Ermənistanın mina cinayətləri barədə beynəlxalq ictimaiyyətin məlumat əldə etməsi çox mühümdür. Uzun illər ərazilərimizi işğalda saxalayan terrorçu ölkənin silahlı birləşmələri müzəffər ordumuz tərəfindən darmadağın edildikdən sonra onların 30 il müddətində torpaqlarımıza kütləvi şəkildə mina basdırdığı üzə çıxdı.
Bu faktların isə dünyaya təqdim edilməsi işimizin xeyrinədir. Azərbaycan tərəfi daimi olaraq Ermənistanın mina terroru ilə bağlı beynəlxalq ictimayyəti məlumatlandırır.
Xarici İşlər Nazirliyinin (XİN) Mətbuat xidməti idarəsinin 2022-ci ilin yekunlarına dair məlumatında bildirilir ki, Ermənistanda 2021-ci ildə istehsal olunmuş minaların Azərbaycana gətirilməsi və burada basdırılmasından irəli gələn problemlər 12 beynəlxalq qurumun diqqətinə çatdırılıb.
Bildirilib ki, minalardan əziyyət çəkən ölkə kimi Azərbaycan minaların sülhə və təhlükəsizliyə təhdid törətməsi, insan haqlarını pozması və sosial-iqtisadi inkişafa maneə yaratması və ölkəmizin üzləşdiyi mina probleminin aradan qaldırılması üçün aparılan genişmiqyaslı humanitar minatəmizləmə əməliyyatları barədə beynəlxalq səviyyədə məlumatlandırma işini davam etdirib:
“Müharibədən sonra mina qurbanı olan şəxslərin sayı 276 nəfərə çatıb, bunlardan 46 nəfər həlak olub. Bununla yanaşı, Ermənistanda 2021-ci ildə istehsal olunmuş minaların Azərbaycana gətirilməsi və burada basdırılmasından irəli gələn problemlər 12 beynəlxalq ictimaiyyətin diqqətinə çatdırılıb. Ölkəmizin üzləşdiyi mina probleminə görə Ermənistanın daşıdığı hüquqi və siyasi məsuliyyətin işıqlandırılması və humanitar minatəmizləmə əməliyyatlarına beynəlxalq yardımın cəlb edilməsi prioritet vəzifələr kimi qarşıya qoyulub. Azərbaycan tərəfi “Piyadalar əleyhinə minaların istifadəsi, ehtiyata yığılmasının, istehsalının və daşınmasının qadağan edilməsi və onların məhv edilməsi üzrə Konvensiya” daxil olmaqla müvafiq beynəlxalq formatlarda diplomatik fəallıq göstərib. Bundan başqa, il ərzində BMT, Avropa İttifaqı, NATO daxil olmaqla beynəlxalq təşkilatlarla və bir sıra ölkələrlə Azərbaycanda mina probleminin aradan qaldırılması üzrə əməkdaşlıq yolları barədə dialoq aparıb”.
“Beynəlxalq ictimaiyyət Azərbaycanın müraciətlərinə laqeyd qalmamalıdır”
Azərbaycan Milli Qeyri-Hökumət Təşkilatları Forumunun (MQF) prezidenti Rauf Zeyni “Bakı-Xəbər”ə şərhində bildirdi ki, ermənilər ümumiyyətlə bir neçə istiqamətdə Azərbaycana qarşı terror fəaliyyəti həyata keçirir. “Mənfur ermənilər torpaqlarımızı işğalda saxladıqları dövrdə həm milli mədəni tarixirimizə qarşı terror həyata keçirib, həm bütün infrastrukturu dağıdıblar. Eyni zamanda da ərazilərimizdə Ermənistanın istehsal etdiyi minlərlə mina basdırıblar. BMT-nin 4 qətnaməsinin olmasına baxmayaraq, 28 il bu qətnamələr icra olunmadı. Dəmir yumruq əməliyyatı ilə torpaqlarımız işğaldan azad olundu. Azad ərazilərdə biz mina terroru ilə üzləşdik. Ölkə Prezidenti, müzəffər Ali Baş Komandan İlham Əliyevin bəyan etdiyi kimi, Ermənistanın basdırdığı minaları təmizləmək üçün bizə 30 il vaxt, 25 milyard dollar vəsait lazımdır. Təsəvvür edin, mina terrorunun miqyası nə qədər böyükdürsə, onun fəsadları və nəticələri də bir o qədər dəhşətlidir. Azərbaycanda görün nə qədər insan mina qurbanı olub. Çox təəssüflər olsun ki, Ermənistanın Azərbaycana qarşı həyata keçirdiyi mina terroruna qarşı beynəlxalq təşkilatlar da susur, heç biri reaksiya vermir, münasibət bildirmir”.
Vətəndaş cəmiyyəti institutu olaraq dəfələrlə beynəlxalq təşkilatların susqunluğuna öz etirazlarını bildirdiklərini deyən R.Zeyni onlara müraciətlər göndərdiklərini, lakin bu müraciətlərə heç bir reaksiya verdilmədiyini qeyd etdi. “Amma buna baxmayaraq, biz müraciətlərimizi təqdim etməkdən çəkinməməliyik, fəaliyyətimizi dayandırmamalıyıq. Araşdırmalarımızı aparıb bəyanatlarımızı verməliyik. Necə ki, bizim həmkarlarımız, soydaşlarımız Şuşa-Xankəndi yolunda ekoloji terrora qarşı dinc aksiya keçirməklə bunu bütün dünyaya bəyan etdilər. Bütün dünya məlumatlandı ki, ermənilər burada ekoloji terror həyata keçirirlər. Bu ekoloji terror yolverilməzdir, həmkarlarımızın aksiyasını dəstəkləyirik. Onlar çox aktiv iştirak edib erməni terrorunu dünyaya yaydılar. Biz Ermənistanın mina terroruna və digər cinayətlərinə qarşı mübarizəmizi beynəlxalq səviyyədə daha da sərtləşdirməliyik, gücləndirməliyik. Bütün dünyada Ermənistanın Azərbaycana qarşı apardığı terrorları ifşa etməliyik. Beynəlxalq ictimaiyyət Azərbaycanın müraciətlərinə laqeyd qalmamalıdır. ”-deyə R.Zeyni qeyd etdi.
Leyla QARAXANLI
