Ermənistanın müqaviməti qırıldı - Xankəndiyə hər iki yol eyni anda açıldı...
Qarabağdakı separatçılar Rusiya sülhməramlılarının və Beynəlxalq Qızıl Xaç Komitəsinin (BQXK) humanitar yüklərin Laçın və Ağdam-Xankəndi yolları ilə paralel daşınması təklifini qəbul etməyə razılaşıblar. Bu barədə Ermənistan mətbuatı məlumat yayıb.
Məlumata görə, yüklər BQXK-nın nəqliyyatı ilə daşınacaq.
Xarici İşlər Nazirliyinin mətbuat katibi Ayxan Hacızadə Ağdam-Xankəndi və Laçın-Xankəndi yollarından eyni zamanda istifadə ilə bağlı yerli medianın sualına cavablandırarkən deyib: “Azərbaycanla əlaqələndirilmiş şəkildə Laçın-Xankəndi və Ağdam-Xankəndi yollarından paralel istifadə edilməsi təklifi uzun müddətdir ki, Azərbaycan tərəfindən irəlilədilir və müxtəlif səviyyələrdə geniş müzakirə olunurdu. Təəssüf ki, əldə edilmiş razılıqlara və beynəlxalq tərəfdaşların çağırışlarına baxmayaraq, Ermənistan və onun tərəfindən Qarabağ bölgəsində yaradılmış qondarma rejim belə keçidin təşkilinə mane olurdu”.
Qəbul edilən bu qərarı Azərbaycanın növbəti uğuru saymaq olarmı?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, Ağdam və Laçın yolunun yüklərin daşınması üçün eyni vaxtda açılması barədə razılaşma həm ABŞ - da aparılan danışıqlarda, həm də sonradan Rusiyanın vasitəçiliyi ilə aparılan danışıqlarda əldə olunmuşdu: “Lakin erməni tərəfi sentyabr ayının 1 - də yolların paralel şəkildə açılması barədə razılaşmanı pozdu. Çox təəssüf ki, ABŞ başda olmaqla, bir sıra Qərb ölkələri bu reallığa göz yumdular və Azərbaycana qarşı təzyiqlərə başladılar. Bütün təzyiqlərə baxmayaraq, Azərbaycan möhkəm dayandı. Azərbaycanın bu qədər müqavimət göstərməsi dünyada çoxlarını təəccübləndirdi. Artıq hər iki yolun istifadəsi barədə razılaşma əldə olunub və Qarabağ erməniləri də buna mane olmamaq, hər iki yolun işləməsi barədə razılığa gəldiklərini deyirlər. Bu razılaşmanın arxasında dayanacaqlarını və ya razılaşmadan imtina edəcəklərini gələcək göstərəcək. Bir şey aydındır ki, Xankəndidə hakimiyyəti ələ almış bir qrup cinayətkar dəstə ilə mübarizə hələ xeyli davam edəcək. Bütün dünya və Ermənistan Azərbaycanın ərazi bütövlüyünü və süverenliyini qəbul etdiyi halda, bu cinayətkar qrup qarşı çıxır, Azərbaycanın tərkibində yaşamayacaqlarını deyirlər, özlərinin hüquqsuz hərəkətlərini bütün dünyaya qəbul etdirməyə çalışırlar. Təbiidir ki, Azərbaycan bunu qəbul etməyib və etməyəcək. Nə olur olsun, Qarabağ üzərində Azərbaycanın süverenliyi təmin olunacaq. Hər iki yolun açılması ilə bağlı verilən qərarın bizə hansı ziyanı və ya xeyri ola bilər? Təbii ki, ilk növbədə faydası ondan ibarətdir ki, Azərbaycana hər tərəfdən hücum edən, təzyiq göstərən qüvvələrin deməyə sözü qalmayacaq. Gah konqresdə, gah senatda aparılan müzakirələrə son qoyulacaq. Xarici işlər naziri BMT baş məclisinin iclasında Azərbaycanın əleyhinə danışsa da, artıq planlar onun istədiyi səviyyədə alınmayacaq. BMT tribunasından Azərbaycana qarşı istıfadə etmək olmayacaq. Ermənistan çox istərdiki, bu razılaşma bir müddət əldə olunmasın, bir müddət Azərbaycana qarşı təbliğat aparma imkanını əlində saxlasın. Bu cəhətdən bu qərarın qəbul olunması Azərbaycan üçün faydalıdır, Azərbaycanın düşmənlərinin deməyə sözü bir müddət olmayacaq. Səbəbi ondan ibarətdir ki, Qarabağ erməniləri və onların rəhbərləri sayılan cinayətkar ünsürlər bu razılaşma ilə bağlı xüsusilə gələn məhsulların Azərbaycana aid olmadığını qeyd edirlər. Azərbaycanın məhsulları Xankəndiyə buraxıla bilməz. Təbii ki, bizi bu münasibət qəti qane etmir. Bu erməni separatizminin bundan sonra da davam edəcəyini göstərir və Azərbaycan da bunu heç vaxt qəbul etməyəcək. Onlara Azərbaycanın yardım göstərməsi daha çox ermənilərə lazımdır. Ancaq, söhbət təkcə humanitar yardımdan, Azərbaycanın göndərdiyi məhsulıardan imtina etməkdən getmir. Söhbət Azərbaycanın suverenliyini nəyin bahasına olursa olsun, qəbul etməməkdən gedir. Bu da bizi ciddi şəkildə narahat edir. Mübarizə hələ qarşıdadır. Azərbaycan Qarabağ ermənilərini girov götürən bu cinayətkar dəstəni zərərsizləşdirmək, eyni zamanda Qarabağda separatizmin əsas dayağı olan silahlı dəstələri tərksilah etmək istiqamətində də bundan sonra da zəruri addımlar atmalıdır və şübhə yoxdur ki, bu addımlar atılacaq”.
Məhəmmədəli QƏRİBLİ
