Hafiz Cabbarlı: "Bu absurd iddianın Ermənistan XİN tərəfindən bəyanat kimi ortaya qoyulması bir daha Ermənistanın dövlət olaraq revanşist mahiyyətini göstərir"
Ermənistanın Azərbaycana qarşı əsassız iddaları bitib-tükənmir. Bu ölkənin Xarici İşlər Nazirliyinin yalan üzərində köklənən son bəyanatı da bu qəbildəndir.
Ermənistan XİN iddia edir ki, guya 34 il əvvəl Bakıda "erməni qırğınları olub", ermənilər "etnik təmizləməyə məruz qalıblar". Guya Bakıda ermənilərə qarşı "soyqırımlar" törədilib və nəticədə ermənilər Azərbaycan SSR-dən "məcburi köçkün" "düşüblər". Rəsmi şəkildə yalançılığı həyat tərzi seçən Ermənistan XİN iddia edir ki, guya "baş verənlər" "Azərbaycan SSR-dən məcburi köçkün və etnik təmizləmə siyasətinin kulminasiya nöqtəsinə çevrildi", yüzlərlə insan "öldürüldü", "şikəst oldu" və "itkin düşdü", "yarım milyon insan qaçqın vəziyyətinə düşdü"...
Göz görə-görə yalanlarla Ermənistan özünü gülünc vəziyyətə salır.
Qeyd edək ki, Azərbaycan XİN-in sözçüsü Ayxan Hacızadə Ermənistan XİN-in iddialarına cavab verib: " Ermənistan Yanvar faciəsi ilə bağlı faktları təhrif edir. Azərbaycanı deportasiya və etnik təmizləmədə ittiham etmək absurd olmaqla yanaşı, həm də Ermənistanın azərbaycanlılara qarşı sistemli etnik təmizləmə siyasətini ört-basdır etmək cəhdidir".
Tarixçi Hafiz Cabbarlı "Bakı-Xəbər"ə şərhində bildirdi ki, bu, Ermənistan XİN-in növbəti fitnəkar, yalan və riya dolu addımlarından, absurd iddialarından biridir. "Bu absurd iddianın Ermənistan XİN tərəfindən bəyanat kimi ortaya qoyulması bir daha Ermənistanın dövlət olaraq revanşist mahiyyətini göstərir. Bu mahiyyət nədir? Yenə də yalan üzərində qurulmuş siyasətdən istifadə edirlər, bu yalan da zəhər kimi cəmiyyətə yayılır, ermənilərin digər qonşu xalqlara müsbət münasibətini əngəlləyir. Bu cür absurd fikirlər adekvat münasibətlərin, dinc qonşuluq əlaqələrinin qurulmasına mane olur. O ki qaldı Bakıda ermənilərə qarşı "qırğınların" törədilməsinə, təbii ki, bu başdan-başa yalandır. Bu iddia erməni iddialarının növbəti kulminasiya nöqtəsidir. Çünki bunlar özlərindən o qədər yalanlar uydururlar ki, əvvəlcə özlərini, sonra isə ətraf aləmi inadırmağa çalışırlar. Onların yalanlarının kulminasiya nöqtəsi bir deyil, yüzlərlədir. Ona qalsa, ermənilər dönüb əvvəllərə baxsınlar. Vaxtilə azərbaycanlılar onlara sığınacaq vermişdi, onları qorumuşdu. Çar Rusiyası onları Azərbaycan türklərinin torpaqlarında məskunlaşdırmışdı. XX yüzilliyin əvvəllərində böyük dövlətlərin əlində alət olan ermənilər onlar tərəfindən silahlandırılaraq indi Ermənistan Respuiblikası deyilən tarixi Qərbi Azərbaycanda dinc azərbaycanlılara qarşı qırığınlar, soyqırımlar törədiblər. Daha sonra 1918-1920-ci illərdə azərbaycanlılara qarşı etnik təmizləmə və soyqırım siyasəti həyata keçiriblər. Baxmayaraq ki, ora o zaman yenə də Azərbaycan torpaqları idi. Bu proses Sovet dönəmində də həyata keçirilib. 1948-1953-cü illər deportasiyası artıq dövlət səviyyəsində gerçəkləşdirilən deportasiya və etnik təmizləmə siyasəti idi. Nəhayət, 1988-ci ildə baş verənlər. Deyərdim ki, Qafan və Mehridən, yəni Qərbi Zəngəzurdan azərbaycanlıların son deportasiyası 1987-ci ildən başlayıb. Bu deportasiya zorakı üsullarla, həm də soyqırım əlamətləri ilə həyata keçirilirdi. 1991-ci ildə tarixi Azərbaycan torpağı Zəngəzurdan, keçmiş Ermənistan SSR-dən sonuncu azərbaycanlılar da çıxarıldı. Azərbaycanlılara qarşı etnik təmizləmə, soyqırım siyasətinin müxtəlif dövrlərdə kulminasiya nöqtələri olub" - deyə H.Cabbarlı qeyd etdi.
H.Cabbarlı əlavə etdi ki, ermənilərin əsassız iddialarına gəlincə, bu yenə də tarixdən uzaq, heç bir siyasi, tarixi, hüququ əsası olmayan məlumatdır və gerçək tarixin təhrif edilməsidir. "Ermənistan XİN-in bu əsassız bəyanatı sadəcə bir kağız parçasıdır. Onların bu "sənədinin" zamanlamasına fikir versək görərik ki, ermənilər yenə də hansısa xarici dövlətlərin əlində alətə çevrilib. Ermənistan adlı dövlət var, amma onlarda hələ dövlətçilik şüuru formalaşmayıb. Çünki dövlət refleksi ilə hərəkət etmirlər. Bunlar hər zaman kimlərinsə əlində oyuncağa çevriliblər. Xüsusən də sülh danışıqlarının indiki vəziyyətində, sülh müqaviləsinin imzalanmasına yaxın olunduğu bir vaxtda yenə də kimlərinsə tapşırığını icra edib sülhə qarşı hərəkət edirlər. Onlar dövləti olmayan da xalq olaraq, kilsə olaraq alətə çevrilirdilər, Qriqoryan kilsəsi hər zaman "parlaq nümunələr" göstərib. Hələ də o tarixi şüur davam edir, dövlət şüurlarının olmaması hələ də onların dövlət kimi deyil, hansısa bir etnik qrup kimi, yaxud bir terror təşkilatı kimi hərəkət etmələrinə səbəb olur. Çünki dövlət ağılları olsa anlayarlar, bu cür əsassız iddialardan əl çəkib Azərbaycanla, Türkiyə ilə və başqa qonşu dövlətlərlə dostluq münasibətləri, iqtisadi əlaqələri genişləndirib inkişaf mərhələsinə başlayarlar. Amma təəssüf ki, onlar yenə də öz amplualarındadırlar, öz xarakterlərinin, öz yalan siyasətlərinin növbəti kulminasiya nöqtəsini yaşayırlar" - deyə H.Cabbarlı qeyd etdi.
İradə SARIYEVA
