Yanvarın 15-də fevralın 7-nə təyin edilmiş növbədənkənar prezident seçkilərində İctimai TV və Radio Yayımları Şirkəti tərəfindən ayrılmış ödənişsiz efir vaxtının bölgüsü məqsədilə püşkatma keçirilib.
Bu barədə Mərkəzi Seçki Komissiyasının (MSK) iclasında qurumun sədr müavini Rövzət Qasımov məlumat verib.
Onun sözlərinə görə, püşkatmaya dair nəticələrin protokollaşdırılması və bölgü cədvəlinin dərc edilməsi barədə qərar qəbul edilib: "İctimai Televiziya namizədlərə qatıldığı "Diqqət Mərkəzi Seçki" verilişi və sosial platformalar vasitəsilə seçki prosesində ödənişsiz təşviqat məsələlərinə öz dəstəyini verəcək".
R.Qasımov bildirib ki, həftənin bazar ertəsi, çərşənbə və cümə günləri İctimai Televiziyanın efirində, həftənin çərşənbə axşamı, cümə axşamı və şənbə günləri isə İctimai Radionun efirində prezidentliyə namizədlərin təşviqatı aparılacaq. Format dəyirmi masa şəklində olacaq. İTV-də və İctimai Radioda çıxışlar saat 21:00-da olacaq.
Püşkatmanın nəticələri aşağıdakı kimidir:
1. Öz təşəbbüsü ilə namizədliyi irəli sürülmüş
Zahid Oruc;
2. Böyük Quruluş Partiyasının prezidentliyə namizədi Fazil Mustafa;
3. Yeni Azərbaycan Partiyasının prezidentliyə namizədi İlham Əliyev;
4. Böyük Azərbaycan Partiyasının prezidentliyə namizədi Elşad Musayev;
5. Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev;
6. Milli Cəbhə Partiyasının prezidentliyə namizədi Razi Nurullayev;
7. Prezidentliyə namizədliyi özü tərəfindən irəli sürülən Fuad Əliyev.
Bildiyimiz kimi, seçki kampaniyasının namizədliyin irəli sürülməsi, imzatoplama hissəsi arxada qaldı. Artıq prezident seçkilərinin təbliğat-təşviqat kampaniyası başlayıb. Təbliğat kampaniyası çərçivəsində artıq namizədlərin ilk debatları olub.
Ekspetlərin təəssüratları nədən ibarətdir? Pulsuz efirdə çıxışlarla bağlı namizədlərin ilk çıxışları, debatları necə təsir bağışlayıb?
Azər Həsrət: "...Bütün etik prinsiplər qorunur"
Siyasi şərhçi Azər Həsrət "Bakı-Xəbər"ə "Namizədlərin debatları ilə bağlı danışmazdan əvvəl vurğulamaq lazımdır ki, ümumiyyətlə prosesin özü çox rəvan gedir. Heç bir problem yoxdur. 17 iddiaçı vardı, bu 17 iddiaçının da hər birini şəxsən tanıyıram. Onlardan 7-si prezidentliyə namizəd kimi qeydiyyata alınıb və artıq təşviqat kampaniyası başlayıb. Onların da heç birinin şikayəti yoxdur. Yəni kiməsə əngəl olunsun, kiməsə problem yaradılsın, belə bir şey yoxdur. Rəvan seçki kampaniyası gedir. Bu kampaniya çərçivəsində təşviqatın başlamasına, çıxışlara gəlincə, burada xüsusi olaraq vurğulamaq lazımdır ki, ümumilikdə iddiaçılar, yaxud namizədlər hər şeyi etik çərçivədə, qanunların tələblərinə uyğun şəkildə edir. Bu da bizim üçün çox önəmlidir"-deyə bildirdi.
A.Həsrət xatırlatdı ki, əvvəllər prezident seçkilərində də, müxtəlif seçkilərdə də bu cür pulsuz efirlərdə çox xoşagəlməz hallar yaşanırdı, rəqiblər, yaxud onların nümayəndələri hətta bir-birini təhqir edəcək səviyyəyə qədər gedirdilər. "Amma indi bu yoxdur, debatlarda bütün etik prinsiplər qorunur. Hər kəs rahat bir şəkildə öz platformasını təqdim edir, seçicilər də buna uyğun şəkildə seçimlərini edəcəklər. Əlbəttə, yazı üçün danışdığımızan mən öz təqdirimi demək istəmirəm. Amma əminəm ki, vətəndaşlarımız, seçicilərimiz hətta bu polemikalar, pulsuz efir təşviqatı olmasa belə, öz seçimini çoxdan edib. Lakin istənilən halda, Azərbaycan dövləti hər bir iddiaçıya bərabər şərait yaradır ki, o öz platformasını rahat şəkildə təqdim edə bilsin. Düşünürəm ki, bunu xüsusilə yüksək qiymətləndirmək lazımdır"-deyə A.Həsrət bildirdi.
Rauf Zeyni: "İlkin debatları müsbət qiymətləndirirəm"
Milli QHT Formunun prezidenti Rauf Zeyni "Bakı-Xəbər"ə şərhində "7 Fevral növbədənkənar prezident seçkiləri ilə əlaqədar olaraq artıq yanvarın 15-dən etibarən təbliğat kampaniyası başlayıb. Namizədlər həm İctimai TV-də, həm İctimai radioda pulsuz efirlə təmin olunublar. Digər mətbuat vasitələrində də namizədlər və namizədlərin səlahiyyətli nümayəndələri təbliğat kampansiyası aparılar. Hər halda bu da Azərbaycanın tarixinin bir mərhələsidir, çox əhəmiyyətli bir seçkilərdir, onun çox strateji tarixi əhəmiyyəti var. Namizədlər də bu və digər şəkildə öz platformalarını elan etməyə başlayıblar, fikirlərini bildirməyə başlayıblar. İlkin debatları müsbət qiymətləndirirəm.
Biz də ictimaiyyət nümayəndələri olaraq onların çıxışlarını, fikirlərini dinləyirik. Düşünürəm ki, namizədlər və namizədləri təmsil edən nümayəndələr də aktiv olmalıdır ki, seçkil fəallığının bir hissəsi də onların çıxışlarından asılıdır. Onlar nə cür çıxış edəcəklərsə seçici auditoriyasına, seçicilərə də o cür müəyyən təsir göstərəcəklər. Bu da o deməkdir ki, onları maraqlandırıb seçkiyə gətirmək çox vacib məslədir. Biz də seçki – təşviqat qruplarında iştirak edirik. Yanvarın 16-da Xətaidəki birinci tədbirdə mən də iştirak etdim".
Seçki təbliğat məsələsini əhali ilə ünsiyyət hesab edən R.Zeyninin sözlərinə görə, təcrübə də göstərir ki, seçici ilə səmimi, açıq-aşkar, aktual ünsiyyətdə olanda seçicinin inamı artır, o təbii olaraq seçkilərə gəlirlər. "Bu gün aydın məsələdir ki, qalib xalqın qalib liderinin xidmətlərinə xalq 7 fevral tarixində öz yüksək münasibətini bir daha bildirəcək. Bu tarixi xidmətlərdir, tarixi zəfərdir. Təbii ki, biz o zəfərə yaraşan seçki keçirməliyik, xalq olaraq, dünya azərbaycanmlıları olaraq 7 fevral seçkisində yenə də zəfər əldə etməliyik" - deyə R.Zeyni qeyd etdi.
İradə SARIYEVA
