Mehman İsmayılov: "Ermənistanda indi səsləndirilən bu fikirlər əslində Azərbaycan Prezidenti İlham Əliyevin 10 yanvar tarixində yerli televizya kanallarına verdiyi müsahibədə səsləndirdiyi fikirlərin əks-sədasıdır"
İrəvanla Bakı arasında birbaşa danışıqlar istisna olunmur, axı sülh prosesində vasitəçi olmağa çalışan istənilən ölkənin öz maraqları var. Bu fikri Ermənistan parlamentinin spikeri Alen Simonyan bildirib.
"Məsələni romantikləşdirmək lazım deyil. Fransızların bizi gözəl gözlərimizə, tariximizə görə sevdiyi - bunlar nağıllardır. Maraqlar üst-üstə düşür və ya düşmür", - o deyib.
Simonyan bildirib ki, Ermənistana və Azərbaycana təsir vasitələrinə malik olmaq istəyən bütün ölkələr "yaxşı" vasitəçilər olmağa çalışacaq, lakin İrəvan və Bakı böyük oyunlarda sövdələşmə obyekti olmamaq üçün öz məsələlərini özləri həll etməlidir.
"Müqavilələrin beynəlxalq ictimaiyyətə uyğunlaşması isə mühüm məqamdır", - deyə Simonyan əlavə edib.
İkitərəfli danışıqları Ermənistan hakimiyyətinin içində də dəstəkləyənlər var.
Halbuki, bu, Azərbaycan Prezidentinin təklifidir. Bunu necə qiymətləndirirsiz?
"...Alen Simonyanın səsləndirdiyi fikirlər, təbii ki, Azərbaycanın irəli sürdüyü tezisə verilən müsbət reaksiyadır"
Politoloq Mehman İsmayılov "Bakı-Xəbər"ə şərhində "Ermənistanda indi səsləndirilən bu fikirlər əslində Azərbaycan Prezidenti İlham Əliyevin 10 yanvar tarixində yerli televizya kanallarına verdiyi müsahibədə səsləndirdiyi fikirlərin əks-sədasıdır. Xatırlayırsızsa, Azərbaycan Prezidenti müsahibəsində birmənalı şəkildə söylədi ki, Azərbaycan-Ermənistan münasibətlərinin geosiyasi müzakirə predmeti olmasının əleyhinədir. Prezident bildirdi ki, iki suveren respublika birbaşa danışıqlar aparıb sülh müqaviləsinin imzalanmasına nail ola bilər. Bu, Azərbaycanın irəli sürdüyü tezisdir. Azərbaycan hər zaman Ermənistanla birbaşa danışıqların tərəfdarı olub. İndi Alen Simonyanın söylədiyi o fikir ki, Fransa bizim qara qaşımıza görə bizə yardım etmir, maraqlar ya üst-üstə düşür, ya düşmür, bu məsələ əslində Ermənistan hakimiyyətində müzakirə edilir. Erməni hakimiyyətinin içərisində ikitirəlik var, orada Ararat Mirzoyan bir xətt yürüdür, Paşinyan və Alıen Simonyan başqa xətt yürüdür, Armen Qriqoryan üçüncü xətti yürüdür. Bunları nəzərə almasaq, Alen Simonyanın səsləndirdiyi fikirlər, təbii ki, Azərbaycanın irəli sürdüyü tezisə verilən müsbət reaksiyadır. Amma yenə də müsahibənin sonunda o tezisi irəli sürür ki, bağlanacaq müqavilə beynəlxalq qanunlara, beynəlxalq ictimaiyyətin tələblərinə uyğun olmalıdır. Yenə də orada bir qarant ölkə məsələsini ortaya atır. Azərbaycan, təbii ki, Güney Qafqazın savaş meydanına çevrilməsini istəmir. Azərbaycan üçüncü dövlətin maraqlarının ifadə oldunduğu danışıq müstəvisini qəti şəkildə istəmir və haqlıdır" - deyə bildirdi.
M.İsmayılov qeyd etdi ki, Azərbaycanla Ermənistan arasındakı münasibətlərin iki dövlət arasında tənzimlənməsi mümkün olduğu halda, bunun Vaşinqtonda, Moskvada, Brüsseldə müzakirə edilməsi yalnız bura əlavə qüüvələrin öz maraqları ilə gəlməsinə səbəb ola bilər. Onun sözlərinə görə, danışıqlar prosesində oyunçunun sayı çoxaldıqca maraqların münaqişəsi baş verir. "Azərbaycan bütün bunları incəliyinə qədər anlayır və ermənilərə təklif edir ki, bura gələcək üçüncü ölkəyə, qaranta ehtiyac yoxdur. Azərbaycan Prezidenti o fikri də söylədi ki, Ermənistan və Azərbaycan arasında bağlanacaq müqavilənin qarantı kimi çıxış edəcək ölkəyə ehtiyac yoxdur. Çünki indi əgər ermənilər anlayırlar ki, bura gələn dövlətlər mütləq öz layihələri, maraqları ilə gəlirlər və onun müdafiəsi üçün həm Azərbaycanın, həm də Ermənistanın maraqlarını qurban verməyi düşünürlər, ermənilərin bu tezisi anlamasında böyük fayda var. Amma təbii ki, hələ onların içindəki, Paşinyan hakimiyyətindəki çat vermiş bu münasibətlər hara qədər gedə biləcək, bu da başqa məsələdir. Çünki orada bir-birinə zidd olan üç siyasi xətt görünür. Bu da, sözsüz ki, vəziyyəti gərginləşdirir. Amma təbii, Azərbaycan doğru yoldadır, Azərbaycanın təklifləri doğrudur, ermənilərin buna müsbət reaksiya verməsi isə onların düşdüyü bu vəziyyətdə Rusiya ilə gərgin münasibətlər, Fransanın öz problemləri ilə qarşı-qarşıya gücsüz bir vəziyyətdə dayanması, Amerikada və Avropa İttifaqında seçkilər, bütün bu məsələlər Ermənistanın Azərbayanın irəli sürdüyü təkliflərə müsbət reaksiya verməsinə səbəb olur. Ermənilər indi çıxışsızdır. Hər zaman bura qarant ölkə gətirməklə gələcəkdə həmin o qarant ölkənin maraqlarını müdafiə edib yenə də Azərbaycana qarşı ərazi iddaları irəli sürmək planlarına qulluq ediblər. İndi anlayırlar ki, ən realı Azərbaycanla birbaşa danışıqlara getməkdir" - deyə M.İsmayılov bildirdi.
İradə SARIYEVA
