Abutalıb Səmədov: "Şarl Mişelin istefası Azərbaycan-Ermənistan danışıqlarına heç bir təsir göstərməyəcək"
Avropa Şurasının Prezidenti Şarl Mişel Avropa Parlamentinə (AP) seçkilərdə iştirak etmək məqsədilə vəzifəsini vaxtından əvvəl tərk edəcəyini açıqlayıb. Bir neçə gün əvvəl bu barədə o, "X" hesabında məlumat yayıb.
Rəsminin mandatı əslində 2024-cü ilin noyabr ayının sonunda başa çatır, lakin o, yayda vəzifəsini tərk etmək qərarına gəlib.
Onun sözlərinə görə, Avropa İttifaqı Şurasının sədri vəzifəsi Avropa Parlamenti üzvünün işi ilə birləşdirilə bilməz, ona görə də o, Avropa Parlamentin yeni çağırış deputatlarının and içdiyi tarixə qədər, iyulun 16-dək istefa verəcək.
Qeyd edilənə görə, Şarl Mişel Azərbaycan və Ermənistan arasında normallaşma prosesində rol alan əsas Qərb liderlərindən biridir. Onun təşəbbüsü ilə Azərbaycan və Ermənistan liderləri arasında Brüsseldə görüşlər baş tutub.
Məlum olduğu kimi, Şarl Mişel Avropa birliyi Şurasının prezidentliyindın istefa verir. O həm də Azərbaycan- Ermənistan danışıqlarlnda mühüm vasitəçidir, nisbətən obyektiv adamdı. Onun gedişi Qarabağ sülh prosesinə necə təsir edəcək?
"Onun Makron və Şoltsla birlikdə Ermənistanın mövqeyini dəstəkləməsi və birgə bəyanata qol çəkməsi artıq vasitəçilik missiyasının sonu demək idi"
"Alyans" Strateji Araşdırmalar Mərkəzinin sədri, siyasi ekspert Abutalıb Səmədov "Bakı-Xəbər"ə "Şarl Mişelin istefası Azərbaycan-Ermənistan danışıqlarına heç bir təsir göstərməyəcək. Əslinə qalsa, Şarl Mişel öz missiyasını Avropa siyasi birliyinin Qranada sammitində sona çatdırdı. Onun Makron və Şoltsla birlikdə Ermənistanın mövqeyini dəstəkləməsi və birgə bəyanata qol çəkməsi artıq vasitəçilik missiyasının sonu demək idi. Ondan sonra Brüsseldə nəzərdə tutulan görüş də alınmadı, Azərbaycan görüşdə iştirak etmədi. Sonrakı dövrdə artıq Şarl Mişel də, Avropa Birliyi də vasitəçi kimi əslində prosesdən kənarlaşdı"-deyə bildirdi.
A.Səmədovun sözlərinə görə, indiki şəraitdə əsas rəqabət Rusiya və Amerika Birləşmiş Ştatları (ABŞ) arasında gedir, bu rəqabət davam edəcək. O hesab edir ki, əslinə qalsa, artıq bu iki vasitəçi sülh prosesini sürətləndirmək əvəzinə ona mane olan qüvvələrə çevrilib. "Onların arasında gedən rəqabət, təbiidir ki, prosesi ləngidir. Vəziyyətdən çıxmaq üçün Azərbaycan rəhbərliyi dəfələrlə bir neçə düzgün yolu ermənilərə təklif edib. Söhbət ikitərəfli danışıqlardan, danışıqları Gürcüstanda aparmaqdan, 3+3 formatında sülh danışıqları aparmaqdan gedir, lakin bunları hələ ki, Ermənistan icazə ala bilmədiyinə görə qəbul etməyib. Ancaq ümid etmək olar ki, yaxın aylarda bu proses yenə də sürətlənəcək və son nəticədə sülh sazişi bu il imzalanacaq. Buna kifayət qədər imkanlar var, əvvəlki problemlər də qalmayıb. Sadəcə olaraq, Ermənistanın rəhbərliyinin siyasi iradəsi çatışmır. Bir tərəfdən, Ermənistandakı vəziyyət Nikol Paşinyanı qorxudur, digər tərəfdən Qərbdəki böyüklərindən bəzi məsələlərdə icazə ala bilmir, ona görə də proses də ləngiyir. Son mühasibədə Azərbaycan Prezidenti sülh sazişi və Azərbaycan-Ermənistan münasibətlərindəki problemlərlə bağlı hər şeyi açıq söylədi. Aydın oldu ki, prosesin bugünə qədər uzanması və uzanmaqda davam etməsi Ermənistanın tutduğu qeyri-konstruktiv mövqe ilə bağlıdır. Bu nə qədər davam edəcək, nə vaxt Ermənistan səmimi şəkildə sülh sazişini imzalamaq fikrinə düşəcək, elə həmin anda danışıqları yekunlaşdırmaq və sazişi imzalamaq mümkün olacaq. Top Ermənistan tərəfindədir, nə qədər çətin olsa da, Nikol Paşinyan özündə siyasi iradə tapmağa çalışmalıdır və sülh sazişi imzalanmalıdır. Əks halda, sülh sazişinin imzalanması mümkünsüz olar və danışıqlar da Azərbaycan Prezidentinin xəbərdarlıq etdiyi kimi, tamamilə dayana bilər"-deyə A.Səmədov vurğuladı.
İradə SARIYEVA
