Ramil Hüseynov: "Paşinyanın arqumentləri səmimiyyətdən uzaqdır"
Ermənistanın baş naziri Nikol Paşinyan Mülki Müqavilə Partiyasının təşəbbüs qrupunun iclasında bəyan edib ki, İranın yollarla bağlı Azərbaycana yaratdıöı şəraiti onlar da yarada bilər:
"Ermənistan ərazisi ilə bağlı da "dəhliz məntiqi" formalaşdırmağa cəhd edilir. Bunların Ermənistanın ərazi bütövlüyü və suverenliyinə iddialar olduğunu vurğulayanda isə: "Bu, beynəlxalq çıxışdır", – deyə söyləyirlər. Bu söz oyunlarından çıxmaq üçün deyirik ki, İranın Naxçıvanla Azərbaycanın qalan hissəsi arasında əlaqəni təmin etdiyi eyni şərtlərdə biz bu əlaqəni hər iki tərəfdən təmin etməyə hazırıq, dəmir yolu və avtomobil nəqliyyatı. Azərbaycan "dəhliz məntiqi"ni formalaşdırarkən 10 noyabr 2020-ci il tarixli üçtərəfli bəyanata da istinad edir. Amma əslində bu üçtərəfli bəyanatın imzalandığı andan 2023-cü ilin sentyabrına qədər hər iki tərəf göstərdi ki, bu sənəd artıq onlar üçün mövcud deyil".
Ermənistan hakimiyyəti dəhliz məntiqini qəbul etmirsə və Naxçıvana kommunikasiyaların açılmasında səmimidirsə, o zaman nə əcəb Mehridən keçən 43 kilometrlik dəmir yolunun bərpası istiqamətində bir addım belə atmayıblar? Niyə bəs heç olmasa həmin yolun texniki-iqtisadi əsaslandırmasını başa çatdırmayıblar? Halbuki, antiterror ənəliyyatlarından əvvəl Rusiya xarici işlər naziri Sergey Lavrov demişdi ki, proses başlayıb və yaxın zamanlarda bitəcək. Erməni tərəfi səmimidirsə, nıyə bəs həmin dəmir yolu boyunca avtomobil yolu çəkmirlər?
"Ermənistan yolun açılmasında maraqlı olsaydı, onun bərpası istiqamətində hansısa addımlar atardı"
Məsələ ilə bağlı "Bakı-Xəbər"ə açıqlama verən "Yeni Xətt" Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, Naxçıvana kommunikasiyaların açılması məsələsində erməni tərəfi səmimi deyil: "Erməni tərəfi bunda səmimi olsaydı, 44 günlük müharibədən sonra bu yöndə konkret addımlar atardı. Heç bir addım atmadılar. Tam əksinə, vəziyyəti mürəkkəbləşdirmək üçün həlli mümkün olmayan variantlar ortaya atdılar. Məsələn, təklif etdilər ki, Laçın-Gorus avtomobil, Qazax-İcevan dəmir yolları vasitəsi ilə Naxçıvanla əlaqə qurulsun. Bunlardan biri sərt dağlardan keçir, digəri isə məsafə baxımından çox uzaqdır. Bu o demək idi ki, Ermənistan kommunikasiyaların açılmasında maraqlı deyil. Çünki Ermənistan maraqlı olsaydı, məsafə baxımından ən qısa yol olan Mehri yolunu bərpa edərdi. Olmasın dəhliz, olsun adi yol. Paşinyan indi ona görə belə açıqlama verir ki, Ermənistanın Azərbaycana yönəlik sonuncu təzyiq rıçaqı da əldən çıxdı. İranla əldə olunan razılaşma, Ağbənddə Araz üzərində çəkilən körpü Naxçıvanla birbaşa əlaqəni təmin edəcək. Bu yol Zəngəzur dəhlizindən hardasa 10 kilometrə yaxın uzun olacaq. Ancaq buna baxmayaraq, Naxçıvanla daha tez əlaqə qurmaq mümkün olacaq. Ermənistan yolun açılmasında maraqlı olsaydı, onun bərpası istiqamətində hansısa addımlar atardı. Bütün bunlar onu göstərir ki, Ermənistan tərəfi sadəcə prosesləri uzadır. Paşinyanın arqumentləri səmimiyyətdən uzaqdır".
Vidadi ORDAHALLI
