi də qiymətləndirmək mümkündür. ABŞ prezidenti Cozef Baydenin ölkəsinin son zamanlar İranın bazalarına hücumla əlaqədar Konqresə ünvanlandığı məktubda bildirib ki, Birləşmiş Ştatlar gələcək təhdid və ya hücumlara cavab olaraq lazım gələrsə, əlavə və müvafiq tədbirlər görməyə hazırdır. O, məktubunda yazıb ki, bu zərbələrin məqsədi ABŞ və tərəfdaşlarına qarşı davam edən silsilə hücumları azaltmaq, pozmaq, Tehranı və İranın dəstəklədiyi silahlı qrupları şəxsi heyətə, ABŞ obyektlərinə hücumlar həyata keçirməkdən və ya dəstəkləməkdən çəkindirməkdir.
Tahir TAĞIYEV
