Bir neçə gündür ki, sosial şəbəkələrdə və mediada özünü cəmiyyətdəki radikal narazı elektoratın təmsilçisi kimi qələmə verən Bəxtiyar Hacıyevlə hakimiyyətin nəzarətində olan APA Media Holdinqin rəhbəri Vüsalə Mahirqızının səsli mesajlasmasını sübut edən səs yazısı geniş müzakirə edilir.
Adəti üzrə, Bəxtiyar Hacıyevin təmsil olunduğu düşərgə səs yazısının montaj edildiyi və Bəxtiyara aid olmadığına dair iddia ortaya qoyur.
Sosial şəbəkələrdə gedən müzakirələrdən belə anlaşılır ki, bu mövzuda daha çox tənqidə Bəxtiyar Hacıyev tuş gəlir. Əslində, hakimiyyətlə əməkdaşlıq etmək eyib bir şey deyil. Amma bunu etməyin açıq yolları var ki, heç kim ona görə adamı qınamaz. Belə gizli fəaliyyət istər-istəməz sual doğurur. Daim polis və digər qurumlarla antoqonist mövqedə olan bir şəxsin durub başqa bir hərbləşdirilmiş quruma piar xidməti göstərməsi maraqlı sayılmaya bilməz. Bəziləri hesab edir ki, belə addımları ilə Bəxtiyar Hacıyev böyük bir toplumun hissləri, səmimiyyəti ilə manipulyasiya edərək, gündüz onların, axşam isə iqtidarın yanında olduğunu sübut etmiş oldu. Aydın oldu ki, Bəxtiyar nəinki gecələr iqtidarın yanında olur, hətta yeri gəlsə, bəzi qurumların reputasiyasını yüksəltmək istiqamətində iş aparırmış.
İndi də Bəxtiyar Hacıyevin türmədən göndərdiyi məktub ictimailəşib. Müxalif resurslar da bunu paylaşıb. Məktub Bəxtiyara aid olmasaydı, elə bu resurslar onu təkzib edərdi. Orada qeyd edir ki, o, hakimiyyətlə əməkdaşlıqda olub. Bunu özü təsdiqləyir. Amma bəzi radikal düşüncəli insanlar hələ də Bəxtiyarın ictimailəşən səsi ilə bağlı ona şər atıldığı, onun hakimiyyətlə əməkdaşlığının mümkünsüzlüyünü deyir. Adamın səmimi etirafı belə bu adamlara yetmir.
Bəxtiyar Hacıyevin öz imzasını qoyduğu məktibdan bir hissəni olduğu kimi paylaşırıq. Sitat:
"Əvvəllər həm mətbuatda, həm də sosial şəbəkələrdə dəfələrlə açıqladığım kimi, 2019-cu ilin əvvəlində prezident İlham Əliyevin təşəbbüsü ilə mənimlə əlaqə qurulub, mənə bildirilib ki, Əliyev islahatlara başlayacaq, bu prosesdə mənim də yeni komandada hər hansı bir qurumda təmsil olunmağımı istədiyi bildirilib. Danışıqların aparılması Fövqəladə hallar haziri Kəmaləddin Heydərova həvalə olundu. Onunla dəfələrlə görüşlərimiz olub, bu müddətdə məndən öncəki ictimai-siyasi problemlər və onların həll yolları barədə təkliflər istəyiblər".
Bundan səmimi etiraf ola bilərmi? Sadəcə, ona şər atıldığını, səsinin montaj olunduğunu deyən “fanatları” anlamaq olmur. Buraxın insanın yaxasını, qoy kimlə istəyir mübarizə aparsın, kimlə də istəyir əməkdaşlıq etsin. Amma yetər ki, bütün bunlar şəxsi deyil, dövləti maraqlar üçün olsun.
Qeyd edək ki, Bəxtiyar Hacıyevin həbsinin bu mövzuya heç bir aidiyyəti yoxdur.
Dekabrın 9-da Bakının Xətai rayon Məhkəməsi hakim Fuad Axundovun sədrliyi ilə insan hüquqları müdafiəçisi Bəxtiyar Hacıyev barəsində 1 ay 20 gün həbs qətimkan tədbiri seçib. Bəxtiyar Hacıyev barəsində Cinayət Məcəlləsinin 221-ci (Xuliqanlıq) və 289-cu (Məhkəməyə hörmətsizlik etmə) maddələri ilə cinayət işi açılıb. Hacıyev məhkəmədəki çıxışında irəli sürülən ittihamları qəbul etməyib, siyasi fəaliyyətinə, o cümlədən beynəlxalq forumlarda hakimiyyəti tənqid etdiyinə görə təqib olunduğunu bildirib.
Məhəmmədəli QƏRİBLİ
