Azər Həsrət: "...Azərbaycan Rusiya ilə nə qədər yaxşı münasibətdə olsa da, qarşı tərəf bu münasibətlərə xəyanət edib"
Bakı Hərbi Məhkəməsində hakimlər Zeynal Ağayevin sədrliyi ilə Camal Ramazanovdan və Anar Rzayevdən ibarət tərkibdə (ehtiyat hakim Günel Səmədova) keçirilən məhkəmə iclasında təqsirləndirilən şəxslərin hər biri bildikləri dildə tərcüməçi, habelə müdafiələri üçün vəkillərlə təmin olunub.
Məhkəmə prosesi zamanı çıxış edən Baş Prokurorun böyük köməkçisi Vüsal Əliyev elan edib ki, 2001-ci ilin əvvəllərindən 2021-ci il mayın sonlarınadək olan müddət ərzində “İsgəndər-M” əməliyyat-taktiki təyinatlı ballistik raketi, “Toçka-U” taktiki raket kompleksi, “9K33 OSA” özüyeriyən zenit raket kompleksi, “S-8” idarə olunmaz təyyarə raketi, “Smerç”, “TOS-1A Solntsepek” sistemləri, “İqla-S” zenit-raket kompleksləri, tank əleyhinə idarə olunan “Konkurs” və “Kornet” raketləri, “RPQ-26” qumbaraatanları və digər iriçaplı odlu silah, onun komplekt hissələri, döyüş sursatı, partlayıcı maddələr və qurğular qanunsuz əldə edilərək Rusiya Federasiyasından gizli üsullarla Ermənistan Respublikasına, oradan isə Ermənistan Respublikasının hərbi təcavüzü nəticəsində əvvəllər işğal altında olmuş Azərbaycan Respublikasının ərazisində qanunsuz olaraq qurulmuş mühəndis-istehkam mövqelərinə yerləşdirməklə Azərbaycana qarşı təcavüzkar müharibədə istifadə edilib.
Bu artıq məhkəmədə təsdiqlənmiş faktlardır. Rusiya Federasiyasının rəsmi şəxsləri buna reaksiya verməlidirmi?
Baki-xeber.com saytına bu barədə açıqlama verən siyasi şərhçi Azər Həsrət bildirdi ki, ümumiyyətlə, Ermənistanın hərəkətləri ilə bağlı Rusiyanın davranışları gözardı edilməməlidir, buna mutləq Moskva cavab verməlidir: "Çünki münaqişə dövründə Azərbaycan Rusiya ilə nə qədər yaxşı münasibətdə olsa da, qarşı tərəf bu münasibətlərə xəyanət edib. Birtərəfli qaydada Ermənistanı silahlandırıb, qızışdırıb, müharibəyə təhrik edib. Hətta ara-sıra atəşkəsin pozulması halları baş verəndə də həmişə onun arxasından Rusiya çıxırdı. Təbii ki, rus silahı Ermənistana havayı və ya "kreditə" gəldikcə ermənilər həvəslənirdi. Düşünürdülər ki, həm silahları, həm də arxalarında Rusiya var. Ona görə də Azərbaycana diş göstərməyə cəhd edirdilər. Bütün bunların səbəbkarı Rusiya olub.
Ondan savayı, 44 günlük müharibənin bitməsindən sonrakı mərhələdə, Rusiya sülhməramlılarının Qarabağda yerləşdirildiyi dövrdə də onlar öz əməllərindən əl cəkməyiblər. Oradakı bölücüləri və terrorçuları silahlandırmağa davam ediblər, onları təşkilatlandırıb, xaricdən erməniləri daşıyıb, gətirib Qarabağda məskunlaşdırıblar. Bununla onlar Qarabağda erməni əhalinin sayını süni şəkildə artırmağa çalışıblar. Bütün bunlar cavabsız qala bilməz.
Fikrimcə, Rusiya Azərbaycana bu barədə, ən azı, izahat vermək məcburiyyətindədir. Əgər doğrudan da Rusiya Azərbaycanla normal, ikitərəfli münasibət istəyirsə, strateji tərəfdaşlıq ruhuna sadiqdirsə, bundan sonrakı mərhələdə bizimlə normal münasibətləri davam etdirmək fikrindədirsə ortada olan açıq sualların hamısına cavab verməlidir. Bundan sonra isə belə əməllərə yol verməməlidir. Yəni Rusiyanın bu məsələdə məsuliyyəti sərf-nəzər edilə bilməz. Biz elə bir mərhələyə çatmışıq ki, istər Rusiya olsun, istərsə də başqa böyük dövlət olsun, biz hər şeyi öz adı ilə çağırmağa qadirik. Bu baxımdan Rusiya buyursun, keçmişdəki ayıblarını təmizləsin".
Deniz NƏSİRLİ
