Faiq Balabəyli: "Fakt odur ki, ermənilər artıq bu cür kitablardan imtina edirlər və əksəriyyət dərk edir ki, bu onları fəlakətə aparır"
Erməni ideoloqlarının, yazarlarının qondarma iddialar və miflər əsasında yazdıqları "elmi" və bədii kitablar uzun illər Ermənistan vətəndaşlarının, xüsusən də gənc nəslin beynini zəhərləyə bilsə də, artıq bu ölkədə bu məzmunda yazılmış kitablara maraq kəskin şəkildə azalıb.
Baki-xeber.com xəbər verir ki, Ermənistanda 2023-cü ilin dekabrında bestseller olmuş 10 romanın siyahısı tutulub. Maraqlıdır ki, siyahı Ermənistanda qondarma genosid və "Arsax" mövzusuna ictimaiyyətin münasibətinin heç də aparıcı olmadığını sübut edir. Məsələn, bir vaxtlar erməni kütləsinin nəzərində ən populyar, hətta ümummilli ideya kimi təqdim edilən "genosid məsələsi" barədə Mark Aren və Vars Çarantsin yazdıqları "Yenə məhəbbət barədə" romanı 10 bestsellerin sırasında yalnız 5-ci olub. Roman Ruben Sevak adlı erməni şairi ilə Yanni Appelin məhəbbətindən bəhs edir. Guya Sevak "genosid illərində" türk məmurunun xilas təklifini qəbul etməkdənsə ölümü üstün tutub. "3 Arsax müharibəsi və ondan sonrakı hadisələrdən" bəhs edən Aşot Aqbabyanın "Qara bəbir-1" romanı 6-cı sıranı tuta bilib. Müəllif romanda ermənilərin uduzma səbəblərindən danışır, bu gün gecikmədən nə etməli olduqları barədə yazır. Roman bütünlüklə erməni xalqına millətçi, şovinist müraciət və çağırışlardan ibarətdir.
Tək bu iki fakt sübut edir ki, Ermənistanda bir vaxtların ən populyar mövzuları olan "genosid və Arsax"ı indi o qədər də hesaba almırlar. Bir vaxtlar Balayanın "Ocaq" romanı bütün Ermənistanı sarmışdı. Bu gün yeni dövrün "Ocaqları"na Ermənistanda artıq barmaqarası baxmağa başlayıblar. Bu, əslində Azərbaycanın Vətən müharibəsi və Antiterror tədbirləri ilə bölgədə yaratdığı reallığın parlaq təzahürlərindən biridir.
"Artıq bu hadisə göstərir ki, erməniləri uzun illər öz ətrafında birləşdirən hər iki çürük ideologiya iflasa uğrayır"
Ermənistanda qondarma mövzuları ehtiva edən, terroru, uydurma genosidi, "Arsax" "dava"sını təbliğ edən kitablara marağın azalmasını təbii qəbul edən AYB üzvü, tanınmış şair, Müstəqil.az saytının rəhbəri Faiq Balabəyli "Bakı-Xəbər"ə şərhində bildirdi ki, bu gözlənilən idi. O hesab edir ki, vaxtilə o kitablar erməni xalqının beynini zəhərləyib, onları inkişafdan saxlayıb, təcüvüzkarlığa, revanşizmə, yad torpaqlarda ölməyə sövq edib. "Arsax" və qondarma genosid mövzusunda yazılan kitabların onların ürəyini bulandırdığını deyən F.Balabəyli qeyd etdi ki, indi gənclər belə kitablarda yalnız öz faciəli sonluqlarını görürlər və bu səbəbdən də onları alıb oxumaqdan imtina edirlər. "Ermənistan və ermənilər sağalmaz xəstəliyə düçar olublar. Bu xəstəliyin virusunu bacardıqları qədər müxtəlif sahələrdə yayırlar. Eləcə də ədəbiyyat sahəsində. İlk onluqda 5-ci və 6-ci yerdə olan əsərlər zaman keçdikcə daha aşağı pillədə yer alacaq, bəlkə də heç yer tutmayacaq. Hələ ki, müharibənin onlara gətirdiyi məğlubiyyətin acısını yaşayırlar. Bu kitablar yeni doğulmuş erməni uşaqlarını millətçilik virusu ilə zəhərləyəcəklər. Həmin əsərlər də bu zəhərləmədə müstəsna rol oynayacaq. İndiki durumda müharibənin dəhşətli olayları ermənilərin həyata baxışını az da olsa dəyişib. Bu erməni qəbiləsi humanizm və insanlıq hisslərindən uzaqdır".
F.Balabəyli hesab edir ki, bu baxımdan indi ilk onluqda yer almayan əsərlərin gələcək nəsillərə hansı təsirlər göstərəcəyini demək çətindir. Onun fikrincə, ola bilsin, gələcək nəsillər ümumiyyətlə belə kitablar yazanların ədəbiyyatdan silinməsini istəyəcəklər. "Gələcək haqda proqnoz vermək çətindir. Amma fakt odur ki, ermənilər artıq bu cür kitablardan imtina edirlər və əksəriyyət dərk edir ki, bu onları fəlakətə aparır. Bu kitablar indiyə qədər minlərlə erməni gəncini bədbəxt edib. Əksəriyyət dərk edir ki, uydurma genosid və "Arsax" mövzusu onları dinc yaşayışdan uzaqlaşdırır. Erməni "genosidi" barədə romanın 5-ci, "Arsax müharibələri" romanının isə 6-cı yeri tutması əslində ermənilərin bu məsələdən səssiz imtinasını göstərir. Onlar kütləvi olaraq bu mövzulara səssiz etiraz edirlər. Halbuki, əvvəlki dövrdə mənzərə tamam başqa cür idi. Artıq bu hadisə göstərir ki, erməniləri uzun illər öz ətrafında birləşdirən hər iki çürük ideologiya iflasa uğrayır. Bu da onların milli ideologiyasının məhv olması deməkdir.
Onların nicatı səmimi qonşuluq münasibətlərinə "hə", müharibəyə isə "yox" deməkdədir. Bu yolu tutmalıdırlar. Bununla belə başları üzərində dəmir yumruq qorxusunu da hiss edirlər" - deyə F.Balabəyli qeyd etdi.
F.Balabəyli vurğuladı ki, Z.Balayanın "Ocaq" kitabı başdan-başa terroru, erməni şovinizmini, işğalı "tərənnüm" edir, bu kitab indiyə qədər saysız insanın beynini zəhərləyib. O, həmçinin qeyd etdi ki, bu kitabda Azərbaycan xalqının, körpələrimizin başına gətirilən faciələr, amansızlıqlar əks olunub...
İradə SARIYEVA
