Ukrayna Prezidenti Aparatının müşaviri Aleksey Aretoviç rəsmi şəxs olaraq Ermənistanı Qarabağla bağlı siyasətinə görə tənqid edib. O bildirib ki, Ermənistan keçmişdəki səhvlərinə görə hazırkı acınacaqlı durumdadır.
Ukrayna rəsmisi bunu belə əsaslandırıb: “Səfil Ermənistan hazırda Rusiyaya etdiyi yanlış tarixi seçimin əvəzini ödəyir. Mən analoq tapa bilmirəm. Birincisi, Ermənistan tam asılı vəziyyətə salınıb. Ermənistanı elə hala gətirdilər ki, o, Rusiyasız mövcud deyil. Hamısı ona görə idi ki, onlar (ermənilər) revanşist ideyalar üzərində cəmləşiblər. Və qonşuları ilə – Gürcüstan, Azərbaycan və Türkiyə ilə normal münasibət qurmaq istəmirlər. Ermənistan Moskvadan tam asılı vəziyyətə salındı. Ermənistan 30 illik səhvlərinə və korrupsiyaya bulaşmış Qarabağ klanının əməllərinə görə bədəl ödəyir. 30 illik aldanma və səhvlərə görə onların Moskva ilə bütünlüklə korrupsiya bataqlığında olan Qarabağ klanının “hakimiyyət”ə gəlməsinə və siyasət diqtə etməsinə imkan verdiklərinə görə bədəl ödəyirlər. Ermənilər üçün ən yaxşı variant qonşularla normal danışıqlar aparmaq üçün güc tapmaqdır. Üstəlik, qonşular bunu ardıcıl olaraq və yumşaq desək, köləlik şərtləri ilə deyil, əlverişli şərtlərlə təklif edirlər”.
“Bu o deməkdir ki, Ukrayna Ermənistanı uzun illərdir tutduğu yanlış mövqedən çəkinməyə çağırır”
Məsələyə münasibət bildirən politoloq Tural İsmayılovun fikrincə, Ukrayna rəsmisinin səsləndirdiyi fikirlər və Ermənistanı Azərbaycanla sülh bağlamağa çağırması reallığı əks etdirir: “Bu onu göstərir ki, Azərbaycan ərazilərinin işğal altında qalması əsla qəbuledilən bir hal deyil. Ukrayna özü işğaldan əziyyət çəkdiyi üçün bizi daha yaxşı anlayır. Ukraynaya da bəllidir ki, Ermənistan bir alət kimi istifadə olunur. Rəsmi Kiyev uzun müddət Azərbaycan ərazilərinin işğal altında qalmasının yanlış olduğunu yaxşı dərk edir. Eyni zamanda, postmüharibə dövründə Azərbaycan Ermənistana dəfələrlə sülh təklif etsə də, qarşı tərəf bu təkliflərdən yayınır. Prosesi müxtəlif bəhanələrlə tormozlayır. Necə deyərlər, Ermənistan yeritdiyi destruktiv siyasətlə Cənubi Qafqazda stabilliyin, sabitliyin əldə olunmasına qarşı bir növ barrikada formalaşdırır. Ukrayna da yaxşı fərqindədir ki, ermənilər regionda vəziyyəti gərginləşdirməklə, əslində digər müharibə ocaqlarının da alovlanmasına səbəb olurlar. Hər vasitə ilə bunu körükləməyə çalışırlar. Yəni Ermənistanın qeyri-stabilliyi təkcə Azərbaycan üçün deyil, digər regionlar üçün də təhdid mənbəyidir. Gələcəkdə bu, regiona yaxın olan digər bölgələrdə də problemlərin, qalmaqalların və xaosun yaşanmasına səbəb ola bilər. Bu baxımdan Ukrayna ali rəhbərliyinin Azərbaycan-Ermənistan münasibətləri ilə bağlı tutduğu mövqe, xüsusən də Aretoviçin açıqlamaları təqdir edilməlidir. Bu o deməkdir ki, Ukrayna Ermənistanı uzun illərdir tutduğu yanlış mövqedən çəkindirməyə çağırır. Ermənistan dövlət olaraq var olmaq istəyirsə, qonşuları ilə normal münasibətlər qurmağa məhkumdur. Əks təqdirdə bunun nəticələri Ermənistan üçün daha acınacaqlı olar”.
Bu baxımdan politoloq hesab edir ki, Ermənistan separatizmi himayə etməkdən əl çəkməlidir.
Vidadi ORDAHALLI
