Kremlin sözçüsü Dmitri Peskov Paşinyanın Qarabağa BMT müşahidəçilərini gətirmək istəyini ürəyində qoyub. Qarabağa beynəlxalq sülhməramlıların göndərilməsi ideyası ilə çıxış edən Ermənistanın Baş naziri Nikol Paşinyanın bəyanatına şərhində o deyib ki, hər şeydən öncə Azərbaycan buna razı olmalıdır:
“Moskva Bakı ilə İrəvan arasında münasibətlərin nizamlanmasına kömək etməkdə davam edəcək. Rusiya ilk növbədə üçtərəfli əsasda əldə edilmiş razılaşmaları yerinə yetirməklə, vasitəçilik səylərini davam etdirmək niyyətindədir. Kreml Laçın yolundakı vəziyyətdən də narahatdır. Laçın yolu ətrafında yaranmış gərginliyə görə Rusiya tərəfi həm İrəvan, həm də Bakı ilə öz işini və səylərini davam etdirəcək”.
Aydındır ki, Rusiya Ermənistanın bu istəyinə yalnız bizim marağımızı qoruduğu səbəbindən qarşı çıxmır. Bütün bunlar Azərbaycanın mənafeyinə uyğun olmamaqla yanaşı, həm də Rusiyanın istəyi ilə uzlaşmır.
Rusiya bunun qarşısını necə alacaq? Almasa öz nüfuzu zədələnə bilərmi?
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan öz ərazisinə kimi istəyirsə, onu da dəvət edə bilər: “Həmin ölkənin müstəqilliyi formal xarakter daşıyır. Suverenitetlə bağlı da ciddi narahatlıqıarı mövcuddur. Ermənistan öz müttəfiqinə qarşı qəribə bir fənddən istifadə etmək istəyir. Rusiya ilə ciddi konfrontasiyada olan gücləri gətirib Qarabağda onunla üz-üzə qoymaq istəyir. Bəzi mövzularda ziddiyyətdə olan güclərin həm də Qarabağda ortaq maraqlarının olduğu üzə çıxır. ABŞ və Qərblə Rusiya kənarda bir-biri ilə ziddiyyətdədir, Qarabağ mövzusunda isə ortaq məxrəc tapa bilirlər. Ermənistan bir missiyanı artıq dəvət edib. Söhbət Avropa İttifaqının sərhədləri monitorinq edən komissiyasından gedir. Həmin missiyanı Azərbaycan ərazimizə buraxmadı. Rusiya da istəmir ki, onun mandatı başqası ilə əvəzlənsin və ya ona şərik çıxsınlar. Belə çıxacaq ki, Rusiya öz işinin öhdəsindən gələ bilmir. Qarabağ Azərbaycanın suveren ərazisidir. Oradakı Rusiya sülhməramlıların mövcudluğuna biz icazə vermişik. Mandatları da müvəqqətidir. Görürsünüzmü, yeri gələndə gedib onlara öz etirazımızı da bildiririk. Heç kimin ixtiyarı yoxdur ki, bizim əraziyə hansısa missiyanı dəvət etsin. Bura kənarda istənilən əsgərin girməsi onun likvidasiyası ilə nəticələnəcək. Buna heç kim şübhə etməsin. Fransa və digərlərinin belə həvəsə düşdüyünü görürük. Mümkün ola bilməz. Belə olarsa, Cənubi Qafqazdan Avropaya gedən bütün kommunikasiyaların fəaliyyəti dayana bilər. Peskov fikrində haqlıdır. Bunu həm də ona görə deyir ki, öz maraqlarına uyğun deyil. Ermənistanın bu istəyi ona Rusiyanın təzyiqlərini artıracaq. Artıq Ermənistan Rusiya ilə açıq konfrontasiyaya gedir”.
Məhəmmədəli QƏRİBLİ
